Էրդողանը փորում է Ալիևի «գերեզմանը». Ինքնախոստովանական ցուցմունք
Նոյեմբերի 1-ին Թուրքիայի արտգործնախարար Մևլյութ Չավուշօղլուն կրկին մեկնեց Ադրբեջան, որտեղ քննարկել է ղարաբաղյան հարցը: Չավուշօղլուն իր թվիթերյան էջում գրել էր, որ «Բաքու է մեկնել Ադրբեջանին իրենց աջակցությունը վերահաստատելու և Լեռնային Ղարաբաղում վերջին զարգացումների շուրջ մտքեր փոխանակելու նպատակով»:
Ըստ պաշտոնական հաղորդագրությունների, թուրք պաշտոնյան հանդիպել է Ադրբեջանի նախագահ Իլհամ Ալիևի հետ: Մևլյութ Չավուշօղլուն Ադրբեջանի նախագահ Իլհամ Ալիևի հետ Բաքվում հանդիպման ժամանակ հայտարարել է, որ Ադրբեջանի մայրաքաղաք կայցելի Թուրքիայի պաշտպանության նախարարը։
Ըստ ռուսաստանյան «ՌԻԱ Նովոստի» գործակալության՝ Չավուշօղլուն երեկ Բաքվում ասել է. «Ես ժամանել եմ նախագահի հանձնարարականով: Մենք ունենք նախագահի հանձնարարականը միայնակ չթողնել Ադրբեջանին այդ գործընթացում, պարբերաբար այցելել Բաքու և գործել համատեղ: Մեր պաշտպանության նախարարը, մյուս գործընկերները նույնպես կժամանեն Բաքու: Խորհրդարանի նախագահը գտնվում է այստեղ»։
Դե իսկ թուրքական հերթական աջակցության թեման երեկ թեժ է պահել նաև անձամբ Թուրքիայի նախագահը...
Սամսուն քաղաքում Էրդողանն իր ելույթում ոչ ավել, ոչ պակաս ինքնախոստովանական «ցուցմունք» է տվել:
«Սիրիայում մենք ենք, Լիբիայում մենք ենք, Ադրբեջանում մեր եղբայրների կողքին մենք ենք։ Թուրքիան նույն պատվաբեր վարքն է ցուցաբերում Միջերկրականից մինչև Սև ծով, Սիրիայից Լիբիա, Կիպրոսից մինչև Ղարաբաղ»։
Այսինքն, նույն օրը, երբ Բաքվում էր Թուրքիայի արտգործնախարար Չավուշօղլուն, այնտեղ էր նաև Թուրքիայի խորհրդարանի նախագահը, շուտով էլ՝ Բաքու կժամանի Թուրքիայի պաշտպանության նախարար Աքարը, Էրդողանը արձանագրում է, որ Ադրբեջանում իշխանությունը Թուրքիան է:
Այս զուգահեռը իրականում շատ խոսում է: Սիրիայում և Լիբիայում, ըստ Էրդողանի, չկա կենտրոնական իշխանություն և Էրդողանն այդ պետությունների տարածքները որպես սեփական նվաճումների դաշտ է դիտարկում, ու գումարած այս ամենին հիմա էլ նույն կարգավիճակում Էրդողանը համարում է, որ ինքն է իշխում Ադրբեջանում։
Սա իհարկե, բավական ուշագրավ խոստովանություն է, մանավանդ այն ֆոնին, երբ Ալիևը երկու օրը մեկ հայտարարում է, թե Լեռնային Ղարաբաղի պատերազմում Ադրբեջանը միայնակ է կռվում:
Նա մեկ ընդունում է, որ Անկարան սատարում է Ադրբեջանին, բայց միևնույն ժամանակ ասում է, թե՝ «Բաքուն միայնակ է կռվում», թե՝ «Մենք դեմ ենք երրորդ ուժերի միջամտությանը»:
Իրականում, Ալիևը չի էլ գիտակցում, թե ինչպես իր թեթև ձեռքով փորեց իր «գերեզմանը», քաղաքական «գերեզմանը»: Էրդողանը «եղբայրական Ադրբեջանին» ձոնված իր ելույթները շռայլելով Ադրբեջանում իր ազդեցությունն է արդեն ցուցադրում ու գրեթե «գլուխ գովում» Ադրբեջանում իշխելու հարցում:
Մետաքսյա Շալունց
Հետևեք մեզ Viber-ում
