Այս քայլը քաղաքական դաշտի այլասերում է. Գուրգեն Եղիազարյան

«Կասեմ, որ սա հիմար քայլ է»,-hayeli.am-ի հետ զրույցում ասաց քաղաքական գործիչ Գուրգեն Եղիազարյանը՝ անդրադառնալով Անժելա Թովմասյանի հեղինակային «Հայելու առաջ» հաղորդման 30 օրով փակվելուն:

Հիշեցնենք՝ Հոկտեմբերի 19-ին, Հեռուստատեսության և ռադիոյի հանձնաժողովում գումարվել է հանձնաժողովի նիստ, որի ընթացքում որոշում է կայացվել, որ «ԱՐՄՆՅՈՒԶ» հեռուսաընկերությամբ հեռարձակվող «Հայելու առաջ» հաղորդումը 30 օր եթերում չի լինի:

Որոշման մեջ մասնավորապես ասված է.

«Հաշվի առնելով այն փաստը, որ Օրենքով սահմանված է տեսալսողական հաղորդումներում օրենսդրությամբ արգելված արարքների կոչեր տարածելու արգելքը, իսկ Հեռարձակողների կողմից «Հայելու առաջ» հեղինակային հաղորդման ընթացքում չեն պահպանվել այդ դրույթների պահպանումը, Հանձնաժողովը որոշում է կայացրել կասեցնել «ԱՐՄՆՅՈՒԶ» ՓԲ և «ՌԱԴԻՈ 107 ՖՄ» ՍՊ ընկերությունների լիցենզիայի գործողությունը՝ «Հայելու առաջ» տեսալսողական հաղորդման մասով՝ 30 օր ժամկետով»:

Գուրգեն Եղիազարյանի խոսքով՝ այս քայլը քաղաքական դաշտի այլասերում է, որի համար նման քայլի գնացողները դեռ պատասխան են տալու. «Փորձում են քաղաքական դաշտի ամենաազդեցիկ քայլը դուրս մղել և մենք դեռ մեզ պետք է հարց տանք՝ ինչու՞ այս փուլում նման քայլի գնացին, գուցե այլ որոշում ունեն: Ժամանակը շատ հարցերի պատասխան կտա»:

Անի Սահակյան