Վազգեն Մանուկյանը ճիշտ է ասել ու դեռ մի բան էլ քիչ է ասել. Իսրայել Հակոբկոխյան
Բռնցքամարտիկ, չեմպիոն Իսրայել Հակոբկոխյանը կիսում է ԱԺՄ ղեկավար Վազգեն Մանուկյանի երեկվա հայտարարությունը. «Ես դեռ երկու տարի առաջ եմ ասել, որ Նիկոլ Փաշինյանը պետք է շուտ հեռանա, նա երկրի ղեկավարի պաշտոնում մնալու իրավունք չունի: Պետք է խելացի մարդիկ հավաքվեն հիմա իրար գլուխ, հասկանանք՝ ինչ ենք անում, ինչպես ենք այս փորձանքից դուրս գալիս: Հարց են տալիս՝ ինչու՞ հրաժարական չի տալիս, ես էլ ասում եմ՝ դա պետք է Աննային հարցնեք (խմբ. նկատի ունի վարչապետի տիկնոջը՝ Աննա Հակոբյանին): Ես կարծում եմ՝ երկիրը փրկելը մենակ մարդու գործ չի: Մեր ռազմական ղեկավարները, երկրորդ և երրորդ նախագահները պետք է իրար գլուխ հավաքվեն՝ հասկանանք՝ ոնց ենք էս «շառից-փորձանքից» դուրս գալիս»:
Հիշեցնենք՝ երեկ ԱԺՄ ղեկավար Վազգեն Մանուկյանն այսօր հայտարարությամբ է հանդես եկել՝ պահանջելով ՀՀ վարչապետ Նիկոլ Փաշինյանի հրաժարականը. «Վտանգված է ոչ միայն Արցախը, այլև Հայաստանը և հայության ապագան։
Կարելի՞ է արդյոք փոխել իրավիճակը, բեկում մտցնել։ Այո՛։ Բայց ոչ ներկա կառավարման օրոք։
Ի՞նչ է պետք անել։
1․ Այս կառավարությունը պետք է հրաժարական տա՝ բանակին հանձնելով ողջ իշխանությունը, ընդ որում դա պետք է անի կամավոր, առանց ցնցումների, որոնք կարող են կործանարար լինել։
2․ Բանակը, իր ձեռքը վերցնելով ողջ իշխանությունը, պետք է կազմի միասնական Պաշտպանության կոմիտե Արցախի հետ միասին՝ կազմակերպելով պատերազմական ներկա իրավիճակին անհրաժեշտ միջոցառումները, ապահովելով վստահություն և գնալով բանակցությունների շահագրգիռ պետությունների, միջազգային կառույցների հետ։
Սա միակ փրկությունն է։ Հակառակ դեպքում մենք կարող ենք կորցնել ամեն ինչ»:
Վաղգեն Մանուկյանի կոչին միացել են հասարակական ու քաղաքական մի խումբ անհատներ:
Հետևեք մեզ Viber-ում
