Սովետի ժամանակ էին նման «կատակներ» անում
Շանթ Հարությունյանի որդուն՝ Շահեն Հարությունյանին, ով հունիսին ամառային զորակոչի շրջանակներում զորակոչվելու է բանակ, զինկոմիսարիատից ուղարկել են հոգեբուժարան, որպեսզի բժշկական ստուգում անցնի: Այս մասին Ֆեյսբուքի իր էջում տեղեկացրել է Շահեն Հարությունյանը․«3 օր պետք է մնամ հոգեբուժարանում։ Փաստորեն դեռ սովետական կարգերը շարունակվում են։ Պապիկիս եղբորը՝ Մարզպետ Հարությունյանին, Սովետն է վեց ամիս պահել հոգեբուժարանում՝ այլախոհական գաղափարների և անկախական ձգտումների համար։ Հորս են երկու անգամ տարել հոգեբուժարան՝ քաղաքական հայացքների և ընդդիմադիր լինելու համար։ Հերթն ինձ էլ հասավ։ Հ.Գ. Թե՛ պապիկիս եղբոր, և թե՛ հորս նկատմամբ ինչքան էլ որ ճնշումներ են գործադրել, այնուամենայնիվ՝ ի վերջո գրել են, որ առողջ մարդիկ են։ Չեն հասկացել մինչև հիմա, որ մեր գենը առողջ է, ուղղակի իրենք են նույն տականք դավաճանները՝ առաջ սովետի տեսքով, հիմա էլ հայկական «սովետի» տեսքով։ Հիմք են ընդունել դատվածությունս ու որոշել են ւղարկել»,- գրել է Շահեն Հարությունյանը։ Նրա գրառմանն արձագանքել է նաեւ Մարդու իրավունքների պաշտպանը․«Մանրամասներին տեղեկանալու համար Մարդու իրավունքների պաշտպանի աշխատակազմից կապ են հաստատել Շահեն Հարությունյանի հետ: Զորակոչային հանձնաժողովի կողմից Շահեն Հարությունյանին բժշկական հետազոտություն անցնելու նպատակով հոգեբուժարան ուղարկելու վերաբերյալ հրապարակված տեղեկությունների հիման վրա ՀՀ մարդու իրավունքների պաշտպանի աշխատակազմում սկսվել է քննարկման ընթացակարգ: Համապատասխան պարզաբանումների պահանջով գրություն է հասցեագրվել ՀՀ պաշտպանության նախարարություն» տեղեկացնում է ՄԻՊ տարածած հայտարարությունը։ Շահենի մոր՝ Ռուզաննա Բադալյանի համար եւս անհասկանալի է որդու հոգեկան առողջության հետ կապված ստուգումը։ Տիկին Ռուզաննան հայտնել է, որ որդին հոգեպես լիովին առողջ է եւ երբեւէ, որեւէ խնդիր չի ունեցել։ ԱԻՄ առաջնորդ, քաղաքական գործիչ, խորհրդային նշանավոր այլախոհ Պարույր Հայրիկյանը հիշում է, որ Սովետի ժամանակ նման մեթոդն ընդունված «գործիք» էր՝ այլախոհներին վախեցնելու, ճնշելու համար․«Բայց ինչու այդ երեխայի դեպքում, իսկապես լուրջ եք ասում, հավատս չի գալիս», մեզանից տեղեկանալով Շահեն Հարությունյանի ուղեգրի մասին չէր ուզում հավատալ Պարույր Հայրիկյանը։ «Գժանոց է, ազնիվ խոսք, ուղեղիս մեջ չի տեղավորվումմ շոկի մեջ եմ» ,- կարկամել էր Պարույր Հայրիկյանը, նա կոչ արեց ՄԻՊ-ին իր ուշադրության ներքո պահել Շահենի հարցը․«Իրավունք չունեն, ինչ-որ տեղից պետք է ահազանգ լիներ չէ՞, ով է որոշել, որ այդպիսի զննման անհրաժեշտություն կար Շահենի մոտ։ Այսինքն քաղաքացիական ակտիվությունը պետք է ընկալել, ներողություն, գժությո՞ւն։ Եթե դուք եք նորմալը, ուրեմն մենք աննորմալ ենք», զայրույթը չէր կարողանում թաքցնել ԱԻՄ առաջնորդը, նա հիշեց, որ Սովետական միության տարիներին նման «կատակներ» անում էին․«Բայց հիմա....Սովետում ենք էլի․...»։ Հայրիկյանը հիշեց նաեւ, որ իր հետ էլ են նման կերպ վարվել, իր կյանքի այդ էպիզոդը նկարագրել է նաեւ իր հեղինակած «Լույսի ճանապարհ» վեպում: Անի Սահակյան
Հետևեք մեզ Viber-ում
