ԱԱԾ պետի հրաժարականի պատճառները. նոր մանրամասներ
ԱԱԾ տնօրենի պաշտոնակատար Միքայել Համբարձումյանն իր դիմումի համաձայն ազատվել է պաշտոնից։ Նա այդ պաշտոնում ՀՀ նախագահ Արմեն Սարգսյանի որոշմամբ նշանակվել էր հոկտեմբերի 8-ին
Ըստ լուրերի Միքայել Համբարձումյանն աշխատանքից ազատման դիմումը գրել էր դեռևս հոկտեմբերի 28-ին։ Սակայն դիմումն ընդունվել է միայն այսօր։
Նշենք, որ Միքայել Համբարձումյանը երկար տարիներ աշխատել է ԱԱԾ քննչական դեպարտամենտում՝ որպես պետի տեղակալ, ապա՝ պետ, իսկ մինչ այս նա զբաղեցնում էր ԱԱԾ տնօրենի տեղակալի պաշտոնը: Համակարգում նա պրոֆեսիոնալի համբավ ունի :
Մեզ հայտնի է դարձել, որ դեռեւս մեկ տարի առաջ են նրան առաջարկել ԱԱԾ տնօրենի պաշտոնը, սակայն Համբարձումյանը նեղ շրջապատում անկեղծացել է, որ ինքը չի կարող աշխատել Նիկոլ Փաշինյանի ենթակայությամբ, եւ բավականին քննադատական հայացք է ունեցել տարվող կուրսի վերաբերյալ, ԱԱԾ-ի իրականացրած քաղաքականության հարցում, մասնավորապես, որ պետության թիվ մեկ անվտանգության երաշխավոր կառույցը զբաղված է ոչ թե հիմնական գործառույթով, այլ ընդդիմադիրներով եւ այլ քաղաքական հարցերով:
Սակայն պատերազմական օրերին, երբ Փաշինյանը պաշտոնանկ արեց Արգիշտի Քյարամյանին, կրկին նրան է առաջարկել զբաղեցնել այդ պաշտոնը, վերջինս հաշվի առնելով երկրում հաստատված ռազմական դրությունը՝ համաձայնել է: Թե ինչու դեռ պաշտոնին չնշանակված հրաժարականի դիմում գրեց, մի քանի վարկած է շրջանառվում: Մեկը համացանցում հայտնված հայտնի լուսանկարի պատճառով է: Հիշեցնենք, որ մինչ հանրությանը հրամցրել էին, թե վարչապետի որդին՝ Աշոտ Փաշինյանը առաջնագծում է, շատերի հետ մասնակցում հայրենիքի պաշտպանության գործին, համացանցում հայտնվեց վերջինիս լուսանկարը, որտեղ Աշոտը մոր, ԱԺ նախագահի եւ Հակոբ Սիմիդյանի հետ ուրախ դեմքով հեռախոսի մեջ է մտած:
Սա սառը ցնցուղի էֆեկտ ունեցավ հանրության շրջանում, եւ մարդիկ հասկացան, որ վարչապետի ընտանիքի համար առաջնագիծը ինչ որ մի հյուրանոցի համարն է, կամ վատագույն դեպքում՝ բունկերը: Երկրորդ վարկածն էլ այն է, որ Փաշինյանը ԱԱԾ պետի ժամանակավոր պաշտոնակատարին մի ցուցակ է փոխանցել եւ հանձնարարել նրանց նկատմամբ քրեական հետապնդում սկսել, գործեր հարուցել : Ի պատասխան Համբարձումյանն ասել է, որ դրա համար հիմքեր չի տեսնում, հիշեցրել է նաեւ, որ պետության առջեւ այս օրերին լուրջ սպառնալիքներ են ծառացած, իրենք այդ հարցերով են զբաղված, եւ քաղաքական հետապնդումների ժամանակը չէ ու ինքը չի գնա նման քայլի: <<Չես գնա, ուրեմն դիմումդ գրի>> ասել է Փաշինյանը, առանց մտածելու Համբարձումյանը գրել է հրաժարականի դիմումը:
Անի Սահակյան
Հետևեք մեզ Viber-ում
