Թրամփը պետք է դադարի լռել. ANCA-ի տնօրեն

ԱՄՆ Հայ դատի գրասենյակի գործադիր տնօրեն Արամ Համբարյանը Թուրքիայի նախագահ Ռեջեփ Թայիփ Էրդողանի անվատնգության աշխատակիցների՝ Վաշինգտոնում խաղաղ ցուցարարների վրա դաժան հարձակման միջադեպի վերաբերյալ վկայություն է տվել ԱՄՆ Կոնգրեսի Ներկայացուցիչների պալատի արտաքին կապերի հարցերով հանձնաժողովի անդամների առաջ: Այս մասին հայտնում է Asbarez-ը: Հայտնի է, որ Համբարյանն անձամբ է գտնվել դեպքի վայրում ու տեսանկարահանել Էրդողանի թիկնազորի գործողությունները: Համբարյանի ֆիքսած կադրերում երևում է՝ ինչպես են Էրդողանի թիկնապահներն իրավապահների աչքի առաջ ծեծում խաղաղ ցուցարարներին՝ տարեց տղամարդկանց ու մի քանի կնոջ, որոնք հարձակման հետևանքով արնաշաղախ գետնին են ընկել: Նա նկարահանել է հարձակման մի մասը և տեղադրել հանձնախմբի ֆեյսբուքյան էջում: Արամ Համբարյանը նշել է, որ ԱՄՆ մայրաքաղաքում  նմանատիպ ազգայնամոլական հարձակումն անսպասելի էր, թեև Թուրքիայում և այլ բռնատիրական երկրներում այդպիսի միջադեպերը սովորական բնույթ են կրում: Նա ուշադրություն է հրավիրել այն հանգամանքի վրա, որ Էրդողանը, փաստորեն, փորձ է անում ԱՄՆ տեղափոխել իր երկրին բնորոշ անհանդուրժողականությունը: «Այն, ինչ Էրդողանն արեց Վաշինգտոնում, թույլ է տալիս պատկերացում կազմել այն բռնությունների մասին, որոնք կիրառվում են Թուրքիայի քաղաքացիների հանդեպ: Դոնալդ Թրամփը պետք է դադարի լռել և դատապարտի մեր մայրաքաղաքում խաղաղ ցուցարարների նկատմամբ իրագործված դաժան հարձակումը»,-ասել է Համբարյանը: