Պատերազմը դադարեցնելու փոխարեն, ուղեղներ են լվանում

Մոտ քառասուն օր է երկրում պատերազմական իրավիճակ է, մենք կորցնում ենք մեր երիտասարդ լավագույն սերնդին, իշխանությունները թնդանոթները լռեցնելու եւ բանակցային սեղանին վերադառնալու փոխարեն, հասարաության ուղեղները լվանալով, կամ բթացնելով են զբաղված:

Մինչ բոլորի ուշքն ու միտքը դեպի ռազմաճակատն է, ամեն ժամ, ամեն վայրկյան սահմանից ինֆորմացիայի են սպասում, մարդիկ մոռացել են անձնական կյանքը եւ բոլորի ուղեղներում միայն պատերազմ է, Իմ Քայլի պատգամավոր Վահագն Թեւոսյանը խորհուրդ է տալիս հանգստյան օրերին քաղաքից դուրս գնալ:

<<Վատ է, որ Արծրունը մեկ ամսից ավելի է՝ ստիպված է ամեն օր կրկնել, որ նահանջը կատաստրոֆա չէ, հարձակումն էլ դեռ հաղթանակ չէ: Վատ է, որովհետև դրա պահանջը դեռ զգացվում է, մենք պատերազմին դեռ նայում ենք կարծես շախմատային պարտիայի, որը հեսա-հեսա իր տրամաբանական ավարտին պետք է հասնի>>,- գրում է նա ու շարունակում: <<Մենք պատերազմը դիտում ենք որպես կոնկրետ խրոնոմետրաժով ֆիլմ, ավելին՝ իր ֆաբուլայով ու հանգույցով, չենք համակերպվում, երբ սյուժեն դրամատուրգիական կանոններին չի համապատասխանում երբեմն: Մենք դեռ չենք ադապտացվել էն իրավիճակին, որ սա կարծես երկարատև պատերազմ է, ու եթե շունչներս պահենք այդ ամբողջ ընթացքում՝ շնչակտուր կլինենք: Պիտի շնչենք:
Կիրակի է, ելեք քաղաքից դուրս, մի ամաչեք, վերականգնեք հոգեկան խաղաղությունը որքան հնարավոր է, ծախսեր արեք ձեր ու ձեր երեխաների համար, որովհետև վաղը նորից պատերազմ է>>:

Իհարկե, եթե նայենք պատերազմի ընթացքում իշխանականների միմոսություններն ու մանկամիտ ելույթները, եթե նայենք Քաղպայմանագրի կամավորականների ջոկատ կազմելու ձեւական քայլը, ավելի ճիշտ, ծաղրը առ հասարակություն, եթե նայենք, որ պատերազմի այս օրերին էլ, երբ բոլորն իրենց եկամուտներից մաս են հանում համահայկական հիմնադրամին, իշխանության ուշքն ու միտքը սեփական պարգեւավճարներն են ու պարզ դարձավ, որ եկող տարվա բյուջեի նախագծում այդ ֆոնդն աճել է 21 տոկոսով եւ մոտ 39 մլն դոլոր հարկատուներս ստիպված ենք լինելու այս անուղեղներին պարգեւավճար տալ:

Երբ նայում ենք, որ պատերազմի ժամանակ էլ չեն խնայում պետական բյուջեն եւ ՏԻՄ-երում նոր հաստիք են ձեւավորում՝ փոխմարզպետների փոխքաղաքապետի, ապա ինչու ոչ, այս պատգամավորն էլ կարող է մեծ լավություն անել մեզ ու թույլատրել, խորհուրդ տալ դուրս գալ հանգստի:

Անի Սահակյան