Էրդողանն Ալիևին գահընկեց էլ կարող է անել

Միջազգային տարբեր կառույցների կողմից, օտարերկրյա առաջատար մամուլի ներկայացուցիչների հրապարակումների, ԵԱՀԿ Մինսկի խմբի համանախագահող երեք պետությունների իշխանությունների կողմից արձանագրված է, որ Արցախի դեմ պատերազմում գործում են ահաբեկիչներ և ջիհադիստներ։
Հայաստանն ու Արցախը ևս միջազգային ատյաններին ներկայացնում են այդ փաստերը վկայող ապացույցներ:

Դեռևս հոկտեմբերի սկզբին Ֆրանսիայի նախագահ Էմանուել Մակրոնը հայտարարեց. «Փաստեր կան, որ Ղարաբաղի մարտական գործողություններին Թուրքիայից սիրիական վարձկաններ են մասնակցում», իսկ հոկտեմբերի յոթին ԱՄՆ կոնգրեսական Բրեդ Շերմանը նշեց. «Ես կոչ եմ արել ԱՄՆ պետքարտուղարությանը շարունակել Թուրքիային հասցնել այն, որ տարածաշրջանում զինյալների տեղակայումն անընդունելի է և կհանդիպի ԱՄՆ-ի պատասխանին»:

Ապա ՌԴ ներքին հետախուզության պետ Սերգեյ Նարիշկինը հոկտեմբերի վեցին նշեց. «ԱՀԾ տեղեկություններով՝ հակամարտության գոտի ակտիվորեն ժամանում են Մերձավոր Արևելքում պատերազմող միջազգային ահաբեկչական խմբերի վարձկաններ, ինչպիսին են «Ջեբհաթ ան-Նուսրան», «Ֆիքրաթ ալ-Համզան», «Սուլթան Մուրադը», ինչպես նաև ծայրահեղական քրդական խմբավորումներ»։

Նախօրեին էլ Ռուսաստանի արտգործնախարար Սերգեյ Լավրովը հայտարարեց, որ ՌԴ-ն տիրապետում է փաստերի, որոնց համաձայն 2000 վարձկան է տեղափոխվել հակամարտության գոտի:

Չնայած այս հայտարարություններին համացանցում շարունակում են տեղեկություններ շրջանառվել այն մասին, որ թուրքական հատուկ ծառայությունները Սիրիայում հավաքագրում են ահաբեկիչներին, որպեսզի Ադրբեջան ուղարկեն Արցախի դեմ կռվելու, նրանցից մի մասին ադրբեջանական անձնագրեր են տրամադրում:

Շատ է խոսվել նաև այն մասին, որ ահաբեկիչները հնարավոր է ճակատից հեռանան ու հայտնվեն այլ երկրներում՝ Վրաստանում, Ռուսաստանում, այսինքն՝ թուրք-ադրբեջանական տանդեմի շնորհիվ ողջ տարածաշրջանը դառնա ահաբեկչական որջերի թիրախ:

Մի քանի շաբաթ առաջ Չեչնիայի մայրաքաղաք Գրոզնիում փոխհրաձգություն էր տեղի ունեցել գրոհայինների և իրավապահների միջև: Հայտնի էր դարձել, թե գրոհայինները Գրոզնի էին ներթափանցել արտերկրից, որոնք մի շարք ահաբեկչական գործողություններ էին պլանավորել տարածաշրջանում:

Երեկ ռուսաստանցի ռազմական լրագրող Սեմյոն Պեգովը Wargonzo տելեգրամյան էջում հղում անելով Ստամբուլի իր աղբյուրներին, հայտնեց, թե Բաքվի շիա գեներալներն ապստամբություն են պատրաստում թուրքական հրամանատարության դեմ:
Բաքվի գեներալները թուրքերի կողմից բանակի ղեկավարումից փաստացի հեռացումից հետո պատրաստվում են ապստամբություն սկսել գերատեսչության ներսում: «Ադրբեջանցի սպաները, որոնք շիաներ են, վրդովված են այն փաստից, որ ռազմաճակատի իրենց մարդիկ իրականում ղեկավարվում են թուրքական հատուկ ծառայությունների և արմատական սուննի համոզման թուրքամետ ահաբեկչական խմբավորումների դաշտային հրամանատարների կողմից», գրել էր նա:

Ըստ ռուս մեկնաբանի՝ «Ալիևը կորցնում է նաև վերահսկողությունը երկրում տիրող իրավիճակի վրա: Այժմ նրա շրջապատում բռնկվել է ներկլանային հակամարտություն: Փաշաևների տոհմը՝ Ալիևի կինը, նրանից պահանջում է ամբողջական տեղափոխում Անկարայի արտաքին վերահսկողության տակ: Ավելին, դա պահանջում է անել հենց հիմա: Ինքը՝ Ալիևը, փորձում է ավելի խորամանկ խաղ խաղալ՝ ընդօրինակելով երկխոսությունը Մոսկվայի հետ՝ Ռուսաստանի Դաշնության հետ կապերի արմատական սկանդալային խզումից խուսափելու համար: Միևնույն ժամանակ, նա հիանալի հասկանում է, որ ամեն դեպքում ստիպված կլինի պառկել Էրդողանի տակ: Մի խոսքով, Ադրբեջանի ղեկավարը հայտնվել է բազմավեկտոր իրավիճակում», -եզրակացրել էր Wargonzo նախագծի թիմը:
«Հայ ժողովուրդը պայքարում է փաստացի երեք թշնամու դեմ, ես չգիտեմ` ինչով էին մտածում Բաքվում, երբ ներքաշում էին ահաբեկիչ զինյալներին պատերազմի մեջ», հայտարարել է ՀՀ ԱԳ նախարար Զոհրաբ Մնացականյանը:

Իրապես, Ալիևի քայլը՝ պատերազմ սկսելու, ոչ թե հանցագործ քայլ էր հայ ժողովրդի հանդեպ, այլև տարածաշրջանային առումով՝ լրջագույն սպառնալիք մի քանի պետությունների համար, և հենց Ադրբեջանի հասարակության համար:
Եթե իրականությանը համապատասխանում է ռուս մեկնաբանի տեղեկությունները Զաքիր Հասանովին մեկուսացնելու մասին, ապա կարելի է կասկած չունենալ, որ Ալիևի ռազմաքաղաքական էլիտան կարող է ծանր իրավիճակում հայտնվել: Գործը կարող է ընդհուպ հասնել մինչև նրան «գահից» գցելը:

Առանց այն էլ Ալիևը ստիպված է լինում ժամանակ առ ժամանակ որոշումներ կայացնելիս հաշվի նստել տիկնոջ կլանի՝ Փաշաևների շահերի հետ: Այժմ էլ թուրքական զինվորականների ներկայությունը և ըստ էության, ռազմական դրության պայմաններում նրանց իշխելու հանգամանքը կարող են փոխել իրավիճակը Ադրբեջանի իշխանական վերնախավում:

Մետաքսյա Շալունց