Ոչ մի բանակցություն թուրքի հետ՝ առանց հայ գերիներին ազատ արձակելու

Դեռ օրեր առաջ հայտնի էր, որ այս շաբաթ Մոսկվայում կայանալու է Ռուսաստանի, Հայաստանի ու Ադրբեջանի փոխվարչապետերի հանդիպումը, որտեղ քննարկվելու է Հարավային Կովկասում տրանսպորտային կապերի կառուցման հարցը։

Հանդիպումը նախատեսված էր հունվարի 27-ին, և հայտնի էր, որ Ռուսաստանից հանդիպմանը մասնակցելու է փոխվարչապետ Ալեքսեյ Օվերչուկը, Հայաստանից՝ փոխվարչապետ Մհեր Գրիգորյանը, Ադրբեջանից՝ փոխվարչապետ Շահին Մուստաֆաևը։
Ռուսաստանի, Հայաստանի և Ադրբեջանի փոխվարչապետները նախատեսում են հանդիպել հունվարի 27-ին Մոսկվայում Հարավային Կովկասում տրանսպորտային կապի կառուցման հարցը քննարկելու համար: Այս մասին РБК-ին հայտնել են Ռուսաստանի և Հայաստանի կառավարությունների երկու աղբյուր:

Կողմերը պայմանավորվել են ստեղծել բանակցությունների նման ձևաչափ հունվարի 11-ին Լեռնային Ղարաբաղում պատերազմի ավարտից հետո երեք պետությունների ղեկավարների՝ ՌԴ նախագահ Վլադիմիր Պուտինի, ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի առաջին անձնական հանդիպման ժամանակ:

Փոխվարչապետերը պետք է քննարկեն միանգամից մի քանի հնարավոր նախագիծ, մասնավորապես, Հայաստանի տարածքով երկաթուղու կառուցում, որը միացնելու է Ադրբեջանն ու Նախիջևանը, ինչպես նաև՝ Հայաստանն ու Ռուսաստանը: Ներկայումս Ադրբեջանը Նախիջևանի հետ կապի համար ունի միայն օդային հաղորդակցություն:
Բաքուն, ի թիվս այլ բաների, կցանկանար հասնել այնտեղ ավտոմայրուղու կառուցմանը, РБК-ին հայտնել է Ռուսաստանի դիվանագիտական աղբյուրը: Փոխարենը Հայաստանը պետք է երկաթուղային կապ ստանա Ռուսաստանի հետ: Բացի այդ, փոխվարչապետները կքննարկեն Նախիջևանի միջոցով երկաթուղային ճանապարհով Հայաստանն ու Իրանը կապելու առաջարկը:

Ադրբեջանն արդեն սկսել է իր տարածքում կառուցել երկաթուղու մի հատված:
Այսինքն, փոխվարչապետերը քննարկելու են միանգամից մի քանի հարցեր, այդ թվում՝ երկաթգծի կառուցում Հայաստանի տարածքով, որը կմիացնի Ադրբեջանն ու Նախիջևանը ցամաքային կապով։ Փաստացի՝ ճանապարհների ապաշրջափակման հարցը մտել է քննարկման փուլ՝ առանց Ադրբեջանում պահվող հայ գերիներին ազատ արձակելու նախապայմանի:

Սակայն այսօր տեղեկություն ստացվեց, որ Հայաստանի, Ադրբեջանի և Ռուսաստանի փոխվարչապետերի հանդիպումը կլինի «մոտ օրերս», ըստ ամենայնի, այդ հետաձգվում է: Հայաստանի, Ադրբեջանի և Ռուսաստանի փոխվարչապետերի հանդիպումը կլինի մոտ օրերս, հստակ ամսաթիվը և ժամը դեռ ճշտվում են, հայտնեցին փոխվարչապետ Մհեր Գրիգորյանի գրասենյակից։

Առաջիկա հանդիպման օրակարգում, ըստ նույն հաղորդագրության՝ ընդգծված չէ որևէ կոնկրետ ուղղություն կամ ենթակառուցվածք, այն ենթադրում է տարածաշրջանային տրանսպորտային ապաշրջափակման հետ կապված տարբեր հարցերի քննարկում։
Հիշեցնենք՝ երեք երկրների փոխվարչապետերի համատեղ նախագահությամբ աշխատանքային խմբի ստեղծումը նախատեսված է Հայաստանի, Ռուսաստանի և Ադրբեջանի ղեկավարների հունվարի 11-ի մոսկովյան հանդիպման արդյունքում ստորագրված հայտարարությամբ։ Հայկական կողմից խումբը կնախագահի Մհեր Գրիգորյանը։

Ինչպես միշտ՝ «փափուկ բարձ» դնելով հասարակության գլխի տակ՝ Փաշինյանի ղեկավարած կառավարությունը կրկին փորձում է ձևացնել, թե ոչ մի կոնկրետ բան չի քննարկում Ադրբեջանի հետ: Իսկ այդ դեպքում՝ ինչո՞ւ են հանդիպում, եթե Բաքուն կոնկրետ հայտարարում է իր ծրագրերն ու նպատակները, կոնկրետ հանձնարարականներ տալիս իր կառավարությանը:

Ո՞ւմ եք հիմարի տեղ դնում... Մինչև Հայաստանին ու Արցախին չվերադարձվի ամենավերջին հայ գերին՝ դադարեցրեք Ադրբեջանի հետ դավաճանական բանակցությունները:

Մետաքսյա Շալունց