Արգամիչի արգումենտն ու Սերժ Սարգսյանի հաշվարկը
ՀՀԿ նախկին փոխնախագահ, նախկին վարչապետ Հովիկ Աբրահամյանը Արտաշատի քաղաքապետի ընտրություններին մասնակցելու որոշումն արդեն կայացրել է, սակայն թեկնածուի հարցում չի կողմնորոշվում։ Այս տեղեկությունը հատատել է Հովիկ Աբրահամյանի որդին, Արտաշատի նախկին քաղաքապետ, «Ծառուկյան» դաշինքի պատգամավոր Արգամ Աբրահամյանը։ Արգամ Աբրահամյանը չի հստակեցրել, թե ում թեկնածությունն են պաշտպանելու, դեռ կքննարկեն։ Տարածված տեղեկությունների համաձայն՝ հավանական թեկնածուն համարվում է Արտաշատի փոխքաղաքապետ Գագիկ Պողոսյանը, որը Հովիկ Աբրահամյանի մորաքրոջ որդին է: Արտաշատում, փաստորեն, սրվում է իրավիճակը, ինչը վերջին օրերի ու շաբաթների իրադարձություններից ու հայտարարություններից եւ սպասելի էր, եւ՝ ոչ: Վարչապետի պաշտոնից հեռանալուց ամիսներ անց Հովիկ Աբրահամյանի հայտնությունը հրապարակային միջոցառումներին, եւ ակնհայտ մեղմ գնահատականները իշխանությունների հասցեին ենթադրությունների տեղիք էր տալիս, որ հարթվել են նեղացվածության պահերը եւ Հովիկ Աբրահամյանին կարելի է ապագայում տեսնել բարձր դիրքերում: Առվակների ու գետերի այլաբանական պատերազմից հետո Հովիկ Աբրահամյանը նախ հայտարարեց, թե չի լքել Հանրապետականը,այն դեպքում, երբ մամուլում կուսակցությունից դուրս գալու իր հայտարարությունն է հայտնվել, ապա վստահեցրեց նաեւ, որ քաղաքականությունից չի հեռացել, ամենակարեւորը՝ Սերժ Սարգսյանի հետ հարաբերությունները մնում են նախկինի պես: Սա առավել իրական դարձրեցին տարածված լուրերի հնարավորությունն այն առումով, որ Սերժ Սարգսյանը Հովիկ Աբրահամյանին պաշտոն է խոստացել, այդ պաշտոնը ԱԱԽ քարտուղարի թափուր հաստիքն է: Իհարկե, Արգամիչը հերքեց պաշտոնի մասին լուրը, բայց իշխանության նկատմամբ արտահայտած մեղմ գնահատականները խորացրեցին կասկածները, հատկապես, որ մեր երկրում նախկին ու ներկա պաշտոնյաների մոտ ակնհայտ իրողությունները հերքելն է անգամ սովորույթ դարձել: Զուգահեռ առաջ եկավ Արտաշատի հարցը, եւ այն հրապարակումները, որ Հովիկ Աբրահամյանի թեկնածուին աջակցելու է նաեւ Ծառուկյան դաշինքը: Բայց վերջին օրերին մեկը մյուսի հետեւից Արտաշատում պաշտոնազրկվում են Աբրահամյանների բարեկամ-ծանոթները, մարդիկ, որոնք որեւէ կապ ունի Աբրահամյանների հետ: Մարզպետարանի աշխատակազմի ղեկավարը, հետո որոշ դպրոցի տնօրեններ, մամուլը գրեց, որ բոլորի դեմ են արշավ սկսել, ովքեր կապ ունեն Աբրահամյանների հետ: Սա նշանակում է, որ իշխանությունը խնդիր է դրել ամեն գնով պահել Արտաշատը, անգամ չզիջել ԲՀԿ-ին, ինչի վկայությունն է այն, որ Ծառուկյան դաշինքը ըստ մամուլի ամենայն հավանականությամբ թեկնածու չի առաջադրի եւ չի էլ աջակցի Հովիկ Աբրահամյանի թեկնածուին: Խորհրդարանում Ծառուկյան դաշինքի բեմելից կարելի է չկասկածել, որ հենց այդպես էլ կլինի: Ընդդիմություն հռչակված դաշինքը մեկ մարդու պես աջակցեց ՀՀԿ-ի՝ ԱԺ-ի թեկնածուին, ինչը որոշակի իմաստով հասկանալի է, Ծառուկյանի վերադարձը քաղաքականություն որոշակի պայմանավորվածությունների արդյունքում է եղել, որոնց մեջ չի մտնում Սերժ Սարգսյանի դեմ առճակատումը: Առաջին հայացքից ընդամենը մեկ քաղաքի հարցը ստրատեգիական նշանակություն ունենալ չի կարող եւ ոչ մի կողմի համար: Սակայն կարող է ունենալ ռազմավարական նշանակություն:2018-ից առաջ Սերժ Սարգսյանը թերեւս որոշել է առհասարակ երկրում ցանկացած հարցի լուծումն ինքը տալ՝ լինի դա համայնքի ղեկավարի, թե խորհրդարանում ընդդիմության ձեւավորման: Այսպիսով նա փորձ է անելու ամրագրել իր մենիշխանությունը, որպեսզի 2018-ից հետո խոշոր հաղթաթուղթով վիճարկի իր իշխանության շարունակության հարցը: Իսկ Հովիկ Աբրահամյանի համար էլ Արտաշատի հարցը խիստ կարեւոր է դառնում մի քանի պատճառներով: Նախ տարիներ շարունակ այստեղ եղել է իր բացարձակ իշխանությունը, որտեղ հարց լուծողը՝ սկսած մարդկանց կենսապահովման, վերջացրած քաղաքական գործոնի տեսանկյունից: Հետեւաբար մտերիմներին, հարազատներին, ընդհանրապես յուրայիններին պահելու խնդիր կա, ինչպես նաեւ բարոյական հաղթանակի ակնկալիք, որը Հովիկ Աբրահամյանին չի զրկի գործոն դառնալու հնարավոր շանսից: Աբրահամյանը ամեն ինչ կանի Արտաշատում իր ուժը, իշխանությունը ցուցադրելու համար, ինչը կարող է հետագայում Սերժ Սարգսյանի հետ գործակցության արգումենտ հանդիսանալ, ի վերջո, 2018-ից հետո իշխանության վերաբաշխման հարցում կատաղի պայքար է մղվելու, իսկ նժարին հայտնված ամեն կշռաքարը կարող է հավասարություն բերել: Անի Սահակյան