Ոստիկանությունն իրեն փորձում է պահել ադրբեջանական ոստիկանության նման. Արծվիկ Մինասյան

«ԱԺ առանձին պատգամավորներ այսօր պատգամավորին ոչ վայել, խուլիգանական վարքագծով աչքի ընկան՝ փորձելով հրահրել բախումներ քաղաքացիների հետ: Տեսանք, թե Ոստիկանությունն ինչպիսի հրահանգ էր ստացել ու ԱԺ առանձին պատգամավորներ ինչպես էին իրենց պահում՝ պատգամավորին ոչ վայել, խուլիգանական վարքագծով աչքի ընկնելով եւ փորձելով հրահրել բախումներ քաղաքացիների հետ: Սրա արդյունքում ոստիկանությունը ոչ միայն դուրս եկավ իր լիազորությունների շրջանակից՝ ցուցաբերելով ակնհայտ ապօրինի վարքագիծ, այլ նաեւ բերման ենթարկվեցին տարբեր բաժիններ 3 տասնյակի կարգի քաղաքացիներ»,-  լրագրողների հետ զրույցում ասաց ՀՅԴ ԳՄ անդամ Արծվիկ Մինասյանը:

«Ակցիայի ընթացքում եւ բերման ենթարկվելուց հետո Ոստիկանության տարբեր բաժիններում թույլ են տրվել բազմաթիվ խախտումներ: Մասնավորապես, դրանցից մեկով էլ ես ինքս եմ Ոստիկանության Քանաքեռ-Զեյթունի բաժնում հաղորդում ներկայացրել հանցագործության մասին, որտեղ շատ հստակ եւ պատկերավոր ներկայացված են դրվագներ, թե ինչպես են Ոստիկանության ծառայողները խախտելով հավաքների ազատության մասին օրենքը, խոչընդոտել եւ արգելափակել են քաղաքացիների խաղաղ ակցիա իրականացնելու իրավունքը: Ակցիայի մասնակիցների նկատմամբ բիրտ ուժ կիրառելով զրկել են ազատությունից: Այս բոլորի պատասխանատուն, բնականաբար, թիվ մեկ դավաճանն է, որի ապօրինի հրահանգները Ոստիկանությունը սկսել է շատ ավելի կոպիտ եւ բիրտ ձեւով իրականացնել»,-ասաց նա:

Նա շեշտեց, որ բոլորը պատասխան են տալու, այդտեղ երկրորդ կարծիք չկա. «Որովհետեւ այն, ինչ իրենք իրականացնում են, ընդամենը փորձում են քողարկել դավաճանական ցանցի մի ամբողջ գործունեությունը, որը քրեորեն պատժելի արարք է, որի շրջանակներում բոլոր մեղավոր անձինք վաղ թե ուշ պատասխան են տալու։ 44 օր հասարակությանը պահելով պետական աննորմալ տեղեկատվության պայմաններում, արգելելով այլընտրանքային տեղեկատվությունը, հրամցնելով հասարակությանը ակնհայտ սուտ տեղեկատվություն ռազմաճակատից։ Երբ նոյեմբերի 9-ին հայտնի եռակողմ կապիտույացիայի մասին հայտարարությունը հրապարակեց, բնականաբար, քաղաքացիները սկսեցին ընդվզել։ Եթե Փաշինյանի հիշողությունը կարճ է, ես կարող եմ հիշեցնել, որ հենց ամսի 11-ին, երբ առաջին խոշոր հանրահավաքը տեղի ունեցավ Ազատության հրապարակում, հենց այդ օրը բիրտ ուժի կիրառմամբ փորձեցին ցրել, բերման ենթարկել, ձեբակալել քաղաքացիներին։ Մենք ունենք տեղեկատվություն, թե ինչպես է ինքը ցնցումների մեջ ընկել, երբ դատարանը կայացրեց որոշում, որ հավաքների ազատության արգելքը կասեցվում է։ Երբ իրենք հասկացան, որ չեն կարող դիմագրավել դատարանի որոշմանը, կառավարությունը ձեւականորեն հանեց հավաքների ազատության մասին օրենքը»։

Անդրադառնալով ցուցարարների նկատմամբ ոստիկանների կողմից բիրտ ուժ կիրառելուն՝ Մինասյանն ասաց. «Եթե նախկինում հնարավոր էր լինում որոշակի երկխոսության միջոցով գալ ընդհանուր եզրակացության, արդեն մի քանի օր է, հավանաբար դա կապված է կադրային նոր նշանակման հետ, ոստիկանությունն իրեն փորձում է պահել ադրբեջանական ոստիկանության նման՝ հանդեպ հայ ժողովրդի»։