Վարչապետը ցույց է տալիս Սերժ Սարգսյանի կադրային բանկի մտավոր սնանկությունը

Գեղարքունիքի նորանշանակ մարզպետ, ԱԺ-ում հինգ տարի պատգամավոր աշխատած, բայց զրո ելույթ ունեցած Կարեն Բոթոյանին նշանակելիս վարչապետ Կարեն Կարապետյանը նրան էլ ուղարկեց Ամերիկյան համալսարան ուսանելու, ինչպես կարգադրել էր բոլոր մարզպետներին: Մինչ այդ պահը հույս կար, թե տեխնոկրատ Կարեն Կարապետյանը թեթեւի մեջ հումոր էր արել կառավարության անցած շաբաթների նիստերից մեկի ժամանակ՝ հայտնելով մարզպետների ուսուցման ծրագրի մասին, ավաղ, պարզվեց, որ այս ծրագիրն իրական է եւ հայրենի իշխանությունը նորից ծաղրուծանակի առարկա է դառնում: Դեռեւս մայիսի սկզբներին Կարեն Կարապետյանը դժգոհել էր ՏԻՄ մարմինների ղեկավարների, մարզպետների աշխատանքից: «Նախորդ տարեվերջին համայնքների ղեկավարներին տրվել էր համայնքների զարգացման ծրագրի կազմման նոր մեթոդաբանությունը: Բայց համայնքների բնակիչների հետ հանդիպումները փաստում են, որ համայնքների ղեկավարները դրանք շատ քիչ են քննարկել բնակիչների հետ: Արձանագրվել են դեպքեր, երբ համայնքի բնակիչներն առհասարակ տեղյակ չեն դրանց մասին կամ բարձրաձայնում են համայնքի համար կարևոր հիմնահարցեր, որոնք նույնիսկ տեղ չեն գտել այդ ծրագրի մեջ»,- կառավարության նիստերից մեկում հայտարարել է վարչապետ Կարեն Կարապետյանը ու կարևորել համայնքների ղեկավարների ու մարզպետների կրթվելը: Նա տեղեկացրել է, որ Գերմանիայի կառավարության հետ իրականացվող ծրագրի շրջանակներում 250 համայնքների ղեկավարների ուսուցման աշխատանքները պետք է արագացնել: Ամերիկյան համալսարանի հետ պայմանագիր է կնքվել, բոլոր մարզպետները Ամերիկյան համալսարանում համապատասխան դասընթացներ են անցնելու ռեգիոնալ կառավարման վերաբերյալ: Գաղտնիք չէ, որ Հայաստանում կադրային քաղաքականության գլխավոր մոդերատորը մեկ անձ է, հատուկենտ բացառությամբ Սերժ Սարգսյանը կարող է հաշվի նստել ասենք վարչապետի ներկայացրած կադրերի հետ՝ ընդունելով նրանց տարբերակը: Կոնկրետ քննվող նյութում խոսքը մարզպետների մասին է, որոնք նշանակվել են, երբ դեռ Կարեն Կարապետյանը վարչապետ չէ, բացառությամբ մեկի՝ Սյունիքի մարզպետ Վահե Հակոբյանի: Այսինքն՝ մեծ հաշվով մարզպետները բոլորն էլ Սերժ Սարգսյանի կադրերն են: Այսինքն՝ Կարեն Կարապետյանը սույն ծրագրով ցույց է տալիս Սերժ Սարգսյանի կադրային բանկի մտավոր սնանկությունը և փորձում է դրանց կրթել արտասահմանյան ծրագրերից մեկով: Իհարկե սովորել միշտ էլ կարելի եւ պետք է, բայց սա այս դեպքին չի վերաբերում, երբ կառավարման պոստերը, մի ամբողջ ժողովրդի հանձնել են անկիրթ մարդկանց ձեռքին, հետո նոր որոշել նրանց կրթել համալսարաններում: Մեզ մոտ կադրային քաղաքականության չափանիշներն ու սկզբունքները բոլորիս են հայտնի: Նշանակումները տեղի են ունենում ծանոթ-բարեկամ-քավոր-սանիկ-որդի-դուստր եւ այսօրինակ տրամաբանության մեջ: Բա, ո՜նց կլինի պաշտոններ տան ոչ իրենց <<կռուգից>> մեկին, ոչ ՀՀԿ-ականի, ասենք գործից տեղյակ, բանիմաց մեկին, թեպետ ՀՀԿ-ում էլ կարելի է գտնել բանիմաց մարդկանց, որոնք, սակայն, ոչ ամուր թիկունք ունեն, ոչ էլ այնքան միջոց, որ վճարեն այդ պաշտոնի դիմաց: Բայց , ախր, պարոն վարչապետը ծուռը նստենք, դուզը խոսենք, շատ էլ որ մարզպետները Սերժ Սարգսյանի կադրերն են, շատ էլ որ հիմա դուք այնքան էլ լավ չեք իրար հետ ու ուզում եք այսպես ասած <<կեղտեր>> բռնել բոյով-բուսաթով ջիգիթ մարզպետների վրա, բայց մտածել եք ասենք պարոն Բոթոյանին ոնց կրթես, կամ ի՞նչը կրթես մագիստրոս երիտասարդի,ոչինչ, որ տղան թիկնապահից դարձել է պատգամավոր, բայց չէ՞ որ հասցրել է 2011թ. ընդունվել ԵՊՀ միջազգային հարաբերությունների ֆակուլտետի քաղաքագիտության բաժնի մագիստրատուրան ու մագիստրոսի կոչում ստացել: Կամ ասենք ինչը կրթես, գեներալ Աշոտ Ղահրամանյանի, Սանկտ-Պպետերբուրգի ինստիտուտը կարմիր դիպլոմով ավարտած Սյունիքի մարզպետ Վահե Հակոբյանին, էլ չենք խոսում գիտությունների դոկտոր մեծն Լիսկայի մասին: Անի Սահակյան