Եվրամիությունը պատրաստ է ընդլայնել և խորացնել Հայաստանի հետ համագործակցությունը. Մոգերինի (տեսանյութ)
Եվրամիությունը պատրաստ է ընդլայնել և խորացնել Հայաստանի հետ համագործակցությունը, ինչպես նաև պատրաստ է շարունակել աջակցել Հայաստանում իրականացվող բարեփոխումների գործընթացին: Այդ մասին հայտարարել է ԵՄ արտաքին գործերի և անվտանգության քաղաքականության բարձր ներկայացուցիչ, Եվրոպական հանձնաժողովի փոխնախագահ Ֆեդերիկա Մոգերինին Բրյուսելում կայացած Հայաստան-Եվրոպական միություն համագործակցության խորհրդի 17-րդ նիստի արդյունքներով մամուլի համար հայտարարության ժամանակ: «Եվրամիությունը պատրաստ է ընդլայնել և խորացնել Հայաստանի հետ համագործակցությունը: Մենք պատրաստ ենք նաև շարունակել աջակցել Հայաստանում բարեփոխումների գործընթացին մի շարք հարցերի առնչությամբ, այդ թվում՝ տնտեսական զարգացման, բիզնես միջավայրի, դատական համակարգի, մարդու իրավունքների ոլորտի, կոռուպցիայի դեմ պայքարի հարցում: Հարցեր, որոնք շատ կոնկրետ են և կարևոր Հայաստանի քաղաքացիների համար»,- ասել է Մոգերինին: Նա շնորհակալություն է հայտնել Էդվարդ Նալբանդյանին արդյունավետ և դրական հանդիպման համար և նշել, որ այսօր քննարկվել են երկկողմ հարաբերություններում հետագա քայլերը, մինչ կողմերն աշխատում են նոր Համապարփակ և ընդլայնված գործընկերության համաձայնագրի ստորագրման ուղղությամբ: Մոգերինին ընդգծել է նաև վերջին տարիներին իրականացված արդյունավետ աշխատանքը և դրական արդյունքները, որոնք երկու կողմերը ձեռք են բերել բանակցությունների ընթացքում: Եվրոպացի պաշտոնյան նշել է, որ ԵՄ-ն ակնկալում է Հայաստանի ակտիվ ու կառուցողական դիրքորոշումը Բրյուսելում կայանալիք Արևելյան գործընկերության գագաթնաժողովի պատրաստությունների հարցում: Նա հավելել է, որ նիստի ընթացքում քննարկվել է Լեռնային Ղարաբաղի հակամարտության խաղաղ կարգավորման հարցը: Եվրամիությունը կարծում է, որ անհրաժեշտ է հակամարտության շուտափույթ քաղաքական կարգավորում՝ միջազգային օրենքների համաձայն, ասել է նա՝ հավելելով, որ Եվրամիությունը լիովին սատարում է ԵԱՀԿ Մինսկի խմբի համանախագահների ջանքերին: Նշենք, որ մայիսի 23-ին Բրյուսելում կայացել է Հայաստան-Եվրոպական միություն համագործակցության խորհրդի 17-րդ նիստը: Հայաստանի Հանրապետության պատվիրակությունը գլխավորել է արտաքին քաղաքական գերատեսչության ղեկավար Էդվարդ Նալբանդյանը, իսկ Եվրոպական միության պատվիրակությունը՝ ԵՄ արտաքին գործերի և անվտանգության քաղաքականության բարձր ներկայացուցիչ, Եվրոպական հանձնաժողովի փոխնախագահ Ֆեդերիկա Մոգերինին:
Հետևեք մեզ Viber-ում
