Արայիկ Հարությունյանի հետին խելքը

Արցախի նախագահ Արայիկ Հարությունյանը հատուկ շնորհակալություն է հայտնել պաշտպանության նախին նախարար, Մարտի 1-ի գործով որպես մեղադրյալ Սեյրան Օհանյանին: Շուշի այցելած նախագահը նշել է, որ պրոֆեսիոնալ զինվորականների և կամավորականների համատեղ ջանքերով ստեղծված պաշտպանական ամրությունները և տղաների վճռականությունը հույս են ներշնչում, որ բերդաքաղաքն անառիկ պահելու համար գործադրվում են բոլոր հնարավոր ջանքերը:<<Հատուկ շնորհակալություն եմ հայտնում «Արցախի հերոս», հայ ժողովրդի նվիրյալ զավակ, գեներալ-գնդապետ Սեյրան Օհանյանին»,-նշված է նախագահի գրառման մեջ:

Սեյրան Օհանյանը, հիշեցնենք, որ սեպտեմբերի 29-ից Արցախում է եւ խորհրդատուի կարգավիճակով մասնակցում է պատերազմական մարտերի մշակման գործընթացին:
Նշենք, որ վերջին օրերին թշնամին բազմաթիվ գրոհներ է ձեռնարկել Շուշիի ու Բերձորի ուղղությամբ, սակայն հետ է շպրտվել՝ տալով տեխնիկայի ու մարդուժի մեծաքանակ կորուստներ։ Թշնամու դեմ կազմակերպված օպերացիաներում առանցքային դերակատարում ունի Սեյրան Օհանյանը: Մարդ, ով երկուսուկես տարի հայաստանյան իշխանությունների կողմից հալածանքների էր ենթարկվում, քրեական գործով անցնում:
Հենց այս օրվա համար էին զգուշացնում, որ չի կարելի հերոսներին վարկաբեկել, չի կարելի անվանարկել, արժեզրկել նրանց վաստակն ու անցած ճանապարհը: Չի կարելի պատերազմ հաղթանակած գեներալներին թալանչիներ անվանել, ասել, որ նրանք շարքային հանցագործներ են:

Հենց այս օրվա համար էին մի քանի խելոք գլուխներ զգուշացնում, որ չի կարելի ներքաղաքական կեղտը տեղափոխել բանակ, հրամկզամ ու հերոսական անցյալ ունեցող մարդկանց տիրույթ: Ասել, թե Ապրիլյան պատերազմին բահերով են կռվել եւ օդն էլ պաշտպանված չի եղել ի տարբերություն այսօրվա: Սա զգուշացնում էին Նիկոլ Փաշինյանին եւ նրա կուռքերին, որոնց շարքում էր նաեւ Արայիկ Հարությունյանը:
Ընդ որում, վերջինս էր հայտարարում, որ Արցախի օդը այսօր ինչպես երբեւեէ պաշտպանված է, այն պարագայում, երբ ինքը Արցախի վարչապետ է եղել եւ առնվազն կարող էր բարձրաձայնել սպառազինության մասին:

Արայիկ Հարությունյանը մինչդեռ լուռ էր եւ նախկինում, եւ հեղափոխությունից հետո, երբ Նիկոլ Փաշինյանը Սեյրան Օհանյանի եւ բախտակիցների դատաստանն էր տեսնում, Արցախի անախությունը կերտած նախագահ Ռոբերտ Քոչարյանին էր դատում, կամ ՀԱՊԿ-ի գլխավոր քարտուղար Յուրի Խաչատուրովին, մինչդեռ զգուշացնում էին, որ վաղը խնդիրներ ենք ունենալու եւ չի կարելի ներքաղաքական խաղերում խուրդել, զոհաբերել այդ կառույցի նախագահությունը:

Եւ, եթե Արայիկ Հարությունյան, պատիվ ու արժանապատվություն ունենայիք որպես վարչապետ, որպես նախագահի թեկնածու, եւ նախեւառաջ՝ արցախցի, ապա նաեւ նախագահ, օրերից մի օր կընդվզեիք այդ վտանգավոր արշավի դեմ: Հիմա հայի հետին խելքով հասկացել եք, որ չէր կարելի հանցավոր լռություն պահպանել, երբ վարկաբեկում են հերոսներին: Հասկացել եք ու, ինչպես ձեր այժմյան կուռքերն են ասում, ռազմի աստվածներին ներգրավվել գործին:

Անի Սահակյան