Մի «գործիքի» երջանկության մեխանիկան

Առաջիկա օրերին լրանում է լրագրող Անժելա Թովմասյանի հեղինակային «Հայելու առաջ» հաղորդաշարի կասեցման մեկամսյա ժամկետը։ Սակայն հաղորդաշարն այլեւս չի լինի այն հեռուստաընկերության եթերում, որով հեռարձակվում էր։ Այս մասին Ազգային ժողովում «Հայաստանի Հանրապետության 2021թ. պետական բյուջեի մասին» ՀՀ օրենքի նախագծի քննարկման ժամանակ ասաց Հեռուստատեսության եւ ռադիոյի հանձնաժողովի նախագահ Տիգրան Հակոբյանը։

«Հայելու առաջ» հաղորդաշարը մինչեւ 2019 թվականի վերջ հեռարձակվում էր «Կենտրոն» հեռուստաընկերությամբ, իսկ փետրվարից տեղափոխվել էր «Արմնյուզ» հեռուստաընկերություն։  «Փաստաթղթեր են ստացել, որ այդ հեռուստատեսության հետ պայմանագիրը խզվել է եւ մենք այդ հաղորդումը չենք ունենա։ Իսկ մենք այդ հաղորդաշարը ոչ թե փակել ենք, այլ կասեցրել, որպեսզի շտկի այն բովանդակությունը, որը հարիր չէ հայկական հեռարձակողին, ոչ էլ հատկապես հանրային մուլտիպլեքսում հեռարձակվողին»- ասել է Տիգրան Հակոբյանը։

Հիշեցնենք՝ հոկտեմբերի 19-ին, Հեռուստատեսության եւ ռադիոյի հանձնաժողովում գումարվել է հանձնաժողովի նիստ, որի ընթացքում էլ որոշվել է, որ «Հայելու առաջ» հաղորդումը 30 օր եթերում չի լինելու, թե ինչու, կարծում ենք բոլորին է հայտնի, այն մնացել էր իշխանությունների կոկորդում։ Բնական է, որ իշխանության բութ գործիք դարձած Հակոբյանը, ով ծառայում էր նախկին ռեժիմին, պետք էր նման որոշում ընդուներ ու դա ներկայացներ ազգափրկիչ մի ծրագիր։ Այս գործիքի խեղճուկրակ «տիրոջ»՝ Նիկոլ Փաշինյանի համար ազգի միակ խնդիրը, փաստորեն, մի հաղորդում էր, որի չգոյությունը կենսական նշանակություն ուներ այս մարդուկի եւ իր իշխանության համար։

Ու այս արշավը համակարգում է մի մարդ, որը Տեր-Պետրոսյանի ժամանակներից մամուլի խոսքի ազատության հարցերով է զբաղված, նույնն արել է Սերժ Սարգսյանի օրոք, եւ շարունակում է Նիկոլի ժամանակներում, քանզի իր ողջ էությամբ գործիք է։ Ու այս ժամանակներում, երբ Շուշին ընկած է ու երկիր ենք կորցնում, այս մարդու երջանկության մեխանիկան մի հաղորդում փակել է։

Անի Սահակյան