Հայաստանի տարածքը` առուծախի առարկա. Հանցավոր գործարքի պտուղները

Երեկ ողջ օրը Հայաստանի համացանցը, կարելի է ասել, ցնցումների մեջ էր...

Ստեղծվել է մի իրավիճակ, երբ մեր երկրի քաղաքացիները, տեղերում՝ ՏԻՄ կառույցի ներկայացուցիչները պետք է սեփական ուժերով Հայաստանի անվտանգությանը վերաբերող խնդիրներ ներկայացնեն համացանցով, որպեսզի գործող իշխանությունը տեղեկանա, թե ինչ է կատարվում երկրի ներսում:

Մի քանի ժամ տեղեկությունները տարածվում են ապացույցներով՝ տեսանյութերով, լուսանկարներով, հարցազրույցներով՝ իշխանություն կոչվածն արթնանում է, ու առաջին բանը, որ պետք է անել՝ դա ստելն է:

Երեկ ադրբեջանցի զինվորականները մուտք են գործել Սոթքի ոսկու հանքի տարածք և աշխատակիցներից պահանջել ազատել տարածքը։ Այսօր արդեն պարզ է, որ նրանք «քարտեզային» փորացավով պարզապես հանքին տիրանալու քայլ են անում:

Երեկ խայտառակությունը, համացանցային ցասումը մեղմելու համար Փաշինյանը ուղարկեց ասուլիսի Հայաստանի զինված ուժերի գլխավոր շտաբի պետի առաջին տեղակալ Տիրան Խաչատրյանին, որը հերքում է տարածված տեղեկատվությունը, թե ադրբեջանցի զինվորականները մուտք են գործել Սոթքի ոսկու հանքի տարածք և աշխատակիցներից պահանջել ազատել տարածքը։ «Ադրբեջանական զորքերը, Քարվաճառի տարածք մտնելուց հետո, հանդիպելով այդ արգելափակոցներին, ուղեփակոցին, խնդիր է բարձրացվել, որ սա մեր տարածքն է, և այս տարածքից այն ուժերը, որոնք իրականացնում են տարածքի պահպանություն պետք է դուրս գան, ընդ որում աշխատանքները, որոնք իրականացվում կամ համակարգվում են մեր կողմից, ղեկավարում է տարածքում ամենաբարձր զինվորական պաշտոն ունեցող անձը` կորպուսի հրամանատարը, բարձրախոսով կապի են դուրս եկել մեզ հետ` պահանջելով դուրս գալ այդ տարածքից: Մեր կողմից զգուշացվել է, որ սա ինչ պատկանելություն ունի, ում կողմից է, մեր կողմից զգուշացվել է ռուսական կողմին, որ այդպիսի պահանջներ կան: Ռուսական կողմի և Ադրբեջանը ներկայացնող համապատասխան զինվորականների հետ իրականացվել են բավականին երկար բանակցություններ, որից հետո ինչ համաձայնություն են ձեռք բերել, և հետագայում ինչ տիպի զարգացում տեղի կունենա, ես չեմ կարող ասել: Այդ պահպանության գոտուց համապատասխան անձնակազմը դուրս է եկել», - հայտնեց ԳՇ պետի տեղակալը:

Ըստ պայմանավորվածության` հայկական զինված ուժերը և տարածքի ազգաբնակչությունը երկարաձգված ժամկետով ամսի 25-ին պետք է Քարվաճառի շրջանից ամբողջությամբ դուրս եկած լինեին, ինչն, ըստ Խաչատրյանի, իրականացվել է: Միաժամանակ նա նշեց, որ Սոթքի ոսկու հանքի և տարածաշրջանի հետ կապված հանքը շահագործող ռուսական «Գեոպրոմայնինգ» ընկերության կողմից նախապես ձեռնարկվել էին անվտանգային միջոցառումներ՝ տվյալ տարածքի պաշտպանության համար, հանքի եզրագծում ցանկապատվել էր, իսկ ճանապարհի վրա տեղադրվել էր անցակետ, սա կատարվել է ռուսական կողմի ուժերով:

Տիրան Խաչատրյանը նշեց, որ Քարվաճառ տանող ճանապարհին տեղադրված ուղեփակոցը, անցակետը եղել են ռուսական, տեղադրված է եղել դրա մոտակայքում նաև կառույց, որտեղ պետք է բնակվեին այնտեղ ծառայություն իրականացնող անձինք: «Դա ներկայացվել է, որպես վարչական շենք, որը նույնականացվել է հանքի շահագործման տարածքի ու կառույցների հետ: Դա այդպես չէ: Հանքի տարածքում շահագործման հետ կապված տարածքի ու շինությունների հետ կապ չունի: Մեր զորքերը սահմանի պաշտպանությունը զբաղեցնում են մեր պետական սահմանի նախկինում գոյություն ունեցող եզրագծով, մենք չունենք սահմանից հետ տեղադրված դիրքեր, չունենք դիրք, որը գտնվի սահմանագծից հետ», - հայտարարեց Տիրան Խաչատրյանը:

Պարզվում է, Սոթքի ոսկու հանքը կիսով չափ հայկական, կիսով չափ ադրբեջանական վերահսկողության տարածքում է. «Կիսով չափ մեր, կիսով չափ ընկնում է իրենց տարածքում: Հանքի շահագործող լինելու է հանքի տերը»:

Այսինքն, մեր երկրի ներսում տեղադրված դարպասները, պարզվում է հայկական չեն: Այսինքն, օրը ցերեկով՝ ադրբեջանական զորք է մտնում Հայաստան, այսինքն, ոչ ոք իր տեղում չի, մարդիկ իրենք իրենց ուժերով փորձում են ՀՀ ազգային անվտանգության խնդիրները լուծել թշնամու հետ, որը ներխուժել է մեր երկրի տարածք:

Այս ծաղրը, կոլեկտիվ անպատասխանատվությունը որքան կարող է մեր հասարակությունը հանդուրժել: Պաշտոնական գերատեսչությունների ստերը այն պայմաններում, երբ մարդիկ կոնկրետ կադրեր ու լուսանկարներ են ուղարկում դեպքի վայրից: Այս ստի ու կեղծիքի թագավորությունը դեռ որքան պետք է կախված լինի մեր ժողովրդի գլխին...

Առավել քան կարելի է վստահ լինել, որ կապիտուլյացիայի փաստաթուղթ ստորագրող Փաշինյանը անգամ չի էլ պատկերացրել, թե ՀՀ ինքնիշխանության ու սահմանների համար ինչ արհավիրք է պատրաստում իր իսկ ձեռքով:

Բայց հիմա՝ երբ օրը մի խնդիր է ի հայտ գալիս՝ ինչով են զբաղված իշխանությունները՝ բացի լուրջ դեմքի արտահայտությամբ դատարկախոսությամբ զբաղվելուց:
Ի վերջո, Հայաստանի տարածքայի ինքնիշխանությանը հարված է հասցվել, նաև հիշենք՝ Նախիջևան ճանապարհ է կառուցվելու Ադրբեջանից, որը կրկին վիճահարույց է լինելու՝ ՀՀ տարածքի ինքնիշխանության տեսակետից:

Այս հանցագործությունների համար ո՞վ է պատասխանատու:

Մետաքսյա Շալունց