7 շրջաններ՝ 5 միլիարդի դիմաց. Որքա՞ն է եղել Փաշինյանի գինը

Եվ այսպես, Հայաստանի երրորդ նախագահի գրասենյակը չհերքեց երեկ համացանցում տարածված ձայնագրության իսկությունը՝ այսօրվա հայտարարությունում նշելով, որ հասկանալի չէ, թե ինչպե՞ս է դեռևս 2016 թվականի հոկտեմբերի 14-ին Երևանում կայացած ՀԱՊԿ հավաքական անվտանգության խորհրդի նստաշրջանի՝ նեղ կազմով նախագահների հանդիպման ոչ հրապարակային զրույցը հայտնվել համացանցում։

Սերժ Սարգսյանի գրասենյակը ձայնագրության հրապարակումն ընդունում է որպես փաստ և զերծ է մնում մեկնաբանություններից` նկատի առնելով այն հանգամանքը, որ փակ ձևաչափով անցկացված նիստերը մեկնաբանման ենթակա չեն, ինչպես չեն եղել մինչ այժմ:

Հիշեցնենք, երեկ Տելեգրամի «Բաղրամյան-26» ալիքում տեղադրվել էր մի ձայնագրություն, որում Բելառուսի նախագահ Ալեքսանդր Լուկաշենկոն 2016-ին Հայաստանի նախագահ Սերժ Սարգսյանին առաջարկում է Ադրբեջանին հանձնել Լեռնային Ղարաբաղին հարակից յոթ շրջանները՝ առաջին փուլում հինգ միլիարդ, հավանաբար, դոլարի դիմաց, ի պատասխան Սարգսյանը պատրաստակամություն է հայտնել վճարել վեց միլիարդ՝ եթե Ալիևը հրաժարվի այդ շրջաններից։

Մոտ երկու րոպեանոց, ըստ ամենայնի, ոչ ամբողջական ձայնագրությունում Սերժ Սարգսյանը նշում է, թե չի կարող շրջանները հանձնել, որովհետև Արցախում բնակվող 150 հազար հայերի անվտանգության հարց կա, Լուկաշենկոն պատասխանում է, թե կարելի է 20 հազար խաղաղապահ ուղարկել անվտանգության ապահովման համար։ «Ինչո՞ւ պետք է հենց այնպես տալ այդ տարածքները, չեմ հասկանում»,- հարցնում է Սերժ Սարգսյանը։ «Ինչպե՞ս թե հենց այնպես... ինքը կվճարի, ինքը քեզ առաջարկել է հինգ միլիարդ առաջին փուլում», - պատասխանում է Լուկաշենկոն։ Հայաստանի երրորդ նախագահն էլ հակադարձում է, թե պատրաստ է վճարել վեց միլիարդ, եթե Ալիևը հրաժարվի այդ յոթ շրջաններից։

Ի վերջո, Սերժ Սարգսյանը հայտարարում է, թե չի կարող զիջել յոթ շրջանները, որովհետև հինգ հազար մարդ է զոհվել դրանց համար մարտերում։

Իրականում, ձայնագրությունը պետք է քննության առարկա դառնա այն առումով, որ Ադրբեջանի հակառակորդ պետության ղեկավար Ալիևը, փաստորեն, անուղղակիորեն Հայաստանի ղեկավարությանը դրամական «առաջարկներ» է արել՝ 7 շրջանների դիմաց՝ ներգրավելով այդ պրոցեսում իր ընկեր Բատկային:

Սա մի փաստ է, որը լրացուցիչ անգամ ապացուցում է Ալիևի իշխանության «նավթադոլարային» մղումները, բոլորին «գնելու» խառնվածքը:

Բայց սա հարցի մի կողմն է: Հիմա ամենակարևոր հարցը, որը երեկվանից պտտվում է համացանցում: Եթե Ալիևն այս որակի ղեկավար է, բնական է, որ «խաղաղասեր» Փաշինյանին էլ առաջարկած կլինի «նվեր», «պարգևներ»՝ 7 շրջանի դիմաց:
Իսկ հիմա՝ պատերազմից հետո Ալիևը ստացել է ավելին, քան 7 շրջանները, ու հիմա տրամաբանական հարց է ծագում՝ ինչի՞ դիմաց:

Դրա համա՞ր էր 2 ու կես տարի Փաշինյանը շարունակ մի «երգ» երգում՝ «լուծումը պետք է ընդունելի լինի նաև Ադրբեջանի համար»...

Հիմա այնպես է ստացվել, որ «լուծումը» ընդունելի է միայն Ադրբեջանի համար, ուրեմն Հայաստանի հասարակությունը կարող է արդարացի հարց բարձրացնել՝ Փաշինյան, ինչի՞ դիմաց, կամ՝ ինչքանո՞վ ես հանձնել 7 շրջաններն և Շուշին ու փաստաթուղթ ստորագրել..

Մետաքսյա Շալունց