Հերթը Պուտինինն է. նա հզոր հարված հասցրեց Էրդողանի «տանիքի» տակ գտնվող գրոհայիններին

Այսօր էլ տապալվեց ԵԱՀԿ Մինսկի խմբում համանախագահող՝ Միացյալ Նահանգների նախագահ Թրամփի նախաձեռնությամբ հաստատված հումանիտար հրադադարն էլ տապալեցին Անկարան ու Բաքուն:

Հիշեցնենք, որ սա երրորդ փորձն էր՝ Ռուսաստանի և Ֆրանսիայի նախագահների նախորդ փորձերից հետո:

Էրդողանը հստակ ուղերձ է հղում ԵԱՀԿ Մինսկի խմբի պետություններին, որ պատերազմը կշարունակվի այնքան, որքան ինքն է ցանկանում: Երեկ Էրդողանը հերթական անգամ ուժգին քննադատեց ԱՄՆ-ի ու Ֆրանսիայի իշխանություններին, ընդ որում՝ Մակրոնին արդեն երկրորդ անգամ վիրավորելով:

Իսկ ԵԱՀԿ Մինսկի խմբի համանախագահները կոչ են արել կողմերին անհապաղ քայլեր ձեռնարկել՝ իրագործելու հոկտեմբերի 10-ի Մոսկվայի համատեղ հայտարարության բոլոր կետերը՝ ինչպես և պարտավորվել էին։ Նրանք անգամ հոկտեմբերի 29-ին Ժնևում Մնացականյան-Բայրամով նոր հանդիպում են պատրաստվում կազմակերպել:
Բայց ինչպես երևում է, հերթը դարձյալ Պուտինն է՝ և դիվանագիտական կուլիսներում, ինչպես նաև այլ վայրերում...

Ռուսաստանը բացառում է Լեռնային Ղարաբաղի կոնֆլիկտի ռազմական լուծումը: Այս մասին հայտարարել է Ռուսաստանի արտաքին գործերի նախարար Սերգեյ Լավրովը Աթենքի մակեդոնական լրատվական գործակալությանը տված հարցազրույցում: «Մենք չենք թաքցնում, որ չենք աջակցում այդ խնդրի ռազմական լուծման հնարավորության վերաբերյալ դիրքորոշմանը։ Ռուսաստանն ու Թուրքիան աշխատում են հակամարտությունների կարգավորման ուղղությամբ։ Լեռնային Ղարաբաղի պատմության մեջ Ռուսաստանի և Թուրքիայի ներգրավվածության բնույթն ունի իր նրբությունները: Գաղտնիք չէ, որ օբյեկտիվ պատճառներով մի շարք վիճահարույց տարածաշրջանային խնդիրներ լուծելու մեր մոտեցումները կարող են էապես տարբերվել»,- ասել է ՌԴ ԱԳՆ ղեկավարը:

Մոսկվան ակնհայտ է, որ շարունակելու է Անկարայի հետ, այսպես ասած՝ «լեզու գտնել»՝ Արցախում պատերազմի շուրջ: Պատերազմի առաջին իսկ օրվանից Մոսկվան բանակցություններ է վարում Թուրքիայի իշխանությունների հետ: Արդյունք՝ առայժմ չկա. Անկարան որոշել է պատերազմը շարունակել, Էրդողանի համար կարծես արդեն «պատվի հարց է», քանի որ բլից կրիգը, չստացվեց, իսկ Էրդողանի ընկալմամբ՝ ուրեմն թուրքական «հզոր» բանակը չի կարողանո՞ւմ մի «փոքրիկ» Արցախի հարց լուծել...
Պուտինը բանակցում է, բայց ոչ միայն... Նաև՝ գործում է:

Ռուսաստանի օդատիեզերական ուժերը հուժկու հարված են հասցրել Սիրիայի հյուսիսում Թուրքիայի աջակցությունը վայելող գրոհայիններին։ Տարբեր լրատվամիջոցներ հայտնեցին, որ ռուսական ռազմական ինքնաթիռները ոչնչացրել են Իդլիբի նահանգում գտնվող գրոհայինների ճամբարը։ Տարբեր աղբյուրներ հայտնում են, որ Ռուսաստանի ՕՏՈւ–ի հասցրած հարվածից զոհվել և վիրավորվել է ավելի քան 100 գրոհային, իսկ նրանց մարզական ճամբարն ամբողջովին ոչնչացված է։

Մետաքսյա Շալունց