Մի քանի տասնյակ կորած զինծառայողների առեղծվածն ու իշխանության սաբոտաժի հրեշավոր վարկածը

Երկօրյա համացանցային տանջանքներից՝ հասարակությանը, վերջապես, այսօր ՊԲ-ն տեղեկացրեց, որ կորել է կապը Հին Թաղերի և Խծաբերդի ուղղությամբ տեղակայված ՊԲ մի քանի մարտական դիրքերի անձնակազմի հետ: Արցախի պաշտպանության նախարարությունը տեղեկացնում է, որ երեկ երեկոյան, դեռևս անհայտ պայմաններում, կորել է կապը Հադրութի Հին Թաղեր և Խծաբերդ գյուղերի ուղղությամբ տեղակայված Արցախի ՊԲ մի քանի մարտական դիրքերի անձնակազմի հետ։

Նախարարությունը նշում է, որ ողջ գիշեր և այսօր առավոտյան շարունակվել են որոնողական աշխատանքները։ «Ռուսական խաղաղապահ զորախմբի միջնորդությամբ գործուն քայլեր են իրականացվում պարզելու հայ զինվորականների գերեվարման հավանականությունը, դրա հաստատվելու դեպքում անհրաժեշտ գործողություններ ձեռնարկելու համար», - ասված է հաղորդագրությունում։ Նախարարությունը նշում է, որ պարբերաբար տեղեկատվություն կտրամադրի որոնողական աշխատանքների ընթացքի վերաբերյալ։

Նշենք, որ արդեն մի քանի օր է, ինչ ադրբեջանական ԶԼՄ-ներում տեղեկություններ ու տեսանյութեր են տարածվում, թե 100 հայ է գերեվարվել Խծաբերդ ու Հին Թաղեր գյուղերի գրավման ժամանակ: Մինչ հասարակությունը ՊՆ-ից սպասում էր հստակ տեղեկատվություն, երեկ ուշ երեկոյան ՀՀ ՊՆ-ն հայտնեց, թե հայ զինվորների գերեվարման մասին տեսանյութերի առնչությամբ ՊԲ-ից պարզաբանումներ է սպասում։

Հայ նոր ռազմագերիների վերաբերյալ տեղեկության շուրջ կապ եմ հաստատել մի շարք մարմինների ու տեղում գտնվող որոշ զինծառայողների հետ, այս մասին հայտնում է Արցախի Մարդու իրավունքների պաշտպան Արտակ Բեգլարյանը։ «Ըստ իմ հավաքագրած նախնական տվյալների՝ Հադրութի շրջանի Խծաբերդ գյուղի ուղղությամբ այս օրերին անհետ կորել է շուրջ 60 զինծառայողից բաղկացած մի ստորաբաժանում, բարձր հավանականությամբ որն էլ երևում է ադրբեջանական կողմի հրապարակած տեսանյութում:

Բացարձակ անընդունելի է այս միջադեպը, որը պետք է արագորեն ու խստորեն քննվի իրավապահ մարմինների կողմից՝ պարզելու համար բոլոր հանգամանքներն ու մեղավորների շրջանակը: ԱՀ և ՀՀ բոլոր լիազոր մարմինները պարտավոր են անհապաղ քայլեր ձեռնարկել մեր բոլոր ռազմագերիներին րոպե առաջ տուն վերադարձնելու ուղղությամբ: Դրանից բացի, անհրաժեշտ է հստակ տեղեկություններ տրամադրել ռազմագերիների հարազատներին և վարել հնարավորինս թափանցիկ հանրային հաղորդակցություն՝ խուսափելու համար ապատեղեկատվություններից ու ավելորդ լարվածություններից», - հայտնում է Արցախի ՄԻՊ-ը։

Իրականում թե՛ Հայաստանում, թե՛ Արցախում մեր հասարակությունը բախվել է համատարած քաոսի, ամենաթողության, անորոշության մի մթնոլորտի: Չկա ոչ մի պատասխանատու, հասարակության հարցերին պատասխանող մի մարմին, որպեսզի հստակ տեղեկատվություն տա, թե ինչ է կատարվում Արցախում շփման գծում:
Այսինքն, կարող ենք արձանագրել, որ ՊԲ-ն չի տիրապետում իրավիճակին, տեղյակ չէ, թե ինչ է կատարվում դիրքերում, որտեղ կամավորները իրենց պարտքն են համարում պաշտպանել հայրենիքը և չեն հաշտվում՝ թշնամուն մետր առ մետր տարածք հանձնելու Փաշինյանի ծրագրի հետ:

Ու հենց այպիսի մարդկանց հետ կապը կորում է ու 2 օր է լիակատար անորոշություն է. ինչպե՞ս, ինչո՞ւ են հայտնվել թշնամու մոտ: Այսինքն՝ մի 44 գերի եք վերադարձնում, հետո 50-60-ի հետ կապը կորցնում ենք, նոր գերինե՞ր ենք թողնում թշնամու մոտ:

Փաշինյանը հարկ էլ չի համարում հանդես գալ պարզաբանությամբ: Ամեն ինչ թողել են ռուսների ուսերին, կարծես նրանք պարտավոր են ամեն սանտիմետրի վրա խաղաղապահ առաքելություն իրականացնել:

Ու ընդհանրապես, ե՞րբ է մեր հասարակությունը կորցնելու Փաշինյանի իշխանության հետ կապը, ինչո՞ւ է դավաճանական ծրագրով Արցախ հանձնած իշխանությունն իրեն կապել այս ժողովրդի հետ:

Այս ամենի մեջ, սակայն, կա նաև մեկ այլ խորքային հարց: Հնարավո՞ր է, որ իշխանությունների անգործությունը, անկազմակերպ վիճակը ծառայում է մեկ այլ հրեշավոր ծրագրի:

Այսպիսի մթնոլորտում Պաշտպանության բանակը կարո՞ղ է իրականացնել նոր զորակոչ, երբ, այսպես ասած, զինադադարի պայմաններում տասնյակ գերիներ են հայտնվում թշնամու կողմում: Իշխանությունը շատ հանգիստ կարող է ասել՝ ահա, տեսեք, մարդիկ չեն ցանկանում գնալ ծառայելու, իսկ արդյունքում ավարտին հասցնի դավաճանական իր ծրագիրը: Սա ևս վարկած է, որը չի կարելի բացառել:

Մետաքսյա Շալունց