Թե ինչու հանկարծ Զարուհի Բաթոյանը պայթեցրեց Նիկոլ Փաշինյանի ՊՌ փուչիկը

Օրերս Նիկոլ Փաշինյանն այցելել էր աշխատանքի և սոցիալական հարցերի նախարարություն, որի ընթացքում քննարկվել էին հետպատերազմական շրջանի բարդություններն ու սոցիալական պաշտպանության ոլորտում իրականացվելիք բարեփոխումները։

Կարևորվել էր պրոթեզավորման պարզեցված ընթացակարգի ներդրման, ինչպես նաև հաշմանդամություն ձեռք բերած անձանց իրավունքների պաշտպանության և ինտեգրված սոցիալական ծառայությունների իրականացման ուղղությամբ անելիքները:
Ըստ նախարար Մեսրոպ Առաքելյանի ՖԲ գրառման՝ քննարկման առանցքում են եղել նաև պատերազմի ընթացքում վիրավորում ստացած քաղաքացիներին աջակցող միջոցներ տրամադրելու պարզեցված ընթացակարգն ու հաշմանդամության խմբի սահմանման գործընթացը:
<< Երբեմն շատ պարզ բաներ են տեղի ունենում, որ, այսպես ասած, հոսքագծային տրամաբանությամբ անընդհատ շարունակվում են: Նախարարի հետ մենք այդ թեման քննարկել ենք: Օրինակ, երբ պատերազմից հետո հայտարարություն է հրապարակվում, որ ենթադրենք հաշմանդամության կարգի ակնկալիք կամ այդպիսի իրավիճակում գտնվող մարդիկ թող այցելեն այս կամ այն տեղ: Մինչդեռ շատ պարզ բան է, և դա արագ արվեց, որ, կարելի է, հաշվի առնելով առանձնահատկությունները, ոչ թե իրենց հրավիրել, այլ սոցիալական աշխատողը կարող է ինքը գնալ և տեղում կարիքներին ծանոթանալ, ինչն ավելի արդյունավետ կլինի, ավելի որակյալ և քաղաքացու համար ավելի արժանապատիվ: Նկատի ունեմ, որ կան այսպիսի նրբություններ, որոնք երբեմն նույնիսկ չեն նկատվում, բայց շատ կարևոր նշանակություն ունեն ծառայությունների մատուցման որակի առումով: Այսօր մենք կքննարկենք նաև այդ տրամաբանությունը, թե ինչ կարող ենք անել, որպեսզի մատուցվող ծառայությունները սոցիալական ապահովության և աջակցության ոլորտում լինեն մաքսիմալ արժանապատիվ, մաքսիմալ որակյալ և մաքսիմալ արդյունավետ»,- նախարարության ղեկավար կազմի հետ հանդիպման ընթացքում նշել է վարչապետ Նիկոլ Փաշինյանը։

Նախարար Առաքելյանն էլ իր հերթին զեկուցել է, թե պարզեցվել են վիրավորներին աջակցող միջոցների տրամադրման ընթացակարգը և զինվորներին հաշմանդամության խմբի տրամադրման գործընթացը: Առաջիկայում նախատեսվում է պրոթեզավորման հատուկ ընթացակարգի ներդրում, ինչպես նաև հաշմանդամություն ձեռք բերած անձանց իրավունքների պաշտպանության և սոցիալական ինտեգրման միջոցառումների իրականացում:
Սրտացավության այս բարձր նոտայով պոպուլիստական ՊՌ ակցիան դեռ չէր ավարտվել, երբ ֆեյսբուքում հայտնվեց նախկին սոցապնախարար, Նիկոլ Փաշինյանի քաղաքական թիմի անդամ Զարուհի Բաթոյանի՝ քարը քարի վրա չթողնող գրառումը․ «Աշխատանքի և սոցիալական հարցերի նախարարությունը հաշմանդամության սահմանման համար փորձաքննությունը անցկացնում է տանը, եթե մարդը չի կարող գնալ փորձաքննության գրասենյակ: Համենայնդեպս ես 15 տարեկան էի, երբ մամայիս դիմումի հիման վրա հանձնաժողովը տունայց արեց: Ճիշտ է, տաքսու գումարը էն ժամանակ մենք տվեցինք, բայց այդ կարգը վաղուց է գործում»,- գրել էր Բաթոյանը։

Փաստորեն, Փաշինյանն ու սոցապնախարար Մեսրոպ Առաքելյանը փորձում են միավորներ հավաքել՝ իրենց վերագրելով դեռևս 25 տարի առաջ ընդունված և տարիներ շարունակ գործող կարգը։ Եվ ահա ոչ այլ ոք, քան նախկին գործընկերը պատռել է նրանց ՊՌ փուչիկը։ Բաթոյանը նաև գրել էր, որ հաշմանդամություն ունեցող անձանց կյանքի որակի բարելավման ամենակարևոր նախապայամաններից մեկը անձնական օգնականի ինստիտուտն է, որը հաշմանդամի համար անկախ կյանքի, կրթության և աշխատանքի հնարավորություն է ստեղծում։ <<Այս ծառայության համար ոչ միայն ֆինանսական միջոցներ, այլ նաև իրավական հիմքեր են պահանջվում>>,- գրել է նախկին նախարարը և հավելել, թե 2019-ին Աշխատանքի և սոցիալական հարցերի նախարարությունը մշակել և շրջանառել է «Հաշմանդամություն ունեցող անձանց իրավունքների մասին» ՀՀ օրենքի նախագիծը, որը պետք է լուծի նաև այդ խնդիրը։ Նախագծի վերջին խմբագրված տարբերակը մինչև Բաթոյանի ազատվելն ուղարկվել է վարչապետի աշխատակազմ։

<<Հույս ունեմ՝ շուտով նախագիծն այնուամենայնիվ կգնա ԱԺ և կդառնա գործող օրենք:
Դրանից հետո, իհարկե, կպահանջվեն նաև ենթաօրենսդրական ակտեր և ֆինսական հատկացումներ, ինչը ես առանց վարանելու կանվանեի ներդրում, քանի որ մեկ անձնական օգնականի ֆինանսավորումը առնվազն երեք մարդու համար աշխատանքի և կրթություն ստանալու հնարավորություն է ստեղծում: Հայտնի պատճառներով անձնական օգնականի ծառայությունն այսօր ավելի քան արդիական է, որովհետև կան դեպքեր, երբ բուժման և պրոթեզավորման ծրագրերը չեն կարող լուծել բոլոր խնդիրները>>,- գրել է Բաթոյանը։

Փաստացի՝ նախկին նախարարը ցույց է տալիս հաշմանդամներին իրական օգնություն ցուցաբերելու կոնկրետ ճանապարհը։ Պատերազմի հետևանքով շուրջ 15 հազար մարդ է վիիրավորվել և այդքան մարդու ազնձնական օգնականի հաստիք տրամադրելու քաղաքական կամք Փաշինյանը հազիվ թե ունենա։ Ընդ որում, որպես անձնական օգնական, կարող են հանդես գալ հաշմանդամություն ունեցող անձի մերձավոր հարազատները, որը սոցիալական և հոգեբանական առումով լավագույն լուծումը կլինի։

 Հայկ  Դավթյան