Պուտինը սպասում է Փաշինյանի պատասխանին. Նոր ռուսական ռազմաբազա է պետք ՀՀ-ում և Արցախում

Նոյեմբերի 9-ին փաստաթղթի համաձայն, հայկական և ադրբեջանական ուժերը մնում են այն դիրքերում, որտեղ կանգնած էին համաձայնագրի ստորագրման գիշերը։ Երեկ ամենամյա մեծ ասուլիսին հայտարարեց Ռուսաստանի նախագահը՝ պատասխանելով ռուս լրագրողի հարցին, թե արդյոք հայկական զինված ուժերը պետք դուրս գան Ղարաբաղի՝ հայկական մնացած հատվածից, և նրանց փոխարինեն ռուս խաղաղապահները, ինչպես կարծում են Ադրբեջանում։

Վլադիմիր Պուտինը նաև անդրադարձել է Արցախի կարգավիճակին՝ շեշտելով հերթական անգամ, որ նույնիսկ Հայաստանը չի ճանաչել Լեռնային Ղարաբաղի անկախությունը, և միջազգային նորմերի համաձայն, Արցախը Ադրբեջանի տարածքն է։

«Հայաստանն ինքը չի ճանաչել Ղարաբաղը, և այս առումով, հաշվի առնելով այս հանգամանքը, Ղարաբաղը միջազգային իրավունքի տեսանկյունից Ադրբեջանի տարածքն է», - ասել է Պուտինը։ Այդուամենայնիվ Ռուսաստանի նախագահը պարբերաբար շեշտում է, այսօր էլ շեշտել է, որ Ղարաբաղի կարգավիճակի հարցը պետք է որոշվի ապագայում։ Այն դեպքում, երբ պատերազմից հետո թե՛ Բաքուն, թե՛ Անկարան հայտարարում են, որ օրակարգում ո՛չ այսօր, ո՛չ էլ ապագայում չկա ու չի լինելու Ղարաբաղի կարգավիճակի հարցը։

Ռուսաստանի նախագահը հերթական անգամ խոսեց մինչև պատերազմը ղարաբաղյան խնդրի կարգավորման հարցում Ռուսաստանի դիրքորոշման մասին, որը հայտնի է որպես «Լավրովի պլան»․ - «Մեր դիրքորոշումը տարիներ շարունակ անփոփոխ էր․ յոթ շրջանները պետք վերադարձնել Ադրբեջանին, իսկ Լեռնային Ղարաբաղի կարգավիճակը թողնել ապագայի համար՝ ֆիքսելով ստատուս քվոն։ Իհարկե՝ ապահովելով Ղարաբաղի կապը Հայաստանի հետ Լաչինի միջանցքի միջոցով»։

ՏԱՍՍ-ի լրագրողը Պուտինին նաև հարցրեց Հադրութում արձանագրված հրադադարի խախտումների, Հադրութի շրջանի հայկական կողմում մնացած գյուղերի հետ կապված միջադեպերի մասին։ Ի պատասխան Ռուսաստանի նախագահը ասաց․ - «Ղարաբաղում հրադադարի խախտումը եզակի է եղել։ Հուսով ենք, որ այդպել էլ կմնա»։

Պուտինը կրկին հայտարարեց, որ Ռուսաստանը հնարավոր է ավելացնի իր խաղաղապահ զորակազմը, բայց միայն կողմերի հետ համաձայնեցնելուց հետո։ Ադրբեջանը, Պուտինի խոսքով, պետք է համաձայն լինի, որ Ռուսաստանն ավելացնի խաղաղապահների թիվը։
Այսպես, Պուտինը առանձնապես չի ծավալվել ղարաբաղյան թեմայի շուրջ, ընդգծել է, թե ամենակարևորն այն է, որ նոյեմբերի 9-ի համաձայնագրով հնարավոր է եղել հաստատել հրադադար և փրկել մարդկանց կյանքեր։

Նա, փրկօղակ է նետել Փաշինյանի համար: Եթե Փաշինյանը ի վիճակի չէ ապահովել Արցախի ու Հայաստանի անվտանգությունը՝ ռուսական ռազմական ներկայությունը պետք է ավելանա, ընդ որում՝ թե՛ Հայաստանում, թե՛ Արցախում:

Ոչ թե նրա համար, որ այդպես ռուսական շահն է պահանջում, այլ որովհետև Փաշինյանը նոյեմբերի 9-ի իր ստորագրությամբ կապիտուլյացիա ստորագրած կողմ է դարձրել Հայաստանին: Ու այսքանից հետո չի կարողանում լուծել Արցախի ու Հայաստանի անվտանգության հարցերը:

Չունենալով համապատասխան հանձնաժողովներ ու դիվանագիտական հարաբերություններ Ադրբեջանի հետ՝ Ադրբեջանը GPS-ով Հայաստանի սահմաններից է արդեն կտորներ պոկում: Հետևաբար՝ ռուսական ռազմական ներկայությունը Հայաստանում պետք է մեծացվի:

Պուտինը կսպասի Փաշինյանի պատասխանին:

Մետաքսյա Շալունց