Ռուսաստանի ՊՆ պատվիրակությունը Երևանում՝ մոսկովյան հանդիպումից հետո. Լուրջ խմորումներ ռուսական ակտիվությամբ

Ռուսաստանի Դաշնության անվտանգության դաշնային ծառայության տնօրեն Ալեքսանդր Բորտնիկովի նախաձեռնությամբ դեկտեմբերի 28-ին Մոսկվայում տեղի է ունեցել եռակողմ հանդիպում ՀՀ ազգային անվտանգության ծառայության և Ադրբեջանի անվտանգության պետական ծառայության տնօրենների միջև: Այս մասին հայտնի դարձավ ԱԱԾ-ից:

Հանդիպման ընթացքում քննարկվել են մի շարք անհրաժեշտ հարցեր, այդ թվում՝ նաև գերիների փոխանակման և անհետ կորածների որոնողական աշխատանքներին վերաբերող: Հանդիպման արդյունքում ձեռք են բերվել նաև պայմանավորվածություններ տարբեր ուղղություններով աշխատանքների իրականացման վերաբերյալ:

Տարեվերջյան ինչ-որ մեծ ակտիվություն է ցուցաբերում Ռուսաստանը: Փաստացի, սա Հայաստան-Ադրբեջան պաշտոնական առաջին հանդիպումն է՝ նոյեմբերի 9-ի հայտարարության ընդունումից հետո:

Ի դեպ, ռուսաստանյան «Միլիտարիստ» տելեգրամի ալիքն էլ հայտնեց, որ երեկ երեկոյան Երևանում է եղել Ռուսաստանի պաշտպանության նախարարության պատվիրակությունը:

Փաստորեն, Մոսկվայում ՀՀ ազգային անվտանգության ծառայության և Ադրբեջանի անվտանգության պետական ծառայության տնօրենների միջև եռակողմ հանդիպումից մեկ օր անց Երևան է ժամանել ռուսական ՊՆ-ի պատվիրակությունը: Նշանակում է՝ լուրջ քննարկումներ են ընթանում, լուրջ հարցերի շուրջ:

Ամեն ինչ պատված է գաղտնիության քողով. Փաշինյանի իշխանությունից ոչինչ չես կարող իմանալ... Կամ, եթե անգամ ասեն որևէ բան՝ դա կարող է որևէ կապ չունենալ իրականության հետ:

Իսկ առայժմ աշխատում են ռուսները՝ ստանձնելով խաղաղության, կայունության ապահովմանը տարածաշրջանում:

Ռուսաստանի արտաքին գործերի նախարար Սերգեյ Լավրովը ТАСС-ին տված հարցազրույցում նշել է, որ Լեռնային Ղարաբաղի հակամարտության գոտում իրավիճակը նորմալանալու միտում ունի, և կողմերը վճռական են՝ կատարել պայմանավորվածությունները: «Լեռնային Ղարաբաղի հակամարտության գոտում իրավիճակը նորմալանալու միտում ունի: Գոհունակությամբ նշում ենք Բաքվի և Երևանի՝ իրենց պարտավորությունները կատարելու տրամադրվածությունը և իրավիճակի ընդհանուր կայունացմանն ուղղված ջանքերը: Կցանկանայի նշել կողմերի ցուցաբերած համագործակցության բարձր աստիճանը «տեղում» ծագող խնդիրների լուծման հարցում», - ասել է Լավրովը:

Նա հավելել է, որ Ռուսաստանը նույնպես շարունակում է կատարել հրադադարի համաձայնագրի երաշխավորի ստանձնած իր գործառույթը: «Օրակարգում է հրադադարի ռեժիմի ցանկացած խախտման կանխարգելումը, ինչպես նաև տարածքի մաքրումը պայթյունավտանգ առարկաներից, ռազմագերիների և զոհերի մարմինների փոխանակումը, փախստականների և ներքին տեղահանվածների վերադարձի անվտանգության ապահովումը, հումանիտար սուր խնդիրների լուծումը, պատմական հուշարձանների պահպանումը, տրանսպորտային և տնտեսական կապերի ապաարգելափակումը», - նշել է Լավրովը: Ըստ նրա` դրական միտում է նկատվում բոլոր ուղղություններով: Լավրովը նշել է, որ հրադադարի ռեժիմի միակ նկատելի խախտումը տարածաշրջանում գրանցվել է դեկտեմբերի 13-ին, սակայն համատեղ ջանքերի շնորհիվ իրավիճակը կարգավորվել է. «Միակ նկատելի խախտումը, որը գրանցվել է դեկտեմբերի 13-ին, տեղի է ունեցել շփման գծում, որտեղ ռուս խաղաղապահները ներկա չեն եղել: Մեր խաղաղապահ զորախմբի հրամանատարության կողմից ձեռնարկված ակտիվ քայլերը ադրբեջանցի և հայ գործընկերների հետ շփման ընթացքում հնարավորություն են տվել խուսափել միջադեպի տարածումից»:

Լավրովը, փաստորեն, համարում է, ոչ իրավիճակը Լեռնային Ղարաբաղի գոտում կարգավորման միտում ունի: Ավելին՝ նա հավելում է, թե ադրբեջանցի և հայ գործընկերների հետ շփումներում ռուս խաղաղապահների հրամանատարության գործադրած եռանդուն քայլերը թույլ են տվել խուսափել միջադեպի ծավալումից:

Եվ ոչ մի խոսք՝ ադրբեջանցիների կողմից շարունակվող հանցագործությունների մասին, գերեվարման դեպքերի, պատերազմական հանցագործությունների մասին, երբ կտտանքների են ենթարկվում հայերը:

Պարզվում է, Բաքուն կատարում է պարտավորությունները, իսկ իրավիճակը Լեռնային Ղարաբաղում ընդհանուր կայունացման է գնում...

Մետաքսյա Շալունց