Հերթական ձախողված պարտիան, ով շահեց, ով տուժեց

Արդեն հայտնի է, որ ձերբակալվել են մաքսային միջնորդական /բրոքերական/ ծառայություններ իրականացնող ՍՊԸ-ի տնօրենը և ՀՀ ԿԱ ՊԵԿ «Բավրա» մաքսակետի պետը՝ Երեմ Մարգարյանը:Նա այդ պաշտոնում նշանակվել էր ՊԵԿ նախագահ Վարդան Հարությունյանի կողմից՝ 2016 թվականի դեկտեմբերին: Այս ձերբակալությունը երեկվանից, երբ հայտնի դարձավ ձերբակալության փաստը, լրատվական տիրույթում վերլուծությունների նյութ է դարձել: Համարում են, որ սա հարված էր վարչապետ Կարեն Կկարապետյանին, սառը ցնցուղ վերջինիս համար, թափանցիկ ակնարկ, որ նրա նշանակած կադրերն էլ սուրբ չեն: Այդ վերլուծությունների հիմքում այն փաստն է, որ Մարգարյանը նշանակվել է Վարդան Հարությունյանի պաշտոնավարման ժամանակ, վերջինիս կողմից: Իսկ Հարությունյանը Կարեն Կարապետյանի ամենահավատարիմ եւ սիրելի կադրերից է, նա գործադիր տեղափոխվեց Գազպրոմից, որը ղեկավարում էր: Ավելին, թողնելով մոտ 30 հազար դոլարանոց ամսական աշխատավարձը նա եկավ՝ կանգնելու վարչապետի կողին: Հիշեցին նաեւ, որ դեպքը ՊԵԿ-ին վերաբերվող արդեն երկրորդ աղմկահարույց դեպքն է ադրբեջանական խնձորների մատակարարումից հետո, որի առիթով բարձրացած աղմուկը դեռ չի մարել եւ այդ բացթողումը վերագրվում է կրկին ՊԵԿ-ի ղեկավարությանը: Լրատվամիջոցները արխիվներից հանեցին ձերբակալվածի անցյալի աղմկոտ էջեր՝ էլ ավելի համոզիչ դարձնելու Կարեն Կարապետյանի ձախողած գործունեությունը: Ըստ այդ նյութերի՝ 2010-2011 թվականներին Երեմ Մարգարյանը երկօրյա սեմինար է կազմակերպել Ալրաղացի Լյովիկի «Ախթամար» հյուրանոցային համալիրում: Սակայն հրահանգվել է սեփական մեքենաներով չգալ: Հյուրանոց ժամանելուց հետո հյուրերն անակնկալի են եկել՝ տեսնելով, որ սեմինարի մասնակից մոտ 40 բաժնի պետերը պետք է գիշերեն երկու հոգով՝ մեկ մահճակալի վրա:Սա դուր չէր եկել աշխատակիցներին, իսկ սեմինարի կազմակերպիչը գիշերը բուռն «ջակուզի փարթի» էր կազմակերպել, վերջում էլ մոռացել ջուրը փակել: Արդյունքում ջուրը հոսել էր՝ վնասել հյուրանոցային համալիրի շենքը: Ջակուզիում զվարճացածների հետ հաշվեհարդար տեսնելու համար դեպքի վայր էին ժամանել Ալրաղացի Լյովիկի մարտիկները, բայց ՊԵԿ ղեկավարությունը թույլ չէր տվել նրան կպնել: Դեպքից որոշ ժամանակ հետո էլ առհասարակ հյուրանոցը փակվեց: Բայց մինչ Կարեն Կարապետյանի քաղաքական հակառակորդները պյուրոսյան հաղթանակ էին տոնում,չուշացավ Կարեն Կարապետյանի պատասխանը՝ կրկին լրատվական միջոցներով, որոնք հիշեցրեցին, որ իր կարիերայի համար Երեմ Մարգարյանը պարտական է ՊԵԿ նախագահի նախկին տեղակալ Արտաշես Բեյբությանին: Հենց վերջինս է եղել նրա հովանավորը տարիներ շարունակ:2012 թվականին Բեյբությանը ազատվել է այդ պաշտոնից, եւ հիմա զբաղեցնում է առողջապահական պետական տեսչության Երեւանի տարածքային կենտրոնի պետի պաշտոնը: Բեյբությանի հովանավորն էլ, ըստ շրջանառվող տեղեկությունների Սերժ Սարգսյանի թիկնազորի պետ Վաչե Ղազարյանն է: Մի խոսքով՝ պարզվեց, որ իրականում «Բավրա» մաքսակետի ձերբակալված պետը Սերժ Սարգսյանի թիկնազորի պետի հովանավորյալի հովանավորյալն է: Այն, որ Վաչե Ղազարյանն է ՊԵԿ-ում եղանակ թելադրողը, դրա մասին գիտեն բոլոր, գիտեն նաեւ, որ ՊԵԿ-ում եւ հատկապես մաքսակետի պաշտոնում որեւէ պատահական մարդ չի կարող հայտնվել: Համակարգն ամբողջությամբ մենամարձր օղակի հսկողության ներքո է գործում, նշանակումները եւս: Այնպես որ Էդուարդ Շարմազանովը, հիրավի, չէր սխալվում ՀՀԿ ԳՄ երեկվա նիստում հայտարարելով, որ բոլոր ՀՀԿ-ականների, այդ թվում վարչապետ Կարեն Կարապետյանի քաղաքական ղեկավարը Սերժ Սարգսյանն է, եւ դա քննարկման ենթակա չէ: Միայն թե այս ամենից հետո էլ ավելի ծիծաղելի է դառնում Շարմազանովի այն հայտարարությունը, որ Կարեն Կարապետյանի եւ Սերժ Սարգսյանի միջեւ հակասություն չկա: Վերջին բոլոր գործընթացները այդ հակասությունների մասին են փաստում: Շաբաթներ առաջ էլ փորձ էր արվում ռուսատանաբնակ Ռուբեն Թաթուլյանի` Ռոբսոն մականունով, ձերբակալությունը <<կոտրել>> Կարեն Կարապետյանի վրա, Ռոբսոնը մեկն է այն գործարարներից, որը Կարեն Կարապետյանի ներդրումների խմբակի անդամ է: Սակայն այդ ձերբակալության ժամանակ էլ լրատվամիջոցներում հրապարակվեցին Ռոբսոնի եւ Սերժ Սարգսյանի ներկայությամբ՝ տարիներ առաջ արված համատեղ լուսանկարը: Ստացվում է, որ Սերժ Սարգսյանը Կարեն Կարապետյանի դեմ պայքարում հերթական ռաունդն է պարտվում: Վերջապես ՊԵԿ-ում Երեմ Մարգարյանով չի ավարտվում ապօրինի պաշտոնյաների շղթան, իսկ համակարգը առողջացնելու մտադրություն կա, ապա պետք է ձեռնարկել շղթայական ձերբակալություններ, որպեսզի արժանահավատ դառնան համակարգն առողջացնելու մղումները: Անի Սահակյան