Նիկոլ Փաշինյանը դեռ կիսատ մնացած ծրագիր ունի

ՀՀ նախագահ Արմեն Սարգսյանը երեկ հայտարարել է ստեղծված իրավիճակում Նիկոլ Փաշինյանի հրաժարականի ու արտահերթ ընտրությունների անհրաժեշտությա մասին: Քաղաքական-հանրային որոշ շրջանակներ առանձնակի խանդաղատանքով են ներկայացնում Արմեն Սարգսյանի տեսաուղերձը, ոմանք հենց նրան են տեսնում որպես անցումնային վարչապետ, հիացած են նախագահի համարձակությամբ:Դե, իհարկե, նախագահի ուղերձը հիրավի սենսացիոն էր, քանզի մի մարդ, ով երկուսուկես տարի եղել է պետության գլուխը ու Սահմանադրության երաշխավորը, բառիս բուն իմաստով թքած է ունեցել թե պետության, թե սահմանադրության երեսին:

Նա լռել է, երբ երկրում ինչ-ինչ հրոսակախմբեր սահմանադրական կարգ էին տապալում, երբ ոտնահարում Էին կայացած բոլոր ինստիտուտները եւ հատկապես դատական համակարգն ի դեմս Սահմանադրական դատարանի: Նա լռել է, երբ իշխանական հրոսակախմբերն ու նրան աջակիցներն ազգային արժեքներ էին պղծում, երբ հարձակվում էին հայ եկեղեցու վրա, հայոց պատմությունը որպես պարտադիր առարկա չէին ներառում դպրոցական դասգրքերում, երբ պետության ղեկավարն իր անձնական հովանավորչության տակ էր վերցնում սեռափոխված Մելին, նա լռում էր, երբ իշխանությունը համառ եւ հետեւողական քայլ առ քայլ կյանքի էր կոչում Արցախի հարցում իր դավաճանական ծրագիրը, վարկաբեկում էր պատերազմ անցած հերոսներին, լռում, երբ նախագահներին էին դատարաններով քարշ տալիս: Այս մարդն իր անառիկ ու ապազգային մենության մեջ զբաղված էր երեխաների հետ պաղպաղակ ուտելով, ցուցարարների հետ տրնգի տալով ու այս կարգի թվացյալ անշառ գործերով, մինչդեռ շատերն են համոզված, որ յոթ երկրի շպիոնաժի սույն անդամը հատուկ առաքելությամբ է Հայաստան գործուղվել: Թե ինչ առաքելությամբ, կարծում ենք ժամանակն է, որ Սերժ Սարգսյանը խոսի այդ մասին եւ ասին՝ ով իրեն համոզեց կամ պարտադրեց, որ հենց այս մարդուն նշանակի ՀՀ նախագահ, ինչ նպատակով: Մի օր պիտի պարզ դառնա, թե ինչու եւ ինչի դիմաց է այս ապազգային տարրին Հայաստան վերադարձնել, երբ տարիներ առաջ նրան Հայաստանից վտարողները թերեւս հասկացել էին, թե ով է նա…

Եթե մոռացել եք, ապա Արմեն Սարգսյանը պատերազմի օրերին Անվտանգության խորհրդի ընդլայնված նիստերին եւս մասնակցել է եւ առնվազն լսել ԶՈՒ շտաբի պետ Օնիկ Գասպարյանի փոխանցաց տեղեկատվությունը, որ պետք է անհապաղ կանգնեցնել պատերազմը: Եւ ուրեմն ինչու է լռել այս մարդը՝ տեսնելով, որ պետական մակարդակով իրավիճակին ոչ համահունչ քարոզչություն է իրականացվում: Կարող էր չէ, մի ուղերձով հանդես գալ եւ կանխել այդ իրավիճակը, կարող էր, բայց չարեց եւ հիմա որոշել է հերոսանալ, իբր վարչապետի հրաժարական է պահանջել: Բայց դատելով այն փաստից, որ իշխանական ֆեյքերը չեն հոշոտում այս մարդուն, ապա կարող ենք կռահել, որ սա Փաշինյանի հետ պայմանավորվածության արդյունք է, դրանից բխող քայլ: Չի բացառվում, որ պայմանավորվել են, որ նա կլինի անցումային վարչապետ, որպեսզի կրկին իշխանության վերադարձնի Փաշինյանին: Թեեւ գոյություն ունի երրորդ վարկածը, չի բացառվում արեւմուտքն է նրան որպես թեկնածու մտցնում խաղի մեջ, այսինքն կրկին հակառուսական թեւն ակտիվացել է, այն պարագայում, երբ երկուսին էլ պետք է դնել դավաճանների հարթակում եւ ուղարկել պատմության աղբանոց:

Անի Սահակյան