Ինչու իրականում ազատվեց ԱԱԾ պաշտոնյան

Երեկ հայտնի դարձավ, որ Հայաստանի Հանրապետության ազգային անվտանգության ծառայության սահմանապահ զորքերի հրամանատար Վաղինակ Սարգսյանն ազատվեց զբաղեցրած պաշտոնից, թե ինչու, որն է ռազմական դրության պայմաններում այդ ազատման պատճառը, պաշտոնապես չի հաղորդվում: Փոխարենը մեկ օր առաջ հայտնի դարձավ, որ Ազգային անվտանգության ծառայության տնօրենի պարտականությունների ժամանակավոր կատարող Միքայել Համբարձումյանն այցելել է ՀՀ ԱԱԾ սահմանապահ զորքեր և հանդիպում ունեցել սահմանապահների հետ: Մ. Համբարձումյանը, ողջունելով ներկաներին, իր խոսքում անդրադարձել է թուրքա-ադրբեջանա-ահաբեկչական դաշինքի կողմից սանձազերծված ռազմական գործողություններում սահմանապահների մասնակցության կարևորություններին և ընդգծել վերջիններիս կողմից ծառայողական պարտականություններն ամենայն կարգապահությամբ ու արդյունավետորեն իրականացնելու հրամայականը՝ շեշտելով, որ այդ ասպարեզում յուրաքանչյուր թերացում ունենալու է իր համապատասխան հետևանքները:

Այնուհետեւ լրատվամիջոցները հղում անելով սեփական աղբյուրներին՝ գրեցին, որ սահմանապահ զորքերում ԱԱԾ պետի ժամանակավոր պաշտոնակատարը թեժ խոսակցություն է ունեցել, քանի որ պարզել է, որ կառույցում պատշաճ են կատարել իրենց պարտականությունները: Մեկ օր անց հետեւեց Սարգսյանի ազատման հրամանը: Այսպիսով՝ ով է Վաղինակ Սարգսյանը եւ երբ էր հայտնվել այդ պաշտոնում:

Վաղինակ Սարգսյանը ԱԱԾ սահմանապահ զորքերի հրամանատար էր նշանակվել 2018-ի հունիսի 11-ին՝ Նիկոլ Փաշինյանի առաջարկով: Նշանակումը պատահական չհամարվեց, քանի որ 2018 թվականի հեղափոխության օրերին, մասնավորապես, ապրիլի 23-ին,  Երևանում Սերժ Սարգսյանի վարչապետության դեմ «Իմ քայլը» նախաձեռնության բողոքի ակցիային հանկարծակի միացան ՀՀ զինված ուժերի խաղաղապահ բրիգադի մի խումբ զինծառայողներ՝ համազգեստներով:

Իսկ ՀՀ ԶՈւ խաղաղապահ ուժերի բրիգադի հրամանատարն այդ ժամանակ Վաղինակ Սարգսյանն էր: ՀՀ ՊՆ-ն քննադատել էր այս քայլը՝ հայտարարելով, որ բանակը պետք է դուրս լինի քաղաքականությունից և քաղաքական գործընթացներից: Այդ ժամանակ ՀՀ պաշտպանության նախարարի պաշտոնակատար Վիգեն Սարգսյանը հայտնել էր, որ խոսքը 209 զինծառայողի մասին է, և հորդորել էր հաջորդ նախարարին՝ շատ կոշտ արձագանքել ծառայողական քննությունից հետո: «Դա անթույլատրելի է և պետության համար կործանում է նշանակում, և դա է պատճառը, որ ես հորդորում եմ հաջորդ նախարարին անպայման անպատասխան չթողնել և ծառայողական քննությունը հասցնել ավարտին: Պետք է հասկանալ, թե ինչ ուժերի ազդեցության տակ, ինչպես և այլն»,- ասել էր նա:

Թե ինչ բացթողումներ է թույլ տվել այս անգամ Վաղինակ Սարգսյանն ԱԱԾ սահմանապահ զորքերի հրամանատարի պաշտոնում պատերազմական այս իրավիճակում, ժամանակը ցույց կտա: Մի բան փաստ է՝ չէր կարող մեկ անգամ պետության դեմ քայլ անողը երկրորդ անգամ չգնալ նման քայլի, եւ նորմալ իշխանությունը նրան պաշտոնից կազատեր առաջին այսպես կոչված հակապետական քայլից հետո, սակայն Նիկոլ Փաշինյանը Սարգսյանի ոչ թե ազատեց, այլ, ըստ էության, պարգեւատրեց՝ պաշտոնի բարձրացմամբ:
Հավելենք, որ 2016-ի հունիսին Սերժ Սարգսյանի հրամանով Վաղինակ Սարգսյանը նշանակվել էր ՀՀ զինված ուժերի գլխավոր շտաբի հետախուզության վարչության պետ՝ փոխարինելով Արշակ Կարապետյանին:

Անի Սահակյան