Օղակը սեղմվում է. գեներալների նախազգուշացումը

Նոյեմբերի 10-ին Հայաստանի, Ադրբեջանի և Ռուսաստանի եռակողմ համաձայնագրի ստորագրումից հետո ծավալվող իրադարձությունները վկայում են, որ իրավիճակը կայունանալու, կարգավորվելու փոխարեն ավելի է սրվում, Հայաստանի Հանրապետության դեմ ուղղված արտաքին և ներքին անվտանգության սպառնալիքներն ուժգին և ակներև են դառնում: Եւ մինչ այս պայմաններում ՀՀ ԱԱԾ-ն շարունակում է ծառայել Արցախը հանձնած եւ թուրքին Սյունիք մտցրած ղեկավարին, կատարում են նրա քաղաքական հրահանգները, զբաղված են ընդդիմադիրներ բռելով, համայնքապետերի վրա գործ կարելով, մինչդեռ պետք է քրեական գործ հարուցեին՝ պատերազմի պարտության մեղավորներին ու քննեին իշխանությանը հասցեագրած անթիվ մեղադրանքները, ԱԱԾ-ի մեկ տասնյակից ավել պահեստազորի գեներալ գնդապետները հանդես են եկել կոչով, որով զգուշացնում են նաեւ, որ հանցավոր անգործության շարունակության պարագայում իրենք գործի կանցնեն:

<<Զինված ուժերում տիրող բարոյահոգեբանական վիճակը, մարտունակությունը, հայ-ադրբեջանական սահմանի ճշգրտման գործընթացն ու պաշտպանությունը, Արցախի Հանրապետությունում հակառակորդի հետ դեռևս տեղ-տեղ բռնկվող բախումները, երկրի կառավարման համակարգի կարևորագույն ոլորտներում դրսևորվող անգործությունն ու անկազմակերպվածությունը, ոչ մասնագիտական մոտեցումները, ընդդիմադիր հայացքներ ունեցող անձանց նկատմամբ բռնաճնշման փորձերը, նրանց կողմից բարձրաձայնված իրական մտահոգություններն անտեսելու, լռեցնելու քաղաքականությունը, ազգային անվտանգության համակարգը ներքաղաքական պարզաբանումների մեջ ներքաշելու փաստը, արտաքին դիվանագիտության ոլորտում պասիվ, անարդյունավետ գործողությունները, նախաձեռնողականության իսպառ բացակայությունը, իրադարձությունների վրա ազդելու փոխարեն սոսկ արձագանքողի դերի ստանձնումը, պատերազմի հետևանքների վերացումը զուտ Ռուսաստանի ղեկավարության վրա թողնելու անհասկանալի մոտեցումը վկայում են այն մասին, որ ստեղծված իրավիճակի արդյունքում պետության անվտանգային ողջ համակարգը խոցելի է դարձել և վտանգված է>>. մասնավորապես նշվում է հայտարարության մեջ:

Նույնիսկ հաշվի չի առնվում այն հանգամանքը, որ Ադրբեջանի և Թուրքիայի ղեկավար անձանց ագրեսիվ հայտարարությունները կարող են իրականություն դառնալ, ինչի արդյունքում պատերազմական գործողությունները կծավալվեն արդեն Հայաստանի Հանրապետության տարածքում՝ հանգեցնելով աղետալի հետևանքների ողջ տարածաշրջանում:

Անդրադառնալով Արցախի դիմաց Ալիեւի կողմից հինգ միլիարդ դոլար առաջարկի մասին վերջին օրերի քննարկումներին, գեներալները հույժ անհրաժեշտություն են համարում այդ հանգամանքի քննությունը.<<Մասնավորապես, մտահոգիչ է Ադրբեջանի և Հայաստանի ղեկավարների միջև եղած կապի արդյունքում միլիարդավոր դոլարների դիմաց Արցախի տարածքների հանձնման շուրջ սակարկությունների վերաբերյալ սպրդած տեղեկատվությունը>>: Ուստի հորդորում են՝ սեղմ ժամկետներում թափանցիկ, հանրությանը մատչելի եղանակներով մանրակրկիտ ուսումնասիրել Ադրբեջանի և Հայաստանի ղեկավարների կապի, նրանց միջև հնարավոր գործարքի վերաբերյալ եղած տեղեկությունները:

<<Եթե ՀՀ իշխանությունները սույն կոչը թողնեն անհետևանք, ապա մեր կողմից կձևավորվի փաստահավաք խումբ՝ փորձառու քննիչների, դատախազների, օպերատիվ աշխատակիցների, փաստաբանների և այլ շահագրգիռ անձանց ներգրավմամբ, և առկա բոլոր միջոցներով կստուգվեն Հայաստանի և Արցախի դեմ հնարավոր դավադիր գործարքի ու դրա հետևանքով պատերազմում դիտավորությամբ պարտվելու վերաբերյալ տեղեկությունները: Բացի այդ, կոչով կդիմենք ՀՀ ԱԱԾ և իրավապահ համակարգի մեր մյուս գործընկերներին՝ որոշելու ստեղծված իրավիճակում իրենց ծառայողական պարտականությունների հետագա իրականացումը շարունակելու նպատակահարմարությունը>>:

Փաստորեն, ԱԱԾ պահեստազորի գեներալները մտադիր են այլընտրանքային ԱԱԾ ստեղծել ու վեր հանել իրականությունը: Նրանք նաեւ իշխանությունների հրաժարականն են պահանջում: Նշենք, որ հայտարարության տակ ստորագրել են ԱԱԾ տնօրենի նախկին ՊԺԿ, պահեստազորի գնդապետ Միքայել Համբարձումյանը, ԱԱԾ տնօրենի նախկին առաջին տեղակալ, պահեստազորի գեներալ-լեյտենանտ Հրանտ Եպիսկոպոսյանը, ԱԱԾ տնօրենի նախկին տեղակալ, պահեստազորի գեներալ-լեյտենանտ Վրեժ Արզումանյանը, ԱԱԾ տնօրենի նախկին տեղակալ, պահեստազորի գեներալ-մայոր Գարեգին Մխիթարյանը, պահեստազորի գեներալ-մայոր Զավեն Նանյանը, պահեստազորի գնդապետներ Գրիգոր Անտոնյանը, Էդուարդ Ղումաշյանը, Արտյոմ Գրիգորյանը, Արթուր Խաչատրյանը եւ այլք:

Անի Սահակյան