Փրկել Աննա Հակոբյանի ռեյտինգը. Պետության թիվ 1 խնդիրը՝ ըստ Փաշինյանի

Որևէ մեկի համար տարօրինա՞կ է դեռ, որ երբ երկիրը գտնվում է համընդհանուր քաոսի, անգործության ու անկազմակերպ ռեժիմում, իսկ Փաշինյանը «եթեր» է դուրս գալիս արդարանալու... Նա ոչ թե լուծումներ է առաջարկում հազար ու մի խնդիրների համար, կամ, որ ավելի ցանկալի կլիներ՝ հրաժարական տալու սպասված հայտարարություն է անում, այլ՝ որոշում է անդրադառնալ Մովսես Հակոբյանի՝ Աննա Հակոբյանի ու պատերազմի մասին հայտարարություններին:

«9-րդ պաշտպանական շրջանը ճեղքվեց՝ հանգեցնելով աղետի, և այն գեներալը, որն իր ապօրինի միջամտություններով առնվազն կիսում է պատասխանատվությունը այդ ձախողման համար, հիմա ասուլիսներ է տալիս, չակերտավոր բացահայտումներ անում», այսօրվա տեսաուղերձում հայտարարեց վարչապետ Նիկոլ Փաշինյանը՝ ակնարկելով ՊՆ ռազմական վերահսկողական ծառայության նախկին պետ, գեներալ-գնդապետ Մովսես Հակոբյանին, որը վերջերս հրավիրված ասուլիսում մի շարք բացահայտումներ էր արել։

Հավանաբար, տիկին Աննա Հակոբյանը ազդված է, որ պատերազմի ավարտից հետո համացանցում հասարակությունը նրա հասցեին «թթու» խոսքեր է թույլ տալիս, ամբողջ երկրի դարդն ու ցավը մի կողմ դրած՝ հանձնարարել է ամուսնուն զբաղվել իր «դեմքը» փրկելով:

Ահա, Փաշինյանը կատարում է հրահանգը:

«Իմ տիկնոջն է թիրախ դարձնում, մոռանալով հարց տալ՝ իսկ հրթիռակոծվող քաղաքում, որի բնակչության 70 տոկոսը լքել է իր բնակության վայրը, ի՞նչ գործ ուներ վարչապետի ընտանիքի անդամը: Այսինքն՝ Բադեն-Բադենի սանատորիա՞ էր հրթիռակոծվող Ստեփանակերտը, որ այնտեղ գտնվելը փորձ է արվում ներկայացնել որպես իշխանության ցոփության մի աննկարագրելի օրինակ,- ասաց Փաշինյանը։

Պարզվում է, Աննա Հակոբյանի այցը՝ վարչապետի հանձնարարությամբ, Պաշտպանության բանակի հրամանատարական կետ Պաշտպանության բանակին բարոյական աջակցություն, զորակցություն հայտնելու նպատակով է եղել...

Բայց հիշեցնենք, որ վարչապետի ընտանիքի անդամը, կոնկրետ՝ Աննա Հակոբյանը, մասնավոր, պետական լիազորություններով բոլորովին էլ չօժտված մի անձ է, որին որևէ մեկը իրավունք չունի գործուղել պետական, առավել ևս՝ ռազմական խնդիրներ համակարգելու, այն էլ՝ պատերազմի ժամանակ:

Սա հարցի մի կողմն է: Առավել մտահոգիչ է փաստը, երբ մեր հասարակության գերակշիռ հատվածը Փաշինյանի հրաժարական է ակնկալում առաջիկայում, լսում է մի ելույթ՝ սեփական կնոջ հատակ հասած վարկանիշը փրկելու համար: Դա՞ է մեր երկրի թիվ մեկ խնդիրն այսօր Փաշինյանի համար:

Փոխանակ զբաղվել Հայաստանի տարածք հասած ինքնիշխանության խախտումների խնդիրներով, հայ գերիներին, հայ զինվորների դիակների վերադարձնելու հարցերով, Ղարաբաղից Հայաստան եկած արցախցիների խնդիրներով, Արցախի բնակչության խնդիրներով, ընդհանուր առմամբ՝ ակնհայտ հումանիտար աղետի լուծմամբ՝ իր եթերում տեղ է հատկացնում Աննա Հակոբյանի թեմային:

Բոլոր խնդիրներում, բոլոր հարցերում ըստ Փաշինյանի կան մեղավորներ՝ նախկինները, իսկ մնացածը կարևոր չէ, կարևորը՝ Աննա Հակոբյանի վարկանիշն է, որը պետք է փայլեցնել:

Մետաքսյա Շալունց