«Կիքսերն» անթույլատրելի են. ինչը Փաշինյանը չասաց Կիսելյովի մոտ

Երեկ Հայաստանի վարչապետ Նիկոլ Փաշինյանն ու Ադրբեջանի նախագահ Իլհամ Ալիևը հարցազրույց էին տվել «Россия сегодня» լ/գ գլխավոր տնօրեն Դմիտրի Կիսելյովին:
Թե ինչ մտքեր է հնչեցնում Իլհամ Ալիևը՝ գաղտնիք չէ: Նա արդեն գրեթե 3 շաբաթ ներկայացնում է համակարգված ստերի շարան՝ ղարաբաղյան կարգավորման բանակցային գործընթացի մասին: Անգիր արած տեքստերով, որոնց հիմքում հետևյալ գլխավոր մեղադրանքներն են՝ «Հայաստանն է տապալել բանակցությունները», իբր՝ բանակցող կողմն էր, ինչը լկտի սուտ է. միակ կողմը, որը մշտապես հայտնվել է բոլոր պայմանավորվածությունները տապալելու դերում եղել է Ալիևը: Հիշեցնենք, դեռ 1994թ. կնքված զինադադարից հետո ներկայացված կարգավորման բոլոր տարբերակները մերժել է պաշտոնական Բաքուն:

Այժմ Ալիևի կեղծ դիրքորոշումները կրկնելն ու քննարկելը՝ անիմաստ է. նա իրականացնում է իր երկրի համար անհրաժեշտ քարոզչությունը:

Ինչպե՞ս է արձագանքում ադրբեջանական ամենաբարձր մակարդակով 20 օրյա ստին ու կեղծիքին Հայաստանի վարչապետը, որը բաց չի թողնում որևէ լրատվամիջոցի հրավեր:
Ուրեմն, կամ այդ հանդիպումներին պետք է գնալ պատրաստված, կամ ընդհանրապես չգնալ:

Այսօր, ստեղծվել է մի մթնոլորտ, երբ նույնիսկ հայկական ճշմարտության առջև է աշխարհը աչք փակում, նախընտրելով լսել ադրբեջանական սուտը:
Դա նշանակում է, որ Հայաստանի իշխանությունները պետք է կարգավորման գործընթացի վերաբերյալ ունենան հստակ ու չվիճարկվող դիրքորոշում:

Բայց ինչ ենք մենք տեսնում: Ընդամենը մեկ օրինակ Россия сегодня –ի հարցազրույցից: Դմիտրի Կիսելյովը հարցնում է՝ «մենք հաճախ ենք լսում օտարերկրացի վարձկանների և ահաբեկիչների մասին, որոնք կռվում են Ադրբեջանի կողմից: Ապացույցներ ունե՞ք այդ կապակցությամբ, և արդյոք Հայաստանի կողմից կռվո՞ւմ են օտարերկրացիներ»:
Նիկոլ Փաշինյանը պատասխանում է. «Այդ մասին արդեն ողջ աշխարհն է խոսում: Դա շատ կարևոր նյուանս է և կարևոր է նաև այն պատճառով, որ կօգնի հասկանալ, թե ով և ինչ նկատառումներով է սկսել այս ռազմական գործողությունները: Իհարկե, կան կոնկրետ ապացույցներ, որ Սիրիայից զինյալներ ու ահաբեկիչներ են մասնակցում Լեռնային Ղարաբաղի դեմ պատերազմում: Այդ վիդեոապացույցներն արդեն հրապարակված են սոցիալական ցանցերում և զանգվածային լրատվության միջոցներում: Եվ հիմա ակնհայտ է, որ Թուրքիան է այս պատերազմի գլխավոր հովանավորը: Թուրքիան վարձել է այդ զինյալ-ահաբեկիչներին և տեղափոխել Լեռնային Ղարաբաղի հակամարտության գոտի: Եվ Թուրքիայի որոշմամբ և հովանավորությամբ է որոշում կայացվել՝ պատերազմ սկսել, հարձակում սկսել Լեռնային Ղարաբաղի դեմ»:

Ուրեմն ռուսական եթերում, որտեղ ամերիկյան ու եվրոպական պարբերականների հրապարակումները համարում են «ոչ այնքան արժանահավատ», արժե՞ որպես ապացույց բերել «վիդեոապացույցները սոցիալական ցանցերում և զանգվածային լրատվության միջոցներում»:

Այդ ո՞ր օրվանից են սոցիալական ցանցերի գրառումները որպես հիմք ընդունվում... Միթե սոցիալական ցանցերի ու լրատվամիջոցների հրապարակումներն ավելի ծանրակշիռ են, քան ԵԱՀԿ Մինսկի խմբի համանախագահող երեք պետությունների՝ Ռուսաստանի, Ֆրանսիայի ու ԱՄՆ-ի բարձրաստիճան պաշտոնյաների արձանագրումները:
Փաշինյանը չգիտի՞, որ իրեն ուղղված հարցի պատասխանը տրվել է ՝ Ռուսաստանի, Ֆրանսիայի ու ԱՄՆ-ի բարձրաստիճան պաշտոնյաների մակարդակով:

Հիշեցնենք, ՌԴ Արտաքին հետախուզության ծառայության ղեկավար Սերգեյ Նարիշկինը հայտարարեց, որ Լեռնային Ղարաբաղի հակամարտության գոտի են տեղափոխվում Մերձավոր Արևելքի ահաբեկչական կազմակերպություններից հազարավոր զինյալներ: Նարիշկինը նշել է, որ ռազմական գործողություններին մասնակցում են արգելված կազմակերպությունների վարձկաններ: Նրա խոսքով՝ Ղարաբաղում կռվում են «Ջեբհաթ ան Նուսրա»-ի զինյալներ: Նարիշկինը վստահ է, որ Ղարաբաղը կարող է դառնալ նոր ցատկահարթակ ահաբեկչական խմբավորումների համար, վտանգ կա, որ այնտեղից զինյալները կարող են տեղափոխվել ՌԴ տարածք:

Հաջորդը, Ֆրանսիայի նախագահ Էմանուել Մակրոնը նույնպես միանշանակ պնդեց. Ֆրանսիան ունի տեղեկատվություն այն մասին, որ Սիրիայից գրոհայիններ են տեղափոխվել Ղարաբաղ ռազմական գործողություններին մասնակցելու նպատակով: «Ես ցանկանում եմ հստակ հայտարարել. մենք ունենք տեղեկատվություն, որը հստակ վկայում է այն մասին, որ ջիհադիստական խմբավորումների գրոհայինները լքել են Սիրիայի թատերաբեմը, որպեսզի միանան ռազմական գործողություններին Ղարաբաղում: Շատ լուրջ ու նոր գործոն է»:

Ֆրանսիայի նախագահ Էմանուել Մակրոնը ԵՄ գագաթնաժողովի առաջին օրվա արդյունքների վերաբերյալ ճեպազրույցի ժամանակ հայտարարել է, որ 300 սիրիացի զինյալներ Թուրքիայի Գազիանթեփ քաղաքով ուղարկվել են Բաքու ղարաբաղյան հակամարտության գոտում լարվածության աճի ֆոնին: «Ես կարող եմ հաստատել, որ 300 գրոհայիններ հեռացել են Սիրիայից ՝ Գազիանթեփով՝ Բաքու հասնելու համար: Այս գրոհայինները հայտնի են, բացահայտված են ու նույնականացված: Նրանք Հալեպի շրջանում գործող ջիհադիստական խմբավորումներից են: Սա է իրավիճակը: Մոտ նույն չափի այլ զորախմբեր էլ են նախապատրաստվում: Ես չեմ պատրաստվում ասել, որ սա կարմիր գիծն է, քանի որ այն հատված է արդեն»,- ասել է Մակրոնը:

Եվ վերջապես ԱՄՆ –ից՝ պետքարտողար Մայք Պոմպեոն հոկտեմբերի 2-ին, պատասխանելով լրագրողի հարցին նշել էր, որ տեղյակ է Թուրքիայի կողմից սիրիացի զինյալներ Ադրբեջան տեղափոխման հրապարակումների հետ: «Ես նույնպես տեսել եմ այդ հաղորդագրությունը: Այս պահին միայն հետևյալը կարող եմ ասել: Հուսով եմ ՝ դա ճիշտ չէ: Մենք տեսել ենք, թե ինչպես են Սիրիայի մարտական դիրքերից սիրիացի մարտիկները տեղափոխվում Լիբիա` ստեղծելով է անկայունություն, ավելի մեծ խառնաշփոթ, ավելի լուրջ ընդհարումներ, ավելի լայնածավալ ռազմական գործողություններ: Այդ քայլը նույն հետևանքները կունենա նաև Լեռնային Ղարաբաղում: Այնպես որ, հուսով եմ, որ տեղեկությունը չի համապատասխանում իրականությանը»,- ասել էր Պոմպեոն:

Հիշեցնենք, որ ԱՄՆ Պաշտպանության նախարարության ներկայացուցիչը, որի անունը չի հրապարակվել, Sky News Arabia-ին հաստատել է, որ ճիշտ են այն տեղեկությունները, որ Թուրքիայի կողմից 100-ավոր սիրիացի վարձկաններ են տեղափոխվել Ադրբեջան:
Հիմա այս ծանրակշիռ հայտարարությունները թողած՝ Փաշինյանը իրեն ուղղված հարցին պատասխանելիս հիշում է սոցիալական ցանցերի ու ԶԼՄ-ների հրապարակումները:

Ժամանակն է, որ ղարաբաղյան կարգավորման գործընթացի հարցում Փաշինյանին անհրաժեշտ խորհուրդներ տան մարդիկ, ովքեր հետևում են իրադարձություններին ու տիրապետում են կարգավորման գործընթացին՝ 1990-ականներից սկսած: Եթե իհարկե, նրանց կարիքը Փաշինյանը զգում է...

Հրապարակային ելույթներում պաշտոնական Երևանից այս կարգի «կիքսերը» լայնածավալ պատերազմի ու ալիևյան կեղծիքների հեղեղի պայմաններում ուղղակի անթույլատրելի են: