Կրեմլը սկսել է ուղիղ աշխատել Արցախի հետ

Արցախում կատարվող իրադարձություններին տևական ժամանակ որպես դիտորդ և միջնորդ հետևելու Կրեմլի կարգավիճակը, անկախ պատճառներից, անվերջ շարունակվել չի կարող, որովհետև մեր տարածաշրջանում Թուրքիայի ակտիվացումն ու հզորացումն, ի հաշիվ Ռուսական կայսրության թուլացման է լինելու: Սա Կրեմլը և Պուտինը հասկանում են բոլորից լավ, առավել ևս, որ Թուրքիայի պահվածքն ավելի ու ավելի ագրեսիվ է դառնում: Թուրքիայի նախագահ Ռեջեփ Թայիփ Էրդողանը հայտարարել է, որ Անկարան չի ճանաչում Ղրիմը որպես ռուսական տարածք և սատարում է Ուկրաինայի տարածքային ամբողջականությանը: Սա շատ բաց մարտահրավեր է՚ ուղղված Պուտինին: Այս պահին բախման թատերաբեմը Արցախն է, բայց դա ամենևին էլ չի նշանակում, որ հետագայում ռազմաճակատի աշխարհագրությունը չի փոխվի:
Այսքանով հանդերձ Մոսկվա-Երևան ուղիղ բանակցությունների տեմպը, համենայն դեպքս առաջին դեմքերի մակարդակով, վերջին օրերին նկատելիորեն ընկել է, ավելին դրանք կարծես թե չկան: Վերջին օրերին Նիկոլ Փաշինյան-Վլադիմիր |Պուտին հեռախոսազրույց անգամ տեղի չի ունեցել (այդ մասին չկա պաշտոնական տեղեկատվություն), էլ չենք խոսում այն մասին, որ արդեն 20 օր շարունակվող պատերազմի պայմաններում Հայաստանի վարչապետն պետք է որ դեմ առ դեմ քննարկում ունեցած լիներ մեր ռազմական գլխավոր գործըներոջ՚ ՌԴ նախագահի հետ: Հանդիպում տեղի չի ունեցել, համենայն դեպս այդ մասին պաշտոնական տեղեկատվություն չկա: Ինչևէ:
Նախօրիեն հայտնի դարձավ, որ Ռուսաստանի Դաշնության Պետական դումայի պատգամավոր, «Միասնական Ռուսաստան» (Единая Россия) խմբակցության անդամ Վիտալի Միլոնովը հանդիպում է ունեցել Արցախի հանրապետության նախագահ Արայիկ Հարությունյանի հետ:
Քննարկել են ադրբեջանա-թուրքա-ահաբեկչական ագրեսիայի հետևանքով տարածաշրջանում ստեղծված իրավիճակը և երկուստեք ընդգծել տարածաշրջանի կայունությունը խաթարող գործողությունների և արտաքին ու ահաբեկչական ուժերի ընդգրկման անթույլատրելիությունը: «Ծավալված առանձնազրույցում ես իմ շնորհակալությունն եմ հայտնել պարոն Միլոնովին այցի և ցուցաբերած հետաքրքրության համար, ինչպես նաև ընդգծել եմ Ռուսաստանի Դաշնության ունեցած կարևոր դերակատարությունը՝ հակամարտության կարգավորման և երկարատև խաղաղության հաստատման գործում»,- ՖԲ էջում գրել է Արայիկ Հարությունյանը։
Հանդիպման մասին հրապարակում էր կատարել նաև պետդումայի պատգամավորը: Վիտալի Միլոնովը իր ֆեյսբուքյան էջում գրել է․ «Այսօր մենք հանդիպեցինք ԼՂ նախագահ Արայիկ Վլադիմիրի Հարությունյանի հետ։ Այս դժվարին օրերին մեր սրտերը մեր եղբայրների հետ են։ Հակամարտության ռազմական լուծումը Ադրբեջանի եւ Թուրքիայի կողմից անթույլատրելի է։ Մենք շատ հույս ունենք, որ Արցախի խաղաղ երկինքը հուսալիորեն կպաշտպանվի ագրեսիայից, եւ ոչ մի թուրքական անօդաչու այլեւս կյանքեր չի խլի։ Ղարաբաղի հողը ԻՊ բարմալեյների ատամների բանը չէ»։
Ավելի ուշ ռուսական պաշտոնական լրատվությունը հայտարարեց, որ Օդային հարված է հասցրել Իդլիբում տեղակայված ահաբեկչական խմբավորումներին, որոնք պետք է տեղափոխվեին Արցախ:
Ռուսաստանը արգելել է իր տարածք մտնել մոտ 68 տոննա թուրքական ապրանք:
ՌԴ-ն զորավարժություններ է սկսել Կասպից ծովում՚ Թևավոր հրթիռներով և ռազմական նավատորմով: Սրանք բոլորն այնուամենայնիվ զսպող նշանակություն ունեն: Օգտագործելով տեռորիստների դեմ պայքարի խաղաքարտը՚ Ռուսաստանը կարծես թե մտադիր է ուղիղ աշխատել Արցախի հետ, քանի որ այս պահին դա է պահանջում նրա կայսերական շահը: Բայց մեզ համար դա ձեռնտու տարբերակ է, որովհետև պատերազմն օր առաջ կանգնեցնելու հարցում ռուսական ներգրավվածությունն այսպես թե այնպես այլընտրանք չունի:

Հայկ Դավթյան