Գողական աշխարհի անդորրը խախտվում է
Երեկ լրատվամիջոցներից մեկն ահազանգ հնչեցրեց, որ մահափորձ է իրականացվել միանգամից երկու հեղինակությունների նկատմամբ՝ Արթուր Ասատրյանի՝ հանրությանն առավել հայտնի Դոն Պիպոյի, ինչպես նաև Արամ Վարդանյանի՝ Վստրեչի Ապերի:NewsBook-ին, մասնավորապես, հաջողվել էր պարզել, որ հեղինակությունները չեն տուժել։ Լուրից ժամեր հետո չուշացավ ոստիկանության հաղորդագրությունը, որից պարզ է դառնում, որ չնայած հարայ-հրոցի՝ մահափորձ չի իրականացվել, ոստիկանները կանխել են չարագործների պլանները, հայտնաբերելով քիլլերներին եւ նրանց որջը ձերբակալել են երեք հոգու։Ահազանգի հետքերով ոստիկանությունը հայտնաբերել է Դոն Պիպոյի տան հարեւանությամբ վարձակալած տունը, որտեղ քիլլերները զենքի մեծ արսենալ են ունեցել։ Երկու հեղինակությունների նկատմամբ ծրագրավորվող պլանի պատվիրատուների մասին նույնպես ինֆորմացիա կա՝ նույնպես անանուն աղբյուրից։ Ըստ այդմ՝ խոսքը Արտյոմ Հարությունյանի մասին է, որը քրեական աշխարհում հայտնի է որպես Արտյոմ Կանևսկո: Նա շաքարային դիեբատից 2010 թվականին մահացած «օրենքով գող» Արմեն Կանևսկոյի եղբայրն է: Եղբայրների անունը շրջանառվում է բազմաթիվ աղմկահարույց պատմությունների շրջանակներում: Եւ այսպես, ով է Դոն Պիպոն։ Էջմիածնում ծնված ու մեծացած Արթուր Ասատրյանին բախտի անիվը տեղափոխել է Իտալիա, որտեղ էլ հիմա նա ապրում է։Ավելի ճիշտ՝ դեռեւս 90-ականներին էջմիածինցի Արթուրը գեներալ Մանվել Գրիգորյանի հետ կոնֆլիկտի մեջ մտնելով և չկարողանալով հարթել իրավիճակը, լքել է հարազատ քաղաքը, տեղափոխվել Մոսկվա: Սակայն Մոսկվայում ևս երկար չի մնացել, իսկ պատճառը կրկին կոնֆլիկտն էր, այս անգամ հայազգի «օրենքով գող» և մեծ հեղինակություն Արմեն Կանևսկու հետ։ Դոն Պիպոյին ստիպել են լքել Մոսկվան: Միայն Դեդ Հասանի մահից հետո, Պիպոն կարողացել է վերադառնալ Մոսկվա՝ այն էլ միջնորդությամբ: Միջնորդողը հանդիսացել է Ռուսաստանի Դաշնությունում ՀՀ դատախազության ներկայացուցիչ մեծահարուստ Կամո Ավակումյանը: Դոն Պիպոն խոշոր ձեռնարկատեր է, ունի հյուրանոցների և սրճարանների մեծ ցանց Մոսկվայում, Իտալիայում և Եվրոպայում: Մի քանի տարի է, ինչ Էջմիածնում կառուցվում է նրա առանձնատունը:Ի դեպ, Պիպոյի տունը կառուցում են ոչ թե հայ, այլ իտալացի շինարարներ: Ռուսական «Данвеста»-ի միակ սեփականատերը նույնպես նա է: Հռոմում գտնվող մոտ 5 հեկտարանոց վիլլան ժամանակին եղել է Իտալիայի նախագահի ռեզիդենցիան: Էջմիածնի տունը ևս քաղաքի լավագույն առանձնատներից է համարվում: 2013 թվականին Իտալիայի իշխանությունները Դոն Պիպոյի նկատմամբ միջազգային հետախուզում էին հայտարարել՝ քրեական հեղինակություն Դեդ Հասանի սպանության հետ կապված: Սակայն հետախուզումից նա ազատվեց շնորհիվ իր կրիմինալ կապերի: Պիպոն ժամանակ առ ժամանակ այցելում է նաեւ Հայաստան, մասնակցում էլիտար խնջույքներին՝ հարսանիքներ, կնունքներ եւ այլն: Սակայն այս տարիներին նրա ու Գրիգորյանների հարաբերություններում ոչ մի միլիմետր դրական տեղաշարժեր չեն կատարվել, երկու կլանները հարատեւ պայքարի մեջ են միմյանց հետ: Վերջին ամիսներին, մասնավորապես, Կարեն Կարապետյանի վարչապետ նշանակվելուց հետո Պիպոն գրեթե միշտ Հայաստանում է, նա իր ներկայությունը նշանավորեց անգամ ֆիլմով՝ իր ապրածի, արածի ու չարածի մասին։ Հարցազրույցներ տվեց՝ գովերգելով Կարեն Կարապետյանին, իսկ վերջերս էլ հանձն առավ դառնալ Կարեն եւ Սամվել Կարապետյանների համատեղ ջանքերով ստեղծած ներդրումների ակումբի անդամ։ Պակաս հայտնի չէ Վստրեչի Ապերը, նա հիմա կապերի մեջ է ինչպես Ռուբեն Հայրապետյանի՝ Նեմեց Ռուբոյի, այնպես էլ Սամվել Ալեքսանյանի՝ Լֆիկ Սամոյի հետ, խորհրդարանի ընտրությունների Շենգավիթում Ապերն էր համակարգում Ալեքսանյանի օգտին աշխատանքները։ Նախկինում ջերմ էր Մհեր Սեդրակյանի՝ Թոխմախի հետ, բայց իշխանության եւ Սեդրակյանի հարաբերությունների լարումից հետո սառեցին նաեւ նրանցը։ Մի խոսքով, ինչպես միշտ հիմա էլ Հայաստանում չկա սահմանազատում իշխանության, օլիգարխիայի և քրեականների միջև, ինչպես իշխանությունն է թեւերի բաժանված, այնպես էլ գողականները, որոնք ստանձնել են այս կամ այն պաշտոնյայի, օլիգարխի ֆինանսական եւ տնտեսական կապիտալի պաշտպանի առաքելությունը, բնականաբար, իրենց «փայ» հասանելիքով։ Կոնկրետ այս դեպքով պատճառների մասին եզրահանգման գալը դժվար է, քանի որ որպես այդպիսին մահափորձ տեղի չի ունեցել, ինչն արդեն կասկածների մի մեծ շղթա է բացում, քանի որ որպես կանոն գողականների դեմ մահափորձերը չեն կատարվում նման անփութությամբ։ Մի բան պարզ է, որ եթե Հայաստանի ներքին քաղաքական կյանքում խմորումներ կան, գողական աշխարհում չի կարող անդորր պահպանվել։ Հայաստանում այժմ կարեւոր շրջափուլ է․տեղի է ունենում Հայաստանի իշխանության վերաբաժանում, որը չի կարող չանդրադառնալ այդ համակարգի վրա` հանգեցնելով նաև սեփականության վերաբաժանումների ։ Հնարավոր է, որ սրանք դեռեւս նախազգուշական կրակոցներ են։ Անի Սահակյան