Սերժ Սարգսյանի կասկածելի խաղը
Երեկ հայտնի դարձավ, որ Հանրապետության նախագահ Արմեն Սարգսյանը հանդիպում է ունեցել Հայաստանի Հանրապետության երրորդ նախագահ Սերժ Սարգսյանի հետ: Քննարկվել է երկրում ստեղծված իրավիճակը:
Թե ինչ կարող էր հետպատերազմական ժամանակներում քննարկել Սերժ Սարգսյանը ՀՀ նախագահի աթոռին նստած պետության թիվ մեկ տուրիստի կամ դիտորդի հետ, թերեւս պետք է մանրամասն պարզաբանի ինքը, սակայն այս հանդիպումից արդեն իսկ կասկածելի գործարքի հոտ է գալիս։
Արմեն Սարգսյանի պաշտոնավարման մոտ երեք տարիների ընթացքում հանրությանը պարզ դարձավ, որ այս մարդու համար հայրենիքը նախ և առաջ սեփական հարմարավետությունն ու շահն են։ Ամենասկզբից արդեն կասկածելի էր, թե ինչու է Սերժ Սարգսյանի ընտրությունը կանգ առել Արմեն Սարգսյանի վրա, ով բացի այն, որ չուներ նախագահի պաշտոնին համապատասխան փաստաթղթեր, այլեւ տարիներ առաջ Վազգեն Սարգսյանի կողմից հայտնի պատճառներով վտարվեր էր Հայաստանից։
Բայց Սերժ Սարգսյանին հաջողվեց կեղծ թղթերով նրան նախագահ դարձնել, չգիտես ինչու այդ փաստի վրա աչք փակեց նաեւ Արցախն այսօր հանձնած Նիկոլ Փաշինյանը։ Թվում էր, թե Սերժին մերժելուց հետո նա անցնելու է իր կողմից «նե նաստայաշի» ցար որակված Արմեն Սարգսյանի մերժմանը, բայց դա միայն թվում էր։ Անցնող երկուսուկես տարվա ընթացքում մենք տեսանք Նիկոլ-Փաշինյան-Արմեն Սարգսյան աննախադեպ հանցակցություն, Արմեն Սարգսյանն աչք էր փակում երկրում ընթացող հակաօրինական, հակաիրավական, Արցախը կործանման տանող բոլոր գործընթացների վրա։ Նրա եղկելի լռությունն այնքան վտանգավոր էր, որ ինչ-որ պահից Արմեն Սարգսյանին քննադատելու առաջնորդությունը ստանձնեցին իրենք ՀՀԿ-ականները։ Իսկ քննադատության պատճառ որքան ուզեք՝ նա լռեց երկիրը սեւ ու սպիտակի բաժանելու ժամանակ, լռեց դատարանները շրջափակելու ժամանակ, չխոսեց ՍԴ-ի դեմ տարվող այլանդակ արշավի ընթացքում, ստորագրեց իր լիազորությունները կրտող օրենքը, որն իրեն դեմ էր տվել Նիկոլ Փաշինյանը, մի խոսքով պարում էր Նիկոլ Փաշինյանի դուդուկի տակ։ Նույնիսկ պատերազմի օրերին։ Այս մարդը մասնակցում էր ԱԽ ընդլայնված նիստերին եւ լսել էր ԶՈՒ շտաբի պետ Օնիկ Գասպարյանի կարծիքը պատերազմն անհապաղ դադարեցնելու մասին, նա լսում էր նաեւ պաշտոնական սուտը, որով 44 օր խաբեցին հանրությանը, բայց այս դավադիր ընթացքը կանխելու որեւէ փորձ չարեց, որեւէ անգամ Նիկոլ Փաշինյանին կանգնեցնելու կոչ չարեց։ Ավելին, չի կարելի ասել, թե այս դավաճանությանը նա հետեւել է իր պասիվ դիտորդի դիրքերից։ Այս մարդու դեմ խոսուն փաստեր կան, որքան էլ նա հերքի Բրիթիշ Պետրոլիումի հետ իր կապը, իրականությունն իր օգտին չի խոսում։ Հակառակը մենք լսում են զինվորականներից, ովքեր պատմում են, որ այդ օրերին քննարկվել է ադրբեջանական նավթամուղին հարվածելու հեռանկարը, որը կարող էր էականորեն փոխել պատերազմի ընթացքը, բայց Հայաստանի քաղաքական ղեկավարությունը նման թույլտվություն չի տվել։ Իսկ միգուցե այստեղ Արմեն Սարգսյանի գործոնն է դեր խաղացել, միգուցե նրան էլ է բաժին հասել այն միլիարդներից, որոնք վճարել են Արցախւ ծախելու համար։ Ինչեւէ, թվում էր, թե այսքանից հետո Նիկոլ Փաշինյանի հրաժարականից հետո հաջորդ քայլը պետք է լինի Արմեն Սարգսյանին երկրորդ անգամ երկրից վտարելը, բայց այս պայմաններում հանկարծ իմանում ենք, որ նրա եւ Սերժ Սարգսյանի միջեւ հանդիպում է կայացել։ Ինչ նոր խաղ է սկսել Սերժ Սարգսյանը, առայժմ հայտնի չէ։
Անի Սահակյան
Հետևեք մեզ Viber-ում
