Նեռն իր գործն արեց, նեռը չի հեռանում

Վազգեն Մանուկյանին Հայրենիքի փրկության շարժման վարչապետի թեկնածու առաջադրելուց հետո որոշ շրջանակներ ակտիվորեն լծվել են նրա համբավն արատավորելու և կեղտոտ տեխնոլոգիաներով նրա անվան շուրջ հակաքարոզչություն իրականացնելու գործին։Եւ հատկապես ակտիվ են առաջին նախագահի մերձ շրջապատն ու նրա թիմը: Լեւոնականներ մի քանի օր է չեն հանդարտվում, թվում էր, թե Արցախը հանձնելու գաղափարի կնքահայր Լեւոն Տեր Պետրոսյանը պետք է հիմա հանգիստ շունչ քաշեր, քանզի իր հոգեւոր զավակն իրականություն է դարձրել իր վաղեմի երազանքը, թվում էր, թե նեռն իր գործն արեց ու պիտի հեռանար, բայց այս մարդը ոչ մի ձեւ չի խաղաղվում եւ երկճակատ խաղ է տանում այսօր: Մի կողմից իբր քննադատում է Նիկոլ Փաշինյանին, թե այս ինչ փաստաթուղթ է ստորագրել, իրենք ընդամենը 7 տարածքի հանձնման , թուրքի հետ քիրվայության կողմնակիցն են, մյուս կողմից՝ Նիկոլ Փաշինյանի քննադատներին ու մրցակիցներին: Այս անհանգիստ նոպաներից մի տեսակ տպավորություն է ստեղծվում, որ դեռ կիսատ մնացած գործեր կան, որ պետք է Նիկոլ Փաշինյանն ավարտին հասցնի, դրա համար էլ լեւոնականները ավելի շատ ընդդիմությանն են քննադատում:
Երեկ իր խոսքն ասաց անձամբ Լեւոն Տեր-Պետրոսյանը: Նա երկար-բարակ փորձեց նմանություն գտնել Վազգեն Մանուկյանի եւ Նիկոլ Փաշինյանի միջեւ, որպեսզի իր ողջ ասելիքը, կոչն անի, այն է՝ քաղաքացիական պատերազմից ու հնարավոր բախումներից զերծ մնալու համար ընդդիմությանը կոչ անի ոչինչ չանել, իսկ իշխանությանը՝ սահմանադրական ճանապարհով հրաժարական տալ։
<<Թող տպավորություն չստեղծվի, թե այս հոդվածով ես հակադրվում եմ Վազգեն Մանուկյանին և աջակցություն հայտնում Նիկոլ Փաշինյանին: Նկատի ունենալով Հայաստանին և Արցախին բաժին ընկած խայտառակ ու նվաստացուցիչ պարտությունը, Փաշինյանի վարչակարգն անպայման և անհապաղ պետք է հեռանա: Բայց ոչ թե ներազգային բախումների, այլ բացառապես սահմանադրական ճանապարհով, ինչը պատիվ կբերի հակամարտող երկու կողմերին էլ: Ուստի կոչ եմ անում մեր ժողովրդին` մասնակիցը չդառնալ թե՛ գործող իշխանության, և թե՛ ընդդիմության հրահրած զանգվածային գրգռություններին, որոնք, բացի քաղաքացիական պատերազմի սպառնալիքից, չափազանց վտանգավոր են նաև կորոնավիրուսի տարածման անկառավարելի դառնալու նկատառումով: Անհուսալիորեն սպասում եմ նաև, որ մեր մտավորականությունը գոնե մեկ անգամ հանդես կգա իր սթափեցնող խոսքով>>, իր հոդվածում գրել է նա:

Ինչ խոսք, այլեւս անիմաստ է զարմանալ այս մարդու չարության վրա, մինչդեռ պետք է լիներ ակառակը եւ Վազգեն Մանուկյանը պետք է հիշաչար գտնվեր Տեր-Պետրոսյանի նկատմամբ իրենից ընտրված իշխանությունը խլելու համար, ուստի առաջին նախագահին պարզապես կհիշեցնենք 2008 թ-ին Ձեր կողմից առաջնորդվող ընդդիմության հանրահավաքների ընթացքում տեղի են ունեցել արյունալի բախումներ՝ Երևանի կենտրոնում, որի հետևանքով զոհվեցին 10 մարդ, ի՞նչ է այդ ժամանակ դուք չէի՞ք մտածում պետականության պահպանման մասին։ 2008 թ-ին Ձեր կողմից առաջնորդվող հանրահավաքների ժամանակ, միտինգավարը՝ ներկայիս վարչապետ Նիկոլ Փաշինյանը մարդկանց հրահրում էր բախումների։ Ինչն՞ էր պատճառը, որ դուք չկանխեցիք այդ բախումները։

Անի Սահակյան