Ընթանում են կատաղի մարտեր. Շուշին «թատերաբեմ է», մեր պատերազմի ամենակարևոր «բեմահարթակներից».Դավիթ Բաբայան

hayeli.am-ը Արցախի Հանրապետության նախագահի արտաքին հարաբերությունների հարցերով խորհրդական Դավիթ Բաբայանի հետ զրուցել է Արցախում այս պահին տիրող իրավիճակի մասին. «Արցախում լայնածավալ պատերազմը շարունակվում է: Տարբեր ուղղություններով ընթանում են շատ համառ և կատաղի մարտեր: Շուշին թատերաբեմ է, մեր պատերազմի ամենակարևոր «բեմահարթակներից»: Թատերաբեմ ասելով նկատի ունեմ մի վայր որտեղից հարձակումներ են ձեռնարկվում և, որի ուղղությամբ հարձակումներ են ձեռնարկում: Հետևաբար նախագահ Արայիկ Հարությունյանի հայտարարության մեջ ոչ մի իրարամերժ կարծիքներ առաջ քաշելու անհրաժեշտություն չկա: Եթե Շուշին թատերաբեմ է, իսկ թատերաբեմը միայն քաղաքը չէ՝ այլև հարակից տարածքները, ապա բնական է, որ հարձակման փորձեր են ձեռնարկվելու մայրաքաղաքի վրա: Եթե հրթիռակոծում են, ապա բնական է, որ դիվերսիոն ներթափանցման փորձեր էլ կարվեն: Միայն կասեմ՝ մենք պայքարում ենք»:

Դիտարկմանը՝ այս փուլում ի՞նչ առաջխաղացում ունի հայկական բանակը և արդյոք թշնամին էլ ունի որոշակի առաջխաղացում, Դավիթ Բաբայանը պատասխանել է. «Ընթանում են կատաղի մարտեր, ընդհանուր առմամբ՝ ճակատը պահպանվում է»: