Բոլորին մեղադրեց ստորացուցիչ պայմաններ ընդունելու մեջ՝ ինքը ընտրեց ամենանվաստացուցիչը

ՀԱԿ մամուլի խոսնակ Արման Մուսինյանը ֆեյսբուքյան իր էջում այսօր հայտնեց. «Երեկ ուշ երեկոյան ՀՀ Առաջին նախագահ Լևոն Տեր-Պետրոսյանին է այցելել Արցախի նախկին նախագահ Արկադի Ղուկասյանը, որն իր մտահոգություններն է արտահայտել Արցախում տիրող իրավիճակի կապակցությամբ` միաժամանակ կոնկրետ առաջարկներ անելով Հայաստանի իշխանություններից ակնկալվող գործողությունների վերաբերյալ: Տեր-Պետրոսյանը, կարևորելով այդ առաջարկները, խորհուրդ է տվել անմիջապես դիմել ՀՀ վարչապետ Նիկոլ Փաշինյանին»:

Առաջին հայացքից թվում է, սովորական մամլո հաղորդագրություն է, վերջերս սկսել են Տեր-Պետրոսյանին այցելել, երեկ էլ Հայաստանում Ռուսաստանի դեսպանն էր այցելել, ու ուշագրավն այն է, որ այս հանդիպումից մի քանի ժամ անց ՀԱԿ-ը հայտարարեց, որ Հայաստանի, Ռուսաստանի և Ադրբեջանի միջև ստորագրած փաստաթուղթը պետք է համարել կայացած իրողություն:

«Ռուսաստան-Հայաստան-Ադրբեջան եռակողմ համաձայնագիրը պետք է ընկալվի որպես կայացած իրողություն՝ այս պահին գնահատելով առնվազն այն կարևոր փաստը, որ դրա շնորհիվ պատերազմն ավարտվել է, և նոր զոհեր այլևս չեն լինի: Համաձայնագրի իրականացման և Ղարաբաղի հարցի վերջնական լուծման գործընթացը մոտ ապագայի խնդիր է, որին Հայաստանը պետք է պատրաստ լինի ամենայն լրջությամբ»:
Ինչու՞ են այցելում Տեր-Պետրոսյանին: Նա որևէ ազդեցություն ունի՞ Փաշինյանի վրա, մասնակցո՞ւմ է նրա հետ որոշումների կայացմանը:

Հազիվ թե: Իմանալով Փաշինյանի ինքնասիրահարվածության աստիճանը, «ամեն ինչ ճիշտ եմ արել», «ես գիտեմ ինչ եմ անում» ոճով պնդաճակատային պահվածքը, կարելի է եզրակացնել, որ Փաշինյանի համար չկան հեղինակություններ, և դա վերաբերում է նաև Տեր-Պետրոսյանին:

Որ Փաշինյան-Տեր-Պետրոսյան շփումներ, առավելևս համատեղ որոշումներ կայացնելու, բանակցելու, քննարկելու շփումներ հազիվ թե լինեն, դա կարելի է կռահել այսօր Տեր-Պետրոսյանի մերձավորների մամուլի միջոցներից մեկի՝ «Չորրորդ իշխանություն» թերթում տպագրված մի ուշագրավ հոդված:

Այն հիշեցնում է Նիկոլ Փաշինյանի՝ 2016թ. ելույթից մի հատված, որը այսօր ապացուցում է, որ Փաշինյանը նոյեմբերի 10-ին գնացել է խայտառակ, ստորացուցիչ կապիտուլյացիայի:

Ահա, 4rd.am-ը հիշեցնում է 2016թ. հուլիսի 22-ին Խորենացի փողոցում Նիկոլ Փաշինյանի ելույթից մեկ հետաքրքրական հատված, որում նա ասել է. «Լևոն Տեր-Պետրոսյանը դաշինք է կազմել Սերժ Սարգսյանի հետ՝ Ղարաբաղի հարցում այսպես կոչված մի ծրագիր իրագործելու համար, որը դիվանագիտական շրջանակներում հայտնի է որպես Լավրովի պլան: Դա մի խայտառակ ու ստորացուցիչ լուծում է Հայաստանի Հանրապետության համար: Եվ այդպիսի լուծման համաձայնվելը ամոթալի է ոչ միայն առաջին դեմքերի, այլ նաև՝ ՀՀ յուրաքանչյուր քաղաքացու համար: Ինչո՞ւ է Լևոն Տեր-Պետրոսյանը սա անում՝ բացի աշխարհաքաղաքական պատճառներից, այստեղ կա անձնական մոտիվ՝ նա ուզում է օգնել Սերժ Սարգսյանին ազատագրված տարածքները հանձնելու համար ու արձանագրել, որ ժամանակին ինքը ճիշտ էր ասում այդ տարածքների մասին: Սա ամոթալի մոտեցում է: Չի կարող խոսք լինել այդ մասին մի իրավիճակում, երբ Ալիևը ատամները սրած ամեն օր հոխորտում է ՀՀ մասին: Սա նշանակում խոսել ՀՀ և ԼՂՀ կապիտուլյացիայի մասին: Հայ ժողովուրդը ամեն ինչ պետք է անի խուսափելու համար դրանից: Սա քաղաքական դաշտի առաջին հարցն է»:

Ինչում մեղադրում էր 4 տարի առաջ Փաշինյանը Սերժ Սարգսյանին ու քննադատում Տեր-Պետրոսյանին՝ Սերժ Սարգսյանին աջակցելու համար, նույն Փաշինյանը գնաց իր մեղադրածից ավելի վատ համաձայնության Ադրբեջանի հետ նոյեմբերի 10-ին:

Ցավալի իրականությունը սա է:

Մետաքսյա Շալունց