Խոշոր ու ողբերգական ավտովթար Տավուշի մարզում . կա 1 զոհ, 11 վիրավոր. ՖՈՏՈՌԵՊՈՐՏԱԺ. ԼՐԱՑՎԱԾ

Մայիսի 31-ին, խոշոր ավտովթար է տեղի ունեցել Տավուշի մարզում: Ժամը 21:00-ի սահմաններում Երևան-Իջևան ավտոճանապարհի 116-րդ կմ հատվածում բախվել են Mercedes Vito մակնիշի 31 LL 600 համարանիշի, Nissan X-Trail մակնիշի 34 QO 600 համարանիշի, Nissan March մակնիշի 34 MN 494 համարանիշի ավտոմեքենաները: Ինչպես դեպք վայրից հայտնում է ֆոտոլրագրող Գագիկ Շամշյանը, վթարի հետևանքով 12 հոգի մարմնական վնասվածքներով տեղափոխվել են՝ մի մասը Իջևանի, մի մասը Դիլիջանի բժշկական կենտրոններ: Վիրավորներին ավտոմեքենաներից դուրս են բերել քաղաքացիներն ու Իջևանի փրկարարները: Հիվանդանոցից ֆոտոլրագրողին հայտնել են, որ վիրավորներից մեկը գիտակցության չգալով՝ մահացավ: Դեպքի վայր են ժամանել ճամապարհային ոստիկանության 2-րդ սպայական գումարտակի 4-րդ վաշտի 2-րդ դասակի աշխատակիցները՝ վաշտի հրամանատար Էդգար Սուսլիյանի, դասակի հրամանատար Սերյոժա Ղալթախչյանի գլխավորությամբ: Վթարի մասին ՃՈ օպերատիվ կառավարման կենտրոնի պատասխանատու հերթապահ Միքայել Աղաբեկյանը տեղեկությունը փոխանցել է Հայաստանի քննչական կոմիտեի Տավուշի մարզային քննչական վարչություն, որտեղից վարչության պետ Աննա Մանթաշյանի հանձնարարականով դեպքի վայր է ժամանում քննչական խումբը: Դեպքի վայրում հավաքվածներն ասում էին, որ վիրավորների մի մասին հիվանդանոց է ուղեկցել վաշտի հրամանատար Է. Սուսլիյանը: Ոստիկանությունն ու քննչական բաժինը պարզում են վարորդների, մահացածի և վիրավորների ինքնությունը: *** 01/06/2017 09։00 Քիչ առաջ ֆոտոլրագրողը հայտնեց՝ ոստիկանությունն ու Տավուշի մարզային քննչական վարչությունը պարզել են՝ Mercedes Vito-ն վարել է Տավուշի մարզի Կոթի գյուղի բնակիչ՝ 44-ամյա Գրիշիկ Նազարյանը, Nissan X-Trail-ը վարել է Երևան քաղաքի բնակիչ՝ 40-ամյա Առնակ Խաչատրյանը, Nissan March-ը վարել է Կոտայքի մարզի Առինջ գյուղի բնակիչ՝ 25-ամյա Խաչիկ Երիցյանը։ Հիվանդանոց են տեղափոխվել Ա. Խաչատրյանը, Nissan March-ի ուղևորուհի՝ Կոտայքի մարզի Առինջ գյուղի բնակիչ, 60-ամյա Ամալյա Երիցյանը, Mercedes Vito-ի ուղևորներ՝ Կոթի գյուղի բնակիչներ, 46-ամյա Ռիտա Բաբլումյանը, 61-ամյա Արևիկ Նազարյանը, Տավուշի մարզի Կիրանց գյուղի բնակիչ՝ 22-ամյա Թասմին Աղասարյանը, Nissan March-ի ուղևորներ՝ Կոտայքի մարզի Առինջ գյուղի բնակիչներ, 67-ամյա Վերգուշ Երիցյանը, 58-ամյա Կամո Երիցյանը, 33-ամյա Արմեն Երիցյանը, 56-ամյա Կարո Երիցյանը և Nissan March-ի վարորդ Խ. Երիցյանը, ով Իջևանի բժշկական կենտրոնում գիտակցության չգալով՝ մահացել է; Եվս 1 հոգի տեղափոխվել է հիվանդանոց, և քանի որ գանգատներ չի ունեցել, հրաժարվել է բժիշկների օգնությունից։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: Լուսանկարները՝ Գագիկ Շամշյանի