Պուտինի ջախջախից հակաուղերձը. տեռորիզմի զոհ քրիստոնյա հայերին աջակցող արևմտյան երկրներն ո՞ւր են

«Ռուսաստանի, Ադրբեջանի և Հայաստանի ղեկավարների՝ Լեռնային Ղարաբաղի հարցով 2020 թվականի նոյեմբերին ընդունած հայտարարությունը հետևողականորեն կատարվում է», - «Դավոսյան շաբաթի» շրջանակներում երեկ ունեցած հեռավար ելույթում հայտարարել է Ռուսաստանի նախագահ Վլադիմիր Պուտինը։ «Այժմ միջազգային հանրության առջև [հակամարտությունից] տուժած շրջաններին աջակցության խնդիրն է դրված։ Հարկավոր է լուծել փախստականների վերադարձի, ավերված ենթակառույցների վերականգնման, պատմական, կրոնական ու մշակութային հուշարձանների պաշտպանության հարցերը», - հայտարարել է Ռուսաստանի նախագահը։ Պուտինը միջազգային հանրությանը կոչ է արել օգնություն ցուցաբերել ղարաբաղյան հակամարտությունից տուժած շրջաններին...

Պուտինն ասել է․ - «Ինչպես հայտնի է, նոյեմբերին ստորագրվեց Ռուսաստանի, Ադրբեջանի և Հայաստանի եռակողմ հայտարարությունը։ Կարևոր է, որ այն մեծ հաշվով հետևողականորեն իրականացվում է։ Հաջողվեց դադարեցնել արյունահեղությունը, իսկ դա ամենակարևորն է, հասնել կրակի ամբողջովին դադարեցմանը և սկսել կայունության գործընթացը»։ Ռուսաստանի նախագահը նշել է, որ «հիմա միջազգային հանրության խնդիրն է օգնություն ցուցաբերել տուժած շրջաններին՝ լուծելու փախստականների վերադարձի հետ կապված հումանիտար խնդիրները, վերականգնելու ոչնչացված ենթակառուցվածքները, պաշտպանելու և վերանորոգելու պատմական, կրոնական ու մշակութային հուշարձանները»։

Նշենք, որ յուրաքանչյուր տարի հունվարին Շվեյցարիայի Դավոս հանգստավայրում համաշխարհային տնտեսական համաժողով է անցկացվում։ 2021 թվականը Դավոսյան համաժողովի համար հոբելյանական է՝ 50-ամյակն է, բայց կորոնավիրուսի համավարակը իր պայմաններն է թելադրել, ավանդույթը խախտվել է։ Որոշել է համաժողովի հիմնական մասն անցկացնել մայիսին Սինգապուրում, իսկ հիմա առաջին անգամ օնլայն քննարկումներ են անցկացվում Դավոսյան ֆորումի շրջանակում։

Նկատենք, որ Պուտինը, արդեն երկրորդ անգամ չի խոսում Լեռնային Ղարաբաղի կարգավիճակի մասին: Կամաց-կամաց, այս թեման կարծես, երկրորդ պլան է մղվել, ինչը բավական դուրեկան վիճակ է Ադրբեջանի ու Թուրքիայի համար:

Բայց Պուտինի մեսիջները արևմուտքին հստակ են՝ Ռուսաստանի ամեն հարցում մեղադրելու հարցում, եկե՛ք, օգնեք, մեծ խնդիրներ կան, եկե՛ք՝ տուժած շրջաններ, լուծե՛ք փախստականների վերադարձի հետ կապված հումանիտար խնդիրները, վերականգնե՛ք ոչնչացված ենթակառուցվածքները, պաշտպանե՛ք և վերանորոգե՛ք պատմական, կրոնական ու մշակութային հուշարձանները:

Այսինքն, Ռուսաստանը ստանձնել է ոչ միայն ռազմաքաղաքական պատասխանատվություն, այլև վերոնշյալ բոլոր խնդիրներն է փորձում լուծել: Իսկ ո՞ւր էին թուրք-ադրբեջանական տեռորիզմի զոհ դարձած քրիստոնյա հայերին աջակցող արևմտյան պետությունները...

Շարունակելով Արցախում հրադադարի հաստատումից հետո տարածաշրջանային զարգացման հեռանակարների թեման՝ նկատենք, որ արդեն հայտարարվել է Հայաստանի, Ադրբեջանի ու Ռուսաստանի փոխվարչապետների եռակողմ հանդիպման օրը։

Ռուսաստանի փոխվարչապետ Ալեքսեյ Օվերչուկի մամուլի խոսնակը հայտնել է, որ կողմերի փոխադարձ համաձայնությամբ, հայկական կողմի առաջարկով եռակողմ աշխատանքային խմբի առաջին հանդիպումը կանցկացվի Մոսկվայում 2021 թվականի հունվարի 30-ին։ Տնտեսական ու տրանսպորտային կապերն ապաշրջափակելու նպատակով եռակողմ աշխատանքային խումբը ստեղծվել է Վլադիմիր Պուտինի, Իլհամ Ալիևի ու Նիկոլ Փաշինյանի՝ հունվարի 11-ին Մոսկվայում կայացած հանդիպմանը ձեռք բերված համաձայնությունների հիման վրա։ Աշխատանքային այդ խմբում Հայաստանի փոխվարչապետ Մհեր Գրիգորյանն է, Ռուսաստանի փոխվարչապետ Ալեքսեյ Օվերչուկը և Ադրբեջանի փոխվարչապետ Շահին Մուստաֆաևը։ 55-ամյա Մուստաֆաևը նոյեմբերյանցի է՝ ծնվել է Նոյեմբերյանի շրջանի Ջուջևան գյուղում, ոսկե մեդալով ավարտել է Նոյեմբերյանի թիվ 2 միջնակարգ հայկական դպրոցը, վկայում է նույն դպրոցում սովորած լրագրող Թաթուլ Հակոբյանը։

Մետաքսյա Շալունց