Կեղծիքի թագավորություն. ֆեյքահայաստանով իշխանություն պահել չի ստացվի

Նախօրեին Հայաստանի հանրապետության Մարդու իրավունքների պաշտպան Արման Թաթոյանը ֆեյսբուքյան իր էջում մի ուշագրավ գրառում արեց:

«Սոցիալական մեդիայի ողջ տիրույթը հեղեղված է կեղծ էջերից հայհոյախառն վիրավորանքներով ու ատելության խոսքով: Հարցը կազմակերպված, կոնկրետ նպատակներով ու թիրախներով հարձակումների մասին է: Նման հարձակումներ պարբերաբար կազմակերպվում են նաև Հայաստանի մարդու իրավունքների պաշտպանի գործունեության նկատմամբ: Մեր հիմնավոր ենթադրությամբ՝ Մարդու իրավունքների պաշտպանի նկատմամբ վերջին օրերի հարձակումները կազմակերպվում կամ համակարգվում են բարձրաստիճան պաշտոնատար անձանց կողմից», գրել էր նա:

Ավելին, ըստ Մարդու իրավունքների պաշտպանի աշխատակազմի ուսումնասիրությունների արդյունքների՝ այդ պաշտոնյաներից ոմանք անձամբ են վարում կեղծ էջեր ու այդ էջերից անձամբ են տարածում ատելություն, սպառնալիք ու վիրավորանք: Ստացվում է՝ ըստ էության գործ ունենք ատելության որջեր կազմակերպելու և վարելու հետ:

Արման Թաթոյանը գրեց. «Այդ պաշտոնյաներին խիստ զգուշացնում եմ անհապաղ դադարեցնել այս ծայրաստիճան վտանգավոր, որևէ տեսակի իրավական կարգավիճակից չբխող քայլերը, այդ թվում՝ հարձակումները Մարդու իրավունքների պաշտպանի գործունեության նկատմամբ: Ցավոք, այս արատավոր երևույթը վերջին երկու տարիների ընթացքում ստացավ ծավալների շեշտակի աճ, ձեռք բերեց համակարգված ու ինստիտուցիոնալ բնույթ»:

ՄԻՊ-ը ցավով արձանագրել էր, որ հիմա գործ ունենք այնպիսի վիճակի հետ, որը կոպտորեն ոտնահարում է մարդկանց հոգեկան անձեռնմխելիությունը՝ որպես Սահմանադրության 25-րդ հոդվածով ուղիղ երաշխավորված իրավունք, վնասակար է հասարակության առողջության ու երկրում համերաշխության մթնոլորտի համար, իսկ այս օրերին կարող է խարխլել մեր երկրի անվտանգության հիմքերը:

Մի պահ, հավանաբար, մեր հասարակությունը այնքան էլ լուրջ չէր վերաբերվում Փաշինյանի ֆեյքահայաստանի մասին խոսակցություններին: Շատերին հավանաբար, թվում էր, թե սա մի փոքր խումբ է, որը գիշեր-ցերեկ զբաղված է իշխանական քարոզով ֆեյսբուքում՝ տարածելով «ճ կլասի»՝ «նայեք, ինչպես ջախջախեց մեր վարչապետը» սրան-նրան վերնագրերով ու մարդկանց գրառումների տակ հայհոյելով:

Իրականում սա խիստ կանոնակարգված է աշխատանք է պարզվում է: Եթե արդեն ՄԻՊ-ն է բարձրաձայնում դրա մասշտաբների մասին, ուրեմն՝ գործ ունենք կեղծիքի թագավորության ղեկավարի իշխանության հետ: Վաղուց է մեզանում ասվում «ֆեյքերի ֆաբրիկաների» գործածության մասին:

Իրականում, ի՞նչ է տեղի ունենում...

Ցանկացած քաղաքական, ոչ քաղաքական հարց անտեսելու, այլ թեմաներ հրապարակ նետելու, մտածված այլ թեմաներով շեղելու, իրական քաղաքական դիսկուրս տանողների դեմ հարձակումներ գործելու հրահանգներով մեր հասարակությանը ուղղորդելու հստակ գիծ է տարել իշխանությունը:

Եվ արդյունքում, երբ երկուսուկես տարվա իշխանավարումից հետո Փաշինյանը կապիտուլյացիա ստորագրեց Ադրբեջանի հետ՝ հիմա էլ այդ նենգ համացանցային «աշխատանքը» տարվում է բոլոր նրանց հանդեպ, ովքեր փորձում են հանրության աչքերը բացել, ցույց տալ, որ մեր երկրի թիվ մեկ պրոբլեմը Փաշինյանն է:

Այս կեղծիքի թագավորությունն, իրականում, փուչիկ է, քանի որ վիրտուալ ֆեյքահայաստանով իշխանություն երկար պահել չի ստացվի:

Մետաքսյա Շալունց