Կինոն դեռ նոր է սկսվում

Եթե կարծում եք Փաշինյանի կողմից նոյեմբերի 10-ին ստորագրված համաձայնագիրը վերջին վատությունն էր Արցախին ու Հայաստանին, չարաչար սխալվում եք...

Կինոն դեռ նոր է սկսվում...

Անհրաժեշտ է ազնիվ լինել ինքներս մեզ հետ և լիարժեք պատասխանատվությամբ ընդունել պարտությունը, երեկ այս մասին ԱԺ հայտարարությունների ժամին հայտարարեց ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը։ «Պետք է հասկանալ, որ կատարվածն այլ կերպ հնարավոր չէ անվանել։ Պարտվել ենք թե՛ ռազմի դաշտում, թե՛ բարոյապես, թե՛ հոգեպես։ Հասկանալի է, որ պարտված լինելու փաստը լրացուցիչ բարդույթներ է առաջ քաշելու, սակայն պետք է հնարավորինս արագ դուրս գալ բարոյալքված վիճակից ու քայլեր նախաձեռնել։ Հաջորդ քայլով, պետք է լինի պատասխանատվության աստիճանական գիտակցումն ու ընկալումը։ Ի վերջո, պետք է փորձել երկխոսություն սկսել հաղթող կողմի հետ, որքան էլ դա ծանր լինի։ Խոշոր մասշտաբների պատերազմներից վերականգնված գրեթե բոլոր երկրներն անցել են այս ճանապարհով»,- խորհուրդ տվեց Անդրանիկ Քոչարյանը:

Նա նաև հավելեց, թե երկկողմ դիվանագիտական հարաբերությունների հաստատումը կարող է փոխել սպասվող հեռանկարները. «Դիվանագիտությունը պետք է հիմնված լինի տնտեսական, ռազմական և բարոյահոգեբանական բոլոր հնարավոր ռիսկերի գնահատման վրա»:

Ուրեմն, կապիտուլյացիայի փաստաթուղթ ստորագրելուց հետո, երբ Ադրբեջանի ներկայացուցիչները պարբերաբար հայտնվում են Հայաստանի տարածքում, մեկ այս հատվածի հանդեպ են հավակնություններ ցույց տալիս, մեկ այն՝ Փաշինյական իշխանության ներկայացուցիչը խորհուրդ է տալիս՝ փորձել «երկխոսություն սկսել հաղթող կողմի հետ»:

Իսկ գուցե պայման դնեիք «հաղթող կողմի» առջև՝ մինչև ռազմագերիներին չվերադարձնեք՝ ոչ մի սահմանազատում: Չէ, ինչ կարիք կա...

Բոլոր խաղերը խաղացել, ավարտել էինք, մնացել էր՝ Ադրբեջանի ու Թուրքիայի հետ առևտուրը, երկխոսությունը, երբ դեռ Հայաստան-Ադրբեջան սահմանները չեն ճշգրտվել:

Այսինքն, Անդրանիկ Քոչարյանն առաջարկում է դիվանագիտական հարաբերություններ հաստատել Ադրբեջանի հետ: Իսկ ի՞նչ է դա նշանակում... Նշանակում է՝ ճանաչել Ադրբեջանի տարածքային ամբողջականությունը և վերջակետ դնել ամեն ինչի վրա:

Իսկ կարելի՞ է իմանալ՝ Արցախը, այսինքն այն, ինչ մնացել է Փաշինյանի ստորագրած փաստաթղթից հետո՝ դա էլ է Ադրբեջանի՞նը: Միանգամից ասեք՝ դա էլ իմանանք:
Եվ նման հայտարարությունների ֆոնին զարմանալի՞ է, որ թուրքական հեռուստաեթերում «ադրբեջանաթուրքական Զանգեզուրով» պատկերված քարտեզներ են հայտնվում:

Մետաքսյա Շալունց