Թուրքական կլկլոցներ ու հայրենասիրական դրոշներ Ազգային ժողովում
Կառավարության հրավիրած ԱԺ արտահերթ նիստին այսօր բուռն քննարկում ծավալվեց «Հեռուստաընկերության եւ ռադիոյի մասին» եւ «Պետական տուրքի մասին» օրենքների փոփոխությունների ժամանակ, որոնցով ընդլայնվում է ռադիոհեռարձակման ցանցը։ ՀՀ Հեռուստատեսության և ռադիոյի ազգային հանձնաժողովի նախագահ Գագիկ Բունիաթյանը հավաստիացրեց, թե ցանկանում են լիբերալիզացնել մեդիա դաշտը: Նա նշեց, որ հնարավոր է ավելանա երեք հանրապետական ռադիոընկերություն: «Ելք» խմբակցության քարտուղար Գևորգ Գորգիսյանը նկատեց՝ անցնում ենք թվային տիրույթ հենց սահմանամերձ շրջաններում, դա նշանակում է, որ այդ ամենաաղքատ շրջանները պետք է լրացուցիչ ծախսեր կատարեն թվային ընդունիչներ գնելու համար. «Նրանք չունեն այդ գումարը, շարունակելու են ոչ թվային, անալոգային տիրույթում լսել թուրքական` զրկվելով հայկականից: Եթե կա հայկականը նույն անալոգայինով, չե՞ք տեսնում արդյոք լրացուցիչ վտանգ: Ես լավ ծանոթ եմ ռադիոֆիզիկային ու հաճախականության փոփոխության կարիք չկա»։ «Ելք» խմբակցության անդամ Արտակ Զեյնալյանն էլ խոսքի ազատության սահմանափակման մասին հետաքրքրվեց։ «Եթե կա նման խնդիր, ապա դա կապված Թուրքիայի ու Ադրբեջանի մեդիա շահերը պաշտպանող կառույցների հետ, որովհետև սրանով լուրջ վտանգվում է և թուրքական, և ադրբեջանբական ռադիոների հեռարձակման ներթափանցումը հանրապետության տարածք»,-ասաց նախագծի համահեղինակ ՀՀԿ-ական պատգամավոր Արման Սաղաթելյանը, որը մինչ այդ Հանրային ռադիոյի ղեկավարն էր։ Սա հունից հանեց Նիկոլ Փաշինյանին, նա հոխորտաց՝ որեւէ մեկը չհամարձակվի իրենց խմբակցության պատգամավորների հարցերի ժամանակ Թուրքիայից ու Ադրբեջանից սկսել խոսել.«Հակառակ դեպքում ամեն անգամ կհիշեցնենք քառօրյա պատերազմը, պաշտպանությունը ՀՀ-ի և Լեռնային Ղարաբաղի ձախողելու ձեր պատասխանատվությունը և ամեն անգամ կհիշեցնենք, որ այդ հարցը հետաքննված չէ պատշաճ մակարդակով, և անպայման պետք է քննվի, թե ովքեր, ՀՀԿ որ բարձրաստիճան ներկայացուցիչները ձախողեցին ՀՀ պատշաճ պաշտպանության կազմակերպումը և հարյուրավոր զոհեր տվեցին քառօրյա պատերազմի ընթացքում։ Չհամարձակվեք այսուհետ մեր խմբակցության ու ընդհանրապես ընդդիմության հարցերին ի պատասխան հայրենասիրական դրոշներ բարձրացնել, կոնտեքստից դուրս, երբ նորմալ քննարկում է աշխատանքային լինում» արտահերթ ելույթով պատասխանեց Նիկոլ Փաշինյանին. «Սահմանամերձ շրջաններին, որոնք ունեն սահմաններ Թուրքիայի ու Ադրբեջանի հետ, իսկ դա ՀՀ 80-ից ավելի տոկոսն է, մենք հնարավորություն ենք տալիս այդ բնակչներին ավելի ճիշտ ինֆորմացիա ստանալ մեր ռադիոհաճախությունների միջոցով, այլ ոչ թե թուրքական կամ ադրբեջանական ռադիոներ լսել։ Մենք ընդունում ենք, որ իդեալական իշխանություն չենք, ինչը Հայաստանում երբեք չի եղել, բայց ապրիլի 2-ի ընտրությունների արդյունքները տվել է մեր աշխատանքի գնահատականը։ Գերմանիայի, Կիպրոսի, Սլովակիայի նման երկրները ընդունել են Հայոց ցեղասպանությունը ու առաջին անգամ բանակցային գործընթացում Մինսկի խումբն արել է հասցեական հայտարարություն։ Քառօրյա պատերազմում Ադրբեջանի ղեկավարությունն ունեցել է հստակ ֆիասկո։ Առաջարկում ենք բոլորիս աշխատել միասին»,- ընտրությունների լեգիտիմությունը ճանաչած Ելք-ին թափանցիկ ակնարկով խայծեց ԱԺ փոխխոսնակը։ 87 կողմ-ով առաջին ընթերցմամբ ընդունվեց նաև «Հեռուստատեսության եւ ռադիոյի մասին» ՀՀ օրենքում փոփոխություններ եւ լրացում կատարելու մասին և «Պետական տուրքի մասին» ՀՀ օրենքում փոփոխություններ կատարելու մասին օրենքի նախագծերի փաթեթը: Անի Սահակյան