Պուտինը՝ 2 «քարի» արանքում. Բարեկամն ու հակառակորդը նույն նավից կարող են սադրել

Ռուսաստանցի խաղաղապահները Լեռնային Ղարաբաղի անվտանգության երաշխիքն են դարձել, նրանք վտանգում են իրենց կյանքը` այս տարածաշրջանը խաղաղ կյանք վերադարձնելու համար, երեկ հայտարարեց ՌԴ նախագահ Վլադիմիր Պուտինը:

«Նոյեմբերի 10-ից ռուս խաղաղապահները սկսել են բարդագույն առաքելություն իրականացնել Լեռնային Ղարաբաղում: Նրանց ներկայությունը ռազմական գործողությունների դադարեցման մասին պայմանավորվածությունների կատարման երաշխիք է դարձել»,- երկուշաբթի ասել է Պուտինը ՊՆ կոլեգիայի ընդլայնված նիստին:
Նա պարզաբանել է, որ ռուս խաղաղապահները շատ բան են անում մարդասիրական իրավիճակը բարելավելու և փախստականներին օգնելու, տարածքների ականազերծման և սոցիալական ենթակառուցվածքների վերականգնման, մշակութային, պատմական և կրոնական հուշարձանների պահպանման համար: «Ցավոք, վտանգում են իրենց` ոչ առանց կորուստների, վտանգում են իրենց կյանքը, որպեսզի խաղաղ կյանքը վերականգնվի այդ հողի վրա»,- շեշտել է ՌԴ նախագահը:

Երեկ Արցախում խաղաղապահների թեմային անդրադարձել է նաև Ռուսաստանի պաշտպանության նախարար Սերգեյ Շոյգուն: «Նոյեմբերի 10-ից, համաձայն եռակողմ պայմանավորվածությունների, ռուս զինվորական զորախումբը հաջողությամբ իրականացնում է… գործողություններ Լեռնային Ղարաբաղի տարածքում: Ամենակարճ ժամկետներում ռուսական զորքերի խմբավորումները տեղակայվել են նախանշված վայրերում և անցել առաջադրանքների կատարմանը 23 հսկիչ կետերում: Այսօրվա դրությամբ որևէ լուրջ միջադեպ չի թույլատրվել»,- ասել է Շոյգուն: Նրա խոսքով՝ բաց է քաղաքացիական տրանսպորտների տեղաշարժը Լաչինի միջանցքով, անվտանգությունը պահպանվում է: Բացի այդ, ռուս խաղաղապահների ղեկավարությամբ իրականացվել է ռազմագերիների փոխանակություն «բոլորը բոլորի դիմաց» սկզբունքով: Կազմակերպվել է զոհերի աճյունների փոխանակություն: «Խաղաղ բնակչությունը լիարժեք անվտանգության պայմաններում վերադառնում է բնակության վայրեր, վերականգնում են իրենց տները… Նոյեմբերի 14-ից ռուս խաղաղապահներն ապահովել են ավելի քան 42 հազար փախստականների վերադարձ: Իրականացվում է Լեռնային Ղարաբաղի տարածքների ականազերծում: Ընդհանուր առմամբ ականազերծվել է ավելի քան 6000 պայթյունավտանգ առարկա»,- ասել է նախարարը:

Նա նաև հայտնել է, որ Ստեփանակերտում ռուս խաղաղապահների տեղակայման համար կառուցվել է ժամանակակից 2 մոդուլային հավաքովի ավան՝ նախատեսված 330 մարդու համար: «Մինչև հաջորդ տարվա ապրիլի 1-ը կկառուցվի 32 ավան: Արդյունքում խաղաղապահ զորախմբի համար կստեղծվեն ծառայության և կենցաղի հարմարավետ պայմաններ»,- ասել է Շոյգուն:

Երեկ ՏԱՍՍ լրատվական գործակալությունը, վկայակոչելով Ադրբեջանի ԱԳՆ հաղորդագրությունը, հայտնեց, որ Ռուսաստանի և Ադրբեջանի արտաքին գործերի նախարարներ Սերգեյ Լավրովը և Ջեյհուն Բայրամովն այսօր հեռախոսով քննարկել են նոյեմբերի 9-ի ռուս-հայ-ադրբեջանական եռակողմ հայտարարության կատարման ընթացքը: «Դեկտեմբերի 21-ին տեղի է ունեցել Բայրամովի և Լավրովի հեռախոսազրույցը, նախարարները մտքեր են փոխանակել եռակողմ հայտարարության կատարմանը և երկկողմ հարաբերություններին առնչվող մի շարք հարցերի վերաբերյալ», - ասվում է Ադրբեջանի ԱԳՆ պաշտոնական հաղորդագրությունում: Նախարարներն անդրադարձել են նաև փոխադարձ հետաքրքրություն ներկայացնող տարածաշրջանային խնդիրներին:

Ռուսաստանը ստանձնել է Արցախում խաղաղություն և կայունություն հաստատելու գործին: Եվ այնպես է ստացվել, որ Մոսկվան պարտադրված է պարբերաբար հիշեցնել, թե ինչ կլինի, եթե ռուսական ներկայությունը չլինի Արցախում:

Իրականում եվրոպական պետությունները, Միացյալ Նահանգները խստորեն դեմ են ռուս խաղաղապահների ներկայությանը Արցախում: Այդ մասին պաշտոնական Վաշինգտոնից հստակ արձանագրում եղավ:

Բայց ստեղծվել է մի վիճակ, որ ոչ միայն արևմուտքն է դեմ ռուս խաղաղապահներին, այլև Պուտինի հետ բարեկամության հպարտացող Էրդողանը:

Որ պահից Ռուսաստանի նկատմամբ սաստկանա արևմուտքի դժգոհությունը, չի բացառվում Թուրքիայի միջոցով Արցախում սադրանքները, որը արևմուտքի համար լիովին ընդունելի տարբերակ կլինի:

Հետևաբար, Պուտինն, իրականում ծանր դրության մեջ է. նա Արցախում ռուս խաղաղապահներով կայունություն է փորձում հաստատել, սակայն հայտնվել է արևմուտքի և Թուրքիայի արանքում: Ցանկացած պահի չի բացառվում դավաճանությունը:

Մետաքսյա Շալունց