Անկայունության նոր օջախ. ռուս խաղաղապահներին տարածաշրջանից հանելու պլան է աշխատում

Լեռնային Ղարաբաղում ռուս խաղաղապահների ներկայությունը սպառնում է ապակայունացնել իրավիճակը տարածաշրջանում: Նման հայտարարությամբ է նախօրեին հանդես եկել ԱՄՆ պետքարտուղարի ռազմաքաղաքական հարցերով օգնական Քլարք Քուփերը ճեպազրույցում:

«Նման դեպքերում Ռուսաստանի ներկայությունը սպառնում է ապակայունացմամբ»,- ասել է նա՝ պատասխանելով ադրբեջանցի լրագրողի այն հարցին, թե արդյոք հնարավոր է, որ Վաշինգտոնը տարածաշրջանում դիմակայի ռուսական ազդեցությանը: «Ակնհայտորեն դա մարտահրավեր է բոլոր ներգրավված կողմերի և պետությունների համար,- ասել է Քուփերը:

Նա նաև հավելել է. «Այդ պատճառով ԱՄՆ-ը հատուկ ուշադրություն է դարձնում մարդասիրական իրավիճակի վրա, ինչի մասին նոյեմբերին մասամբ հայտարարել է ԱՄՆ պետքարտուղար Մայքլ Պոմպեոն»: Քուփերը նաև ընդգծել է, որ ԱՄՆ-ը անհրաժեշտ է համարում խաղաղության բանակցությունների անցկացումը ԵԱՀԿ Մինսկի խմբի հովանու ներքո:

Այսպես, այն բանից հետո, երբ Ռուսաստանը պահում է Արցախի մեր հայրենակիցների անվտանգությունը և որոշակի կայունություն Արցախի սահմաններում, հանկարծ, Վաշինգտոնից բարձրաձայնում են ռուսական սպառնալիքի մասին:

Սա առավել, քան ակնհայտ է, որ ռուս խաղաղապահներին տարածաշրջանից դուրս հանելու հստակ ծրագիր է, ընդ որում, այստեղ արևմուտքի ծրագրի շահառուն է նաև Թուրքիան, որն այսօր Ռուսաստանի հետ ցույց է տալիս, իբր թե լիակատար փոխհամաձայնության է եկել Արցախում հաստատված իրավիճակով:

Առավել քան անհայտ է՝ խնդիր է դրված ռուս խաղաղապահներին հեռացնել տարածաշրջանից, որպեսզի հնարավոր դառնա արևմուտքի ծրագիրը:

Ինչպես երևում է, այդ հանցավոր ծրագրի, կամ քարոզչության մաս են կազմում ադրբեջանական և հայկական ինչ-որ շրջանակներ, գուցե՝ ոչ գիտակցաբար: Մյուս կողմից Հայաստանում դա, ըստ էության, իրականացվում է իշխանությունների կողմից սեփական անգործությունը ռուս խաղաղապահների ուսերին դնելու արդյունքում:

Ռուս խաղաղապահները չեն կարող քաղաքական որոշումներ կայացնել, չեն կարող խառնվել ռազմաքաղաքական որոշումների մեջ: Նրանք մեր տարածաշրջանում են կոնկրետ իրենց գործառույթներով, ամեն ինչ դնել նրանց ուսերին՝ ուղղակի աբսուրդ է:
Արցախ եկած ռուս խաղաղապահը չի Հայաստանի Հանրապետության անվտանգությունն ապահովելու, սա պետք է հասկանալ: Իսկ ռուս խաղաղապահներին ռեգիոնից դուրս հանելու կողմնակիցներն են ԱՄՆ-ն, ՆԱՏՕ-ն՝ իր անդամակից Թուրքիայով հանդերձ:

Եթե մենք այսքանը չեն գիտակցում, ուրեմն, շատ շուտով մեր տարածաշրջանը կդառնա անկայունության նոր օջախ: Հետևաբար, Հայաստանում պետք է ձևավորվի այնպիսի իշխանություն, որը շատ արագ Ռուսաստանի հետ պետք է ապահովի Հայաստանի անվտանգությունը՝ ռուսական ռազմական ներկայության մեծացման միջոցով:

Մետաքսյա Շալունց