Խառնաշփոթ թուրք-ադրբեջանական վերնախավում. զենքը քչություն է անում, պատերազմի բացթողումների մասին են խոսում

Ադրբեջանի նախագահ Իլհամ Ալիևն ասել է, որ իր երկիրը զենք և զինամթերք է գնելու՝ հաշվի առնելով ղարաբաղյան այս պատերազմի արդյունքները և ձեռք բերված փորձը:
«Ես վերջերս խորհրդակցություն եմ անցկացրել զինվորականների հետ և ասել եմ, որ հաջողությունների հետ մեկտեղ մենք պարտավոր ենք վերլուծել բացթողումները: Եվ արդեն ապագայում՝ զենք գնելիս, պետք է հաշվի առնենք այս պատերազմի փորձը, տեսնենք, ինչ է մեզ պետք, ինչ է մնացել պահեստներում», - ըստ «Ազատություն» ռադիոկայանի՝ ասել է Ալիևը «Ինտերֆաքս» գործակալությանը:

Խոսելով Ադրբեջանի զինանոցի մասին, նա ասել է, որ այն կազմված չէ միայն դրոններից (անօդաչու թռչող սարքերից): «Մենք ունենք հակաօդային պաշտպանության ռուսաստանյան, բելառուսական և իսրայելյան արտադրության արդիական համակարգեր, դրանք ոչնչացնում են հայկական կողմից արձակված հրթիռների մեծ մասը, դժբախտաբար, ամբողջը վայր գցել չենք կարող»,- ասել է Ալիևը: Նրա փոխանցմամբ, Ադրբեջանի բանակն ունի Տ-72 տեսակի գերարդիական հրասայլեր, հեռահար հրետանի և հրթիռներ՝ «Պոլոնեզ», «ԼՕՌԱ», «Էքստրա», «Կասիրգա» և այլ տեսակների: «Այսօրվա պատերազմը բնույթով, իհարկե, շատ է տարբերվում 1990-ական թվականների պատերազմից, անօդաչու ավիացիան այսօր շատ կարևոր գործոն է, մեզ շատ են օգնել իսրայելյան և թուրքական ԱԹՍ-ները»,- ասել է Ալիևը:

Փաստորեն, Ալիևը մեկ ասում է, որ ՀՕՊ համակարգեր ունեն, մեկ խոստովանում է, որ՝ «հրթիռները գցել չեն կարող»

Ապա` հանկարծակի խոստովանում է, որ պարտավոր են՝ «վերլուծել բացթողումները»:
Պարզվում է, զենքն էլ է արդեն քչություն անում, ու արդեն զենք գնելու ակնարկներ է անում:

Ու մեկ էլ պարզվում է, Ադրբեջանի նախագահ Իլհամ Ալիևը պատրաստակամություն է հայտնել Մոսկվայում հանդիպել Հայաստանի վարչապետ Նիկոլ Փաշինյանի հետ՝ առանց նախապայմանների:

Սեպտեմբերի 27-ից ի վեր՝ ղարաբաղյան պատերազմը սկսվելուց հետ, Ալիևն առաջին անգամ է խոսում առանց որևէ պայմանի հանդիպման հնարավորություն մասին: «Նշեմ, որ Մոսկվայում հանդիպելու որևէ կոնկրետ առաջարկ այս պահին դեռ չկա, ես այդպիսի հրավեր չեմ ստացել», - «Ինտեֆաքս»-ին տրված հարցազրույցում ասել է Ադրբեջանի նախագահը՝ ավելացնելով, թե նախկինում շատ հանդիպումներ են անցկացվել Ռուսաստանում: Նա ասել է, թե Հայաստանի, Ռուսաստանի և Ադրբեջանի նախագահների եռակողմ շատ հանդիպումների է մասնակցել, բայց Փաշինյանի իշխանության գալուց հետո այդպիսի հանդիպում տեղի չի ունեցել:
Ալիևն ընդգծել է, որ այդ հանդիպումները դրական է համարում, քանի որ Ռուսաստանը, որպես Մինսկի խմբի անդամ, հատուկ դերակատարություն ունի կարգավորման գործընթացում:

«Ռուսաստանը միշտ սերտ կապեր է ունեցել և՛ Հայաստանի, և՛ Ադրբեջանի հետ, և այսօր էլ քաղաքական ու տնտեսական առումով ակտիվորեն համագործակցում է Հայաստանի և Ադրբեջանի հետ, Ռուսաստանը մեր հարևանն է: Դրա համար էլ հանդիպումների մեծ մասը տեղի է ունեցել Ռուսաստանի տարածքում, բայց Փաշինյանի օրոք նման բան չի եղել: Ես չգիտեմ, թե որքանով նման հանդիպումը հիմա արդյունավետ կլինեն, բայց եթե ստացվի [Մոսկվա մեկնելու] հրավեր, մենք դա միշտ դրական ենք վերաբերվել և կվերաբերվենք դրական», - ասել է Ալիևը:

Ի՞նչ է ստացվում...

Էրդողանը Պուտինի հետ է բանակցում, որ հակամարտությունը կարգավորեն, Ալիևն արդեն զենքի քչության, Ադրբեջանի վրա թափվող հրթիռները վայր չգցելու մասին է խոստովանում, ադրբեջանական բանակում «բացթողումների» մասին է խոստովանում:

Փաստորեն, Ալիևը, որն ունի 80 միլիոնից ավելի բնակչություն ունեցող Թուրքիայի ուղղակի աջակցությունը, Սիրիայի ու Լիբայի վարձկան ահաբեկիչների աջակցությունը՝ պատերազմից մեկ ամիս անց արդեն սկսել է նվնվալ...

Մետաքսյա Շալունց