Կարեն Կարապետյանը «փորում» է վտանգավոր փեթակը

Իշխանությունը ըստ քաղաքական նպատակահարմարության ոչ միայն պաշտոն էր բացում, հետո նորից փակում, այլեւ կամայական որոշում կայացնում աշխատավարձերի բարձրացման հետ կապված: Անցած շաբաթ հայտնի դարձավ, որ Կառավարությունն ուզում է, որ այլեւս իր կազմում տեղ չգտնի կառավարության աշխատակազմի ղեկավար-նախարար պաշտոնը: ԱԺ մայիսի 30-ի արտահերթ նիստում հարցը կդրվի քննարկման: Մինչ այդ մշտական հանձնաժողովներում քննարկվում է նախագծին կից փաթեթը, որով առաջարկվում է համապատասխանեցնել նաեւ ԱԺ-ի աշխատակազմի ղեկավարի աշխատավարձը կառավարության աշխատակազմի ղեկավարինի հետ: Եթե մինչ այժմ աշխատավարձի գործակիցը 10 է, ապա առաջարկվում է դարձնել 12, ինչպես կառավարության աշխատակազմի ղեկավարինը, շղթակայան սկզբունքով պետք է բարձրանան նաեւ տեղակալների ու աշխատակազմի այլ աշխատակիցների աշխատավարձերը: «Ի՞նչ սկզբունքով է որոշվել, որ հենց այս նախարարությունը պետք է կրճատվի, քանի որ, կարծում եմ, կառավարությունում ընդհանուր առմամբ փոփոխությունների այլ մեխանիզմներ էլ կան»,- հարցրեց Ելք դաշինքի խմբակցության ղեկավար Նիկոլ Փաշինյանը: «Սահմանադրությամբ գործադիրը որոշում է, թե իր քաղաքականությունը ինչ մարմինների միջոցով անի: Գործադիրը գտնում է, որ այսօր իր առաջնահերթությունները հնարավոր է իրականացնել նշված 18 նախարարությունների միջոցով»,- պատասխանեց արդարադատության փոխնախարար Արթուր Հովհաննիսյանը: Կբարձրացվեն նաեւ ԱԺ աշխատակազմի ղեկավարի տեղակալների աշխատավարձերը՝ հավասարեցվելով Կառավարության աշխատակազմի ղեկավարի տեղակալներին: Արդյունքում՝ ստացվում է ավելի բարձր աշխատավարձ, քան պատգամավորներինն է: «Մյուսներից պիտի ներողոթյուն խնդրես, ասես՝ մի վեց ամիս խնդրում եմ համբերեք կամ էդ փողը ես եմ տալիս, օրինակ՝ մինչեւ այդ օրենքը հիմնովին փոխենք»,- կատակում էր Առողջապահության եւ սոցիալական հարցերի մշտական հանձնաժողովի նախագահ Հակոբ Հակոբյանը, որը ի վերջո, ընդունեց, որ իր համար էլ ընդունելի չէ կառավարության ներկայացրած օրենքը շատ պարզ պատճառներով՝ նախ Սահմանադրության հոդվածը, որով նախատեսվում են Կառավարության փոփոխությունները, ուժի մեջ կմտնի հաջորդ տարի, ուստի ինչո՞վ է այդ դեպքում պայմանավորված նման հրատապությունը: «Հիմա այս տարվանից ռազգոնով գնում ենք ու ձեռքի հետ էլ մի քանի խնդիրներ, կոնֆլիկտներ ենք առաջացնում, էդ դեպքում հիմնավորումը ո՞րն է»,- հարցնում էր Նիկոլ Փաշինյանը, որին այդպես էլ հիմնավոր չէի պատասխանում: Պետաիրավական եւ մարդու իրավունքների հանձնաժողովի նախագահ Հրայր Թովմասյանը լրագրողների հարցին՝ եթե դառնում է դա հայեցողական պաշտոն, ինչո՞ւ աշխատավարձը չի փոխվում՝ նա պատասխանեց. «Աշխատակազմի փոփոխությունը պայմանավորված չէ միայն այդ կարգավիճակի հետ, կախված է աշխատանքի ծավալի հետ: Ես եղել եմ ԱԺ աշխատակազմի ղեկավար, վստահեցնում եմ՝ աշխատանքի ծավալի առումով դա չի զիջում նախարարին>>: Նշենք, որ Կառավարության աշխատակազմի ղեկավար կդառնա նախկին ղեկավար Դավիթ Հարությունյանի առաջին տեղակալ Վահե Ստեփանյանը, որն աշխատել է «ՀայՌուսգազարդում», եղել է «Գազպրոմ Արմենիա» ՓԲԸ աշխատակազմի ղեկավարի տեղակալ, տնօրենների խորհրդի քարտուղար, վարչության քարտուղար և համարվում է «վարչապետի մարդը»: Ստացվում է, որ Կարեն Կարապետյանը իր մերձավորի համար պատրաստ է պատգամավորների ընդվզմանը, կամ էլ փորում է վտանգավոր փեթակը, կարելի է վստահ լինել, որ պատգամավորները հանգիստ չեն ընդունի այս անարգանքը, որ աշխատակազմի ղեկավարները իրենցից շատ գումար ստանան: Անի Սահակյան