Սերժ Սարգսյանը մի քանի օրով հետաձգել է Փաշինյանի հրաժարականի պահանջը

Ինչպես հայտնի է, տասը օր է քաղաքական ուժերը քննարկում են Արցախում ստեղծված իրավիճակը եւ հարցը լուծելու ելքեր փնտրում: Մեկ տասնյակից ավելի քաղաքական ուժերի ղեկավարների մեծ մասը իշխանությունների հրաժարականի հարց են իսկզբանե բարձրաձայնել՝ համարելով, որ անհամարժեք է ստեղծված իրավիճակին իշխանության արձագանքը: Երեկ այդ ուժերը կրկին հավաքվել են ՀՅԴ գրասենյակում, այն պահից, երբ Շուշիում իրավիճակը սրվել է, նրանք կրկին քննարկել են իրավիճակը եւ որոշել հայտարարություն տարածել ու պահանջել Նիկոլ Փաշինյանի հրաժարականը, հիմնավորելով, որ հասել ենք վտանգավոր եզրագծին, իսկ իշխանության քայլերն անհամարժեք են:

Նկատենք, որ Փաշինյանի հրաժարականի պահանջի սաղմերը դեռ շաբաթներ առաջ դրեց Վազգեն Մանուկյանը, այդ պահանջին միացան Հրանտ Բագրատյանը, Խոսրով Հարությունյանը եւ այլք: Երեկվանից այդ պահանջը սատարում են ավելի մեծ թվով ուժեր, մասնավորապես, երեկվա դրությամբ 13 կուսակցություն ստորագրել է այդ հայտարարության տակ, որը պետք է այսօր հրապարակվեր:

Ընդդիմադիր ուժերից հայտարարությունը ստորագրել հրաժարվել են «Ժառանգություն» կուսակցությունն ու Արթուր Ղազինյանի «Մեկ Հայաստան» կուսակցությունը։ «Ժառանգության» առաջնորդը Նարինե Դիլբարյանն է:

Հատկապես իրեն բավականին տարօրինակ է դրսեւորել Արթուր Ղազինյանը, նա երկար-բարակ խոսել է, հիմնականում պաշտպանել Նիկոլ Փաշինյանին, ինչպես նաեւ ՀՀ նախագահ Արմեն Սարգսյանին, ոմանց մոտ տպավորություն է ստեղծվել, որ Ղազինյանը ներդրված է նրանց կողմից, ի դեպ, նա համարվում է ՀՀ նախագահի պրոյեկտը: Նույն՝ իշխանամետ դիրքորոշման մեջ է հանդես եկել Նարինե Դիլբարյանը: Մնացածը ռադիկալ դիրքորոշում են ունեցել՝ Հրանտ Բագրատյանը, Զարուհի Փոստանջյանը, Խոսրով Հարությունյանը եւ այլք: Հընթացս նաեւ խայթել են ՀՀԿ խոսնակ Էդուարդ Շարմազանովին, որ երկիրն այնպիսի վիճակի հասցրեցին, որ իշխանության բերեցին Նիկոլ Փաշինյանին:
Ինչեւէ, առավոտվանից հայտարարության տեքստն է խմբագրվել,վերջնական տեսքի բերվել,սակայն եւս երկու ուժ՝ ԲՀԿ-ն ու ԼՀԿ-ն ժամանակ են խնդրել, հասկանալի է, որ ԲՀԿ-ն որոշակի վախեր ունի, իսկ ԼՀԿ-ն համարվում է իշխանության պրոյեկտ:
Մեզ պատմեցին, որ հայտարարության տեքստում ոչ միայն Փաշինյանի հրաժարականի հարց է բարձրացվել, ապա հաջորդող քայլերի մասին խոսվել, որոնց թվում Արմեն Սարգսյանի հրաժարականի, թերեւս այս պատճառով է Ղազինյանը խիստ ընդիմացել:

Ինչեւէ, սպասվում էր, որ ժամեր առաջ պետք է տարածեին հայտարարությունը, սակայն Սերժ Սարգսյանը Շարմազանովի միջոցով ցանկություն է հայտնել զրուցել ՀՅԴ-ական Իշխան Սաղաթելյանի հետ: Հանդիպումը կայացել է, Սերժ Սարգսյանը ասել է, որ սահմանում իրավիճակ է փոխվել եւ ճիշտ կլինի մի քանի օր ոտքները կախ գցել, եւ փաստորեն մի քանի օրով հետաձգել է Նիկոլ Փաշինյանի հրաժարականի պահանջի գործընթացը:

Անի Սահակյան