Խաղաղություն չկա՝ Երևանում ասացին Իրանի բարձրաստիճան պաշտոնյային

Այսօր մեկնարկեց Իրանի արտգործնախարար Մոհամմադ Ջավադ Զարիֆի այցը Հայաստան: Արդեն իսկ տեղի է ունեցել նրա հանդիպումը Հայաստանի արտգործնախարար Արա Այվազյանի հետ: Նախատեսվում է Զարիֆի հանդիպումը վարչապետ Նիկոլ Փաշինյանի հետ։ Իրանի ԱԳ նախարարը, հիշեցնենք, որ տարածաշրջանային ուղևորությունը սկսեց Բաքվից, Երևան է ժամանել Մոսկվայից, նախատեսվում են նրա այցերը նաև Թբիլիսի և Անկարա։

Այժմ տարածաշրջանն առերեսվում է նոր լրջագույն մարտահրավերների, որոնք ստեղծվել են ղարաբաղյան հակամարտությունն ուժով լուծելու Ադրբեջանի վտանգավոր փորձի արդյունքում, հայտարարել է Հայաստանի արտգործնախարար Արա Այվազյանը Իրանի արտգործնախարար Մոհամմադ Ջավադ Զարիֆի հետ ընդլայնված կազմով հանդիպման ժամանակ:

Հայաստանը չի համարում, որ Արցախի դեմ Ադրբեջանի ագրեսիայի և ուժի կիրառման արդյունքները կարող են հիմք ստեղծել տևական խաղաղության համար կամ դիտարկվել որպես տարածաշրջանային համագործակցության հնարավորություն, ըստ Հայաստանի ԱԳՆ խոսնակ Աննա Նաղդալյանի՝ ասել է Այվազյանը:

Ընդգծելով, որ Իրանը տարածաշրջանում կարևոր երկիր է՝ Հայաստանի արտգործնախարարը նշել է, որ Հայաստանը հարգում է Իրանի մոտեցումները, որով նա կառուցում է իր հարաբերություններն անմիջական հարևանների հետ: «Այնուհանդերձ, կուզենայինք մեկ անգամ ևս շեշտել, որ միայն հարատև և բոլորի շահերը հասցեագրող խաղաղությունը, որտեղ չկան «հաղթողներ և պարտվողներ», այսպես կոչված, «հաղթանակներ կամ պարտություններ», կարող է իրական երաշխիքներ ստեղծել տարածաշրջանում անվտանգության, կայունության և զարգացման առաջմղման համար», հանդիպմանն ասել է Հայաստանի արտգործնախարարը։

Թեհրանն ունենալով թե՛ տնտեսական համագործակցության կոնկրետ ծրագրեր, թե՛ քաղաքական դիրքորոշում, տարածաշրջան է ուղարկել իր երկրի ԱԳ նախարարին, որին սակայն, Երևանում, հասկացրել են, որ չեն հավատում հարատև խաղաղության մասին տարածաշրջանի երկրների գնահատականներին:

Այսինքն, այն համագործակցության ուղիները, որը ցանկանում է գցել Իրանը՝ հայկական կողմը կասկածի տակ է դրել:

Սա մի իրողություն է, որ Իրանին կստիպի մտորել պաշտոնական Երևանի հետագա քայլերի ուղղությամբ:

Այստեղ իհարկե, կարևոր է հասկանալ, իսկ պաշտոնական Երևանն իր արձանագրած՝ խաղաղություն առայժմ չկա, բանաձևում ի՞նչ հակընդդեմ քայլերի է դիմում՝ բանա՞կ է հզորացնում, սահմաննե՞ր է ամրացնում, թե՞ իշխանությունները գործընկեր պետությունների հետ փորձում են հակազդել թուրք-ադրբեջանական երկվորյակ եղբայրների նպատակներին...

Մետաքսյա Շալունց