Ոչ մի թիզ նահանջ պարգեւատրման ֆրոնտում
«Ես ստիպված հերթական անգամ անդրադառնում եմ ՊԵԿ-ի պարգևավճարներին. դրանց վրա այդքան կենտրոնանալը և դրանք վերացնելու նպատակով արվող հարցադրումները ոչ մի տեղ չտանող ճանապարհ են»,- խորհրդարանում լրագրողների հետ զրույցում հայտարարել է ՊԵԿ նախագահ Էդվարդ Հովհաննիսյանը՝ անդրադառնալով 2021 թվականի պետական բյուջեի պարգևավճարների ֆոնդին։
Նրա խոսքով, պարգևավճարներն այս պահին համարժեք վարձատրություն ապահովելուն ուղղված միջոցներ են. «Պարգևավճարները պետք է լինեն»։
Դիտարկմանը, որ այս օրերին հանրային պահանջ կա, որ բարձրաստիճան պաշտոնյաներն իրենց պարգևավճարները փոխանցեն կա՛մ «Զինծառայողների ապահովագրության» հիմնադրամին, կա՛մ «Հայաստան» համահայկական հիմնադրամին, ՊԵԿ նախագահն արձագանքեց.
«Կարծում եմ՝ մամուլից պետք է արդեն տեղեկացած լինեք, որ պատերազմական գործողությունների հենց առաջին օրերից ՊԵԿ աշխատակիցներն այս մասով շատ ակտիվ են եղել։ Բազմաթիվ անգամ գումար է հավաքագրվել և փոխանցվել «Հայաստան» համահայկական հիմնադրամին, ինչպես նաև «Զինծառայողների ապահովագրության» հիմնադրամին։ Այս պահին, ընդհանուր առմամբ, մոտ 530 մլն դրամ է փոխանցվել։ Եվ բոլորը մասնակցություն են ունեցել այս գործընթացին։ Այդ գումարները բնականաբար մարդիկ իրենց եկամուտներից են տրամադրել»։
Ինչպես ասում են՝ սա անամոթություն էլ չէ, սա խրախճանք է ժանտախտի ժամանակ: Եւ նման հայտարարություն անելու համար, թե պարգեւավճարները պետք է լինեն, առնվազն անմեղսունակ պետք է լինել, կամ անգերազանցելի սրիկա:
Երկրում պատերազմ է ու այս իրավիճակի թիվ մեկ պատասխանատուն իշխանություններն են, բայց պարզվում է այս իրավիճակն անգամ իշխանականների ինքնագնահատականում ոչ մի թիզ փոփոխություն չեն մտցրել, նրանք կարծում են, որ իրենք անգնահատելի աշխատանք են տանում պետության համար, եւ պետությունն էլ պետք է աշխատավարձից բացի պարգեւատրի: Դե, իհարկե, ինչպես Լենա Նազարյանը կասեր՝ իրենք նվիրյալներ չեն ու չեն կարող առանց փողի աշխատել հանուն պետության:
Տպավորություն է, որ այս մարդիկ հատուկ են մարդկանց տրամադրում իրենց, բայց նախեւառաջ պետության դեմ,ցինիկ ուղերձ հղում համայն հայությանը, որ դուք պարտավոր եք աշխատել հանուն Հայաստանի, իսկ մեզ վրա պատերազմը չի կարող ազդել, մենք պետք է ստանանք մեր պարգեւավճարները:
Անի Սահակյան
Հետևեք մեզ Viber-ում
