Նիկոլ Փաշինյանը կտա՞ հրապարակային երաշխիք , որ նախագահները Մոսկվա մեկնեն

Վարչապետի խոսնակ Մանե Գևորգյանը տասն օր անց բացեց խաղաքարտերը եւ հայտնեց, որ ԼՂՀ երկրորդ եւ երրորդ նախագահներ Արկադի Ղուկասյանը եւ Բակո Սահակյանը հոկտեմբերի 20-ին վարչապետ Նիկոլ Փաշինյանի հետ ունեցած հանդիպման ժամանակ տեղեկացրել են, որ ՀՀ առաջին եւ երկրորդ նախագահներ Լեւոն Տեր-Պետրոսյանը եւ Ռոբերտ Քոչարյանը ցանկանում են մեկնել Մոսկվա՝ ռուսական էլիտայի ներկայացուցիչների հետ ԼՂ շուրջ ստեղծված իրավիճակը քննարկելու եւ քննարկումների արդյունքում Հայաստանի կառավարությանը ստեղծված իրավիճակից կոնկրետ լուծումներ առաջարկելու համար:

<<ԼՂՀ պաշտոնաթող նախագահները առաջարկել են, որ հնարավոր այցի արդյունքները քննարկվեն Հայաստանի եւ ԼՂՀ նախկին եւ ներկա ղեկավարների հանդիպման ժամանակ: Վարչապետ Փաշինյանը, ընդգծելով, որ չի կարող խոչընդոտ հանդիսանալ ի նպաստ Հայաստանի եւ Արցախի հնարավոր որեւէ քայլի՝ համաձայնել է առաջարկությանը: Մեր տեղեկություններով պաշտոնաթող նախագահները դեռեւս Հայաստանից չեն մեկնել: Ամեն դեպքում, վարչապետը եւ կառավարությունը բաց են ստեղծված իրավիճակի հանգուցալուծման առաջարկների համար եւ երբեք չեն հրաժարվել նման առաջարկների քննարկումից», հայտնեց խոսնակը:

Դեռ երկու շաբաթ առաջ Hayeli.am-ը գրել է, որ մինչ Արցախի ու ՀՀ նախագահների հանդիպումներն ու խորհրդակցությունները, առաջին նախագահ Լեւոն Տեր-Պետրոսյանը միջնորդավորված Նիկոլ Փաշինյանին փոխանցել է, որ Արցախում սանձազերծված դաժան պատերազմը կարող է կանխվել միայն Ռուսաստանի աջակցությամբ, իսկ դրա համար պետք է վերականգնել հայ-ռուսական հարաբերությունները, խոսել ռազմավարական դաշբակիցների հետ, վերացնել երկուսուկես տարվա ընթացքում կառուցված պատնեշները: Իսկ այդպիսի առաքելություն կարող է ստանձնել ինքը եւ Ռոբերտ Քոչարյանը: Սակայն Նիկոլ Փաշինյանը կատեգորիկ մերժել է մեկնված ձեռքը՝ ասելով, որ դրա կարիքը չունի եւ որ հայ-ռուսական հարաբերություններն ավելի քան փայլուն են: Իհարկե, արդեն բոլորն են տեսնում ու հասկանում, թե որքան փայլուն են այդ հարաբերությունները: Այն, ինչ չի ասում պաշտոնական Մոսկվան, բարձրաձայնում են ռուս փորձագետները, ասելով, որ հայ ժողովուրդը կամ պետք է ընտրի Արցախը, կամ Նիկոլ Փաշինյանին, քանզի ՌԴ-ն չի պատրաստվում օգնել սորոսական իշխանություններին:

Վարչապետի խոսնակի ուշացած հայտարարությունն էլ վառ ապացույցն է այն բանի, որ ՀՀ իշխանությունները Հայաստանի եւ Արցախի այսպես կոչված փրկությունը տեսնում են Ռուսաստանի միջոցով եւ այսպիսով ըստ էության տալիս են առաջին եւ երկորդ նախագահներին համաձայնություն մեկնելու Մոսկվա, խոսելու ղեկավարության հետ եւ կանխելու հայ ժողովրդի նկատմամբ իրականացվող ցեղասպանությունը: Իսկ որ պահն օրհասական է եւ թշնամին հասել է Շուշիի մատույցներ ու արդեն ոտնձգություններ է իրականացնում Հայաստանի տարածքում, հաղորդում են պաշտոնական խողովակները: Բայց մյուս կողմից՝ այս պարագայում ինչ մանդատով պետք է նախագահները մեկնեն Մոսկվա, նրան ունեն մանդատ բանակցելու Հայաստանի անունից, կամ ով կարող է երաշխիք տալ, որ Մոսկվա մեկնելուց հետո զոհերի, կորցրած տարածքների պատասխանատվության ողջ բեռը չեն տեղափոխի նրանց ուսերին: Ուստի Նիկոլ Փաշինյանը նախ պետք է հրապարակային պարզաբանմամբ հանդես գա՝ թե ինչպիսին է այսօր իրավիճակը, ինչ ենք կորցրել, որ կետին ենք հասել, ինչ է լինելու սրանից հետո, եթե պատերազմը չկանգնի եւ ինչու ոչ՝ խոստովանի, որ ինքն այլեւս չի կարողանում վերահսկել իրավիճակը ու այդ առաքելությամբ են Մոսկվա գնում նախկին նախագահները: Որեւէ մեկը, եւ հատկապես Ռոբերտ Քոչարյանը, ում այս իշխանությունները երկու տարի բանտարկած պահեցին, նման ինքնակոչի պատասխանատվություն չի վերցնի:

Անի Սահակյան