Պետք է իշխանությունը փոխանցել պետական պաշտպանական խորհուրդին, որտեղ Փաշինյանը դեր չի ունենա. Արամ Սարգսյան

ԱԺՄ ղեկավար Վազգեն Մանուկյանն այսօր հայտարարությամբ է հանդես եկել՝ պահանջելով ՀՀ վարչապետ Նիկոլ Փաշինյանի հրաժարականը. «Վտանգված է ոչ միայն Արցախը, այլև Հայաստանը և հայության ապագան։

Կարելի՞ է արդյոք փոխել իրավիճակը, բեկում մտցնել։ Այո՛։ Բայց ոչ ներկա կառավարման օրոք։

Ի՞նչ է պետք անել։

1․ Այս կառավարությունը պետք է հրաժարական տա՝ բանակին հանձնելով ողջ իշխանությունը, ընդ որում դա պետք է անի կամավոր, առանց ցնցումների, որոնք կարող են կործանարար լինել։

2․ Բանակը, իր ձեռքը վերցնելով ողջ իշխանությունը, պետք է կազմի միասնական Պաշտպանության կոմիտե Արցախի հետ միասին՝ կազմակերպելով պատերազմական ներկա իրավիճակին անհրաժեշտ միջոցառումները, ապահովելով վստահություն և գնալով բանակցությունների շահագրգիռ պետությունների, միջազգային կառույցների հետ։

Սա միակ փրկությունն է։ Հակառակ դեպքում մենք կարող ենք կորցնել ամեն ինչ»:

Թեմայի շուրջ զրուցել ենք Դեմոկրատական կուսակցության ղեկավար Արամ Սարգսյանի հետ. «Ես կարծում եմ՝ պետք է ստեղծել պետական պաշտպանության կոմիտե, որը կամբողջացներ պետության կառավարումն այս պահին, որը կլիներ ինտելեկտուալ, կարող ուժերի միավորում, ու երկիրն այս վիճակին չէր հասնի: Պետական կոմիտեի ձևավորումը անցնցում ամեն ինչ կիրականացնի՝ որտեղ կլինեն մեր ռազմական ղեկավարության ներկայացուցիչները և հնարավոր կլինի միասնական որոշումներ կայացնել: Այսօր ամենակարևոր հանգամանքը այլ է՝ մենք հիմա պետք է պարտադիր դիմենք Ռուսաստանին, որի հետ ունենք ռազմավարական դաշնագիր, որպեսզի ՌԴ-ի միջամտությունն էլ լինի հստակ»:

Արամ Սարգսյանը կարևորում է ձև, որով պետք է դիմել ՌԴ նախագահին. «Ի՞նչ միջամտություն կարող է լինել. դա կարող է լինել հակատեռորիստական օպերացիա, որը  ՌԴ-ն կարծում եմ վաղուց պլանավորած ունի, երկրորդը կարող է լինել խաղաղապահ ուժերի ուղղակի ներգրավվումն այս տարածաշրջանում և երրորդը՝ պարտադիր այն բանակցությունները, որոնք չպետք է նախապայմաններ ունենան, որպեսզի Ալիևն էլ ինչ-որ բան թելադրի: Ինչ վերաբերվում է կառավարության հրաժարականին, ապա կարծում եմ, որ դեռ պետք է նաև նրանց ասել՝ բարի եղեք ներկայացրեք՝ ինչ ծրագիր ունեք, որպեսզի մենք էլ իմանանք՝ արժի՞ դուք մնաք իշխանության, թե՞ ոչ»:

Դիտարկմանն՝ այս փուլում իրատեսակա՞ն է Նիկոլ Փաշինյանի հրաժարականը, Արամ Սարգսյանը նշել է. «Չեմ կարծում, որ այս փուլում իրատեսական է, բայց անգամ այս պայմաններում պետք է ձևավորվի համապատասխան պետական պաշտպանության կոմիտե: Շատ անհրաժեշտ է պաշտոնապես դիմել ՌԴ-ին, եթե չի դիմելու, ուրեմն այդ դեպքում պետք է անենք համապատասխան քայլեր:»