Դավաճանահպատակի անաստված ասպատակությունները

Մի քանի օր է սոցցանցերում կոչեր են հնչում իշխանական շրջանակների կողմից, որ կիրակի՝ դեկտեմբերի 27-ին, ակցիա են որոշել իրականացնել Մայր Աթոռի տարածքում, Վեհափառի դեմ՝ «համահայկական փիլոնազրկում 2020» խորագրով։ Սիսիանում դեկտեմբերի 20-ին տեղի ունեցած դեպքից հետո, երբ Սբ Գրիգոր Լուսավորիչ եկեղեցու հոգեւոր հովիվ Տեր Պարգեւ քահանա Զեյնալյանը հրաժարվեց սեղմել Նիկոլ Փաշինյանի մեկնած ձեռքը՝ այդպիսով արտահայտելով իր քաղաքացիական կեցվածքն ու դիրքորոշումը, կրկին սրվել են եկեղեցի-իշխանություն փոխհարաբերությունները։ Եթե այս միջադեպին էլ գումարենք Վեհափառի՝ Փաշինյանին ուղղված հրաժարականի հորդորը, ապա պատկերն ամբողջական կդառնա;
Մայր Աթոռը Սիսիանի դեպքին արձագանքել էր, որ քահանան նույնպես ՀՀ քաղաքացի է եւ նույնպես կարող է արտահայտել իր քաղաքացիական կեցվածքը, երբ վիրավորված է նրա ազգային արժանապատվությունը եւ վտանգված հայրենիքի անվտանգությունը: Սակայն, ա չմեղմեց բորբոքված կրքերը եւ ակցիայի մասին իրազեկումը լայն թափով շարունակվեց տարածել: Կոչը տարածվում է՝ «Նկարը քաշեք տարեք տարածեք անխնա, բեթմենին պիտի լարենք Մայր Աթոռից», «համահայկական փիլոնազրկում 2020» վերտառությամբ եւ թեգերով, մասնավորապես միմյանց կոչ անելով կիրակի օրը՝ դեկտեմբերի 27-ին, հավաքվել Մայր Աթոռի տարածքում եւ նմանատիպ ակցիա իրականացնել Գարեգին Բ-ի դեմ։
Եւ, ահա, եկեղեցու դեմ բռնության կոչերին ի պատասխան ՀՀ գլխավոր դատախազությունը հանդես է եկել մի անհասկանալի կոչով եւ հորդորում է զերծ մնալ  «վիրավորական, ըստ էության, ատելության խոսքին բնորոշ արտահայտություններից»:
«Հարգանքով մոտենալով օրենքով չարգելված հավաքներ անցկացնելու քաղաքացիական իրավունքի իրացման հետ կապված հարաբերություններին՝ այդուհանդերձ, նման արտահայտությունները, ձևակերպումներն իրենց մեջ պարունակում են այդ ակցիաների ընթացքում հնարավոր բռնությունների, հասարակական կարգի խախտման հանգեցնող, ինչպես նաև ապօրինի այլ գործողությունների էական ռիսկեր:

Հաշվի առնելով այդ հանգամանքը՝ ՀՀ գլխավոր դատախազությունը ինչպես ակցիայի նախաձեռնողներից, այնպես էլ հնարավոր մասնակիցներից պահանջում է զերծ մնալ նման բովանդակությամբ հրապարակային հայտարարություններ անելուց և այդպիսիք արդարացնելուց, ինչպես նաև այնպիսի գործողություններ իրագործելուց, որոնք կարող են խաթարել հոգևոր կենտրոնի և հոգևորականների բնականոն գործունեությունը, ս. Էջմիածին այցելող քաղաքացիների այլ իրավունքները, ոտնահարել և վիրավորել վերջններիս հոգևոր զգացմունքները և կարող են հանգեցնել միջխմբային բախումների»,- ասվում է դատախազության տարածած հաղորդագրությամբ:
Ինչպես տեսնում եք՝ Նիկոլ Փաշինյանի հպատակ Արթուր Դավթյանի ղեկավարած հիմարկում խառն են, ինչպես կասեն՝ շա՜տ խառը: Ու չի հասկացվում՝ սրանց կոչը հայոց պետականության վերջին պատը քանդողների, թե պաշտպանողներին է ուղղված, մարդկանց, որոնք ի պատասխան բարբարոսների հայտարարել են, թե կիրակի լինելու են Մայր Աթոռում թույլ չտալու եկեղեցու դեմ որեւէ ոտնձգություն: Դատախազությունն այստեղ մեկ անելիք ուներ՝ հայտնաբերել կոչը տարածողին ու հասկանալ, թե այդ ինչպես են «լարելու» կաթողիկոսին, պարզ է չէ, որ երգելով կամ արտասանելով չեն անելու եւ սա բռնության սպառնալիքի դասական օրինակ է: Այս հիմնարկում նման մանր հարցերով զբաղվելու թերեւս ժամանակ չունեն, քանզի աչք չեն բացում ընդդիմադիրների դեմ գործեր կարելուց:

Անի Սահակյան