Նիկոլի ջախջախած ու անբարեկամ Հայաստանը. Հարևանների ձայնը
Ռուսաստանի արտգործնախարար Սերգեյ Լավրովը RT հեռուստաընկերությանը տված հարցազրույցում այսօր անդրադարձել է Մոսկվայի հասցեին վերջին շրջանում Արևմուտքից հնչող մեղադրանքներին՝ պնդելով, որ դրանց զգալի մասը վերաբերում է հետխորհրդային տարածքում ծավալվող ճգնաժամերին։
«Վերջին շրջանում մեզ մեղադրում են, թե մենք միջամտում ենք Բելառուսի ներքին գործերին, մեղադրում են նաև, որ մենք միջամտել ենք Լեռնային Ղարաբաղում բացառապես մեր աշխարհաքաղաքական դիրքերն ամրապնդելու համար՝ ընդդեմ Արևմուտքի», - նշել է Ռուսաստանի դիվանագիտական գերատեսչության ղեկավարը։
Լավրովը նաև ասել է․ - «Պնդումներ են հնչում նաև, որ մենք իբր պայմանավորվել ենք Թուրքիայի հետ [Հարավկովկասյան] տարածաշրջանը բաժան-բաժան անելու մասին՝ միայն թե այնտեղ չամրապնդվեն Արևմուտքի դիրքերը»։ «Այսպիսի տրամաբանություն և հոգեբանություն է այժմ տիրում ԱՄՆ-ում և Եվրոպայում գործող առաջատար վերլուծաբանների մոտ», - հայտարարել է Ռուսաստանի արտգործնախարարը։
Իրականում, պատերազմում Փաշինյանի իշխանության տարած պարտության արդյունքում մենք հայտնվել ենք իսկապես բարդ իրավիճակում: Գերտերությունները մշտապես ունեցել են իրենց շահերը և շարունակելու են սպասարկել այդ շահերը:
Հիմա ստեղծվել է մի իրավիճակ, երբ մենք պետք է իսկապես ընտրություն կատարենք՝ աշխարհաքաղաքական տեսանկյունից: Կամ՝ Ռուսաստանի հետ ամրապնդում ենք Հայաստանը, կամ դառնում թուրքական գավառ: Էրդողանի նպատակները շատ հեռուն գնացող են՝ Վրաստանի, Իրանի նկատմամբ էլ գոյություն ունեն հավակնություններ:
Այս վիճակում, ինչ է մնում Հայաստանին՝ քան Ռուսաստանի հետ հարաբերությունները նոր մակարդակի բարձրացնելը, ինչը Փաշինյանը ոչ միայն չի կարող, այլև նրա կառավարող արտաքին ուժերը՝ թույլ չեն տա:
Պատահակա՞ն է, որ այսօր Հայաստանի երկու մյուս հարևանները՝ Իրանն ու Վրաստանն էլ են հստակ Ադրբեջանին պաշտպանում:
Պաշտոնական Թեհրանը ողջունում է Ադրբեջանի տարածքային ամբողջականության վերականգնումը, երեկ երեկոյան Twitter-ում գրել է Իրանի արտաքին գործերի նախարար Մոհամադ Ջավադ Զարիֆը՝ իր ադրբեջանցի պաշտոնակից Ջեյհուն Բայրամովի հետ բանակցությունների ավարտին։
«Ջեյհուն Բայրամովի հետ արդյունավետ քննարկումներ ունեցանք երկկողմ հարաբերությունների խորացման՝ մասնավորաբար պատերազմից տուժած տարածքների վերականգնման,Հարավ-Հյուսիս տրասնպորտային միջանցքի և կասպիական էներգակիրների շուրջ», - գրել է Զարիֆը։ Թեհրան այցի ընթացքում Ադրբեջանի արտգործնախարարը հանդիպել է նաև երկրի նախագահ Հասան Ռոհանիի և Իրանի Ազգային անվտանգության խորհրդի քարտուղար Ալի Շամխանիի հետ։ Ադրբեջանական դիվանագիտության ղեկավարի հետ հանդիպման ժամանակ Շամխանին նշել է․ - «Թեհրանը կոչ է անում տարածաշրջանի պետություններին կանխել ապակայունացման և անկարգությունների նոր կետերի ձևավորումը»։
Ո՞ւր են Փաշինյանի դիվանագիտական արդյունքները Թեհրանի ու Թբիլիսիի հետ: Փաշինյանը Հայաստանին տարավ կապիտուլյացիայի ոչ միայն ռազմի դաշտում, այլև դիվանագիտական ճակատում:
Մետաքսյա Շալունց
Հետևեք մեզ Viber-ում
